អំពើភេរវកម្មចំនួនពីរលើកបានផ្តាច់ជីវិតមនុស្សយ៉ាងតិច ៩១នាក់
កាលពីរសៀលថ្ងៃសុក្រ ទី២២ កក្កដាម្សិលមិញ ប្រទេសន័រវែសបានទទួលរងនូវអំពើភេរវកម្មយ៉ាងបង្ហូរឈាមចំនួនពីរលើកផ្ទួនៗគ្នា។ អំពើភេរវកម្មទីមួយកើតឡើងនៅក្នុងទីក្រុងអូស្លូ និងទីពីរ នៅលើកោះអូតូយ៉ា ស្ថិតចម្ងាយប្រមាណជា ៤០គីឡូម៉ែត្រពីទីក្រុងអូស្លូ។ យោងតាមតុល្យការបណ្តោះអាសន្នចុងក្រោយផ្តល់ដោយប៉ូលិសន័រវែស មានមនុស្សស្លាប់យ៉ាងតិច ៩១នាក់ និងរងរបួសជាច្រើននាក់ផ្សេងទៀត។ សហគមន៍អន្តរជាតិបានថ្កោលទោសយ៉ាងខ្លំាងអំពើភេរវកម្មនោះ។
ចុះផ្សាយនៅថ្ងៃ៖ កែប្រែថ្ងៃទី៖
អំពើភេរវកម្មទំាងពីរលើកផ្ទួនៗគ្នាហាក់ដូចជាបានសំដៅលើរដ្ឋាភិបាលរបស់គណបក្សពលករដែលដឹកនំាដោយលោកនាយករដ្ឋមន្រ្តី Jens Stoltenberg។ អំពើភេរវកម្មលើកទីមួយនៅប្រមាណជាម៉ោង ៣រសៀល ម៉ោងនៅក្នុងប្រទេស ន័រវែស គឺសំដៅអគាររដ្ឋាភិបាលនៅក្នុងទីក្រុងអូស្លូ។ បើតាមមើលទៅ, អំពើភេរវកម្មនោះ គឺជាការផ្ទុះរថយន្តមួយគ្រឿងផ្ទុកពេញដោយជាតិផ្ទុះដែលភេរវជនបានចតចោលនៅក្បែរអគារនោះ។ កម្លំាងផ្ទុះបានបំផ្លាញអគាររដ្ឋាភិបាលមួយភាគធំដែលមានការិយាល័យរបស់លោកនាយករដ្ឋមន្រ្តីនៅខាងក្នុង និងអគារផ្សេងទៀតដែលស្ថិតនៅក្បែរនោះ។ ព្រឹត្តិការណ៍នេះបានបណ្តាលឲ្យស្លាប់មនុស្ស ៧នាក់ និងរងរបួសប្រមាណជា ១០នាក់ផ្សេងទៀត។
ប៉ុន្តែ ក្រោយពីការផ្ទុះបន្តិចមក ស្រាប់តែមានព្រឹត្តិការណ៍បាញ់រះមួយទៀត នៅកោះអូតូយ៉ា ស្ថិតនៅចម្ងាយប្រមាណជា ៤០គីឡូម៉ែត្រពីទីក្រុងអូស្លូ។ ដំបូង បុរសម្នាក់ដែលពាក់អាវការពារគ្រាប់របស់ប៉ូលិសបានចូលទៅបង្ហាញខ្លួននៅក្នុងមីទិញមួយដែលរៀបចំដោយក្រុមយុវវ័យនៃគណបក្សពលកររបស់លោកនាយករដ្ឋមន្រ្តី។ បុរសរូបនោះបានហៅអ្នកចូលរួមប្រមាណជា ៦០០នាក់ឲ្យប្រមូលផ្តុំគ្នាមួយកន្លែង ដោយមូលហេតុសន្តិសុខ។ ភ្លាមមួយរំពេច បុរសរូបនោះក៏បានទាញកំាភ្លើងបាញ់រះយ៉ាងសាហាវទៅលើហ្វូងយុវវ័យដែលកំពុងអង្គុយប្រមូលផ្តុំគ្នា។ គឺនៅទីនោះហើយ ដែលមានចំនួនមនុស្សស្លាប់ច្រើនជាងគេ។ បើយោងតាមតួលេខចុងក្រោយផ្តល់ដោយប៉ូលិស មានមនុស្សស្លាប់យ៉ាងតិច ៨៤នាក់។ បើយោងតាមសាក្សីមួយចំនួនឲ្យដឹងថា អ្នកដែលបានរួចជីវិត ដោយសារតែពួកគេបានលោតចូលទៅក្នុងទឹកដែលមានសីតុណ្ហភាពយ៉ាងត្រជាក់។
សហគមន៍អន្តរជាតិនំាគ្នាថ្កោលទោសអំពើភេរវកម្មនៅន័រវែស
លោកនាយករដ្ឋមន្រ្តីន័រវែស Jens Stoltenberg បានចាត់ទុកអំពើភេរវកម្មទំាងពីរផ្ទួនៗគ្នានាថ្ងៃម្សិលមិញថា ជាសោកនាដកម្មជាតិ និងបានបញ្ជូនសារទៅកាន់ក្រុមជនដៃដល់ ព្រមទំាងជនដែលស្ថិតនៅពីក្រោយអំពើភេរវកម្មនោះថា ពួកគេមិនអាចបំផ្លាញប្រទេសន័រវែសបានទេ ហើយពួកគេក៏មិនអាចបំផ្លាញលទ្ធិប្រជាធិបតេយ្យរបស់ន័រវែសបានដែរ។ បន្ទាប់មក គឺជាសាររបស់ព្រះមហាក្សត្រន័រវែស ហារ៉ាល់ទី៥ ដែលព្រះអង្គបានចូលរួមរំលែកទុក្ខជាមួយក្រុមគ្រួសារជនរងគ្រោះ។
សហភាពអឺរ៉ុបដែលន័រវែសជាប្រទេសសមាជិក លោកប្រធានសហភាពអឺរ៉ុប Herman Von Rompuy បានចាត់ទុកអំពើភេរវកម្មនោះថា ជាទង្វើមួយថោកទាប និងបានសម្តែងសាមគ្គីភាពជាមួយលោកនាយករដ្ឋមន្រ្តីន័រវែស។ បន្ទាប់មក ពីអង្គការអូតង់ដែលន័រវែសជាសមាជិក លោកអគ្គលេខាធិការអូតង់ Anders Fogh Rasmussen បានថ្កោលទោស និងចាត់ទុកការវាយប្រហារនេះថា ជាទង្វើមួយគួរឲ្យស្អប់ខ្ពើមបំផុត។ នៅក្នុងប្រទេសបារំាង លោកប្រធានាធិបតីនីកូឡា សាកូស៊ីបានថ្កោលទោសចំពោះទង្វើមួយដែលមិនអាចអត់ឱនឲ្យបានឡើយ។ ពីប្រទេសអូស្រ្តាលី រហូតដល់ទ្វីបអាមេរិកឡាទីន ប្រតិកម្មថ្កោលទោសមានច្រើនរាប់មិនអស់។ លោកប្រធានាធិបតីអាមេរិកបារ៉ាក់ អូបាម៉ាបានថ្លែងថា ការវាយប្រហារនេះបានដាស់យើងគ្រប់គ្នាឲ្យប្រុងប្រយ័ត្ន និងពីភាពចំាបាច់ដែលត្រូវរួមសហការគ្នានៅក្នុងវិស័យស៊ើបការសំងាត់។
រហូតមកដល់ពេលនេះ នៅមិនទាន់មានក្រុមមួយណាបានចេញមុខប្រកាសថា ជាស្នាដៃរបស់ខ្លួននៅឡើយទេ។ ប៉ុន្តែតំាងពីថ្ងៃម្សិលមិញមក ប៉ូលិសន័រវែសបានចាប់ខ្លួនបុរសម្នាក់មានអាយុ ៣២ឆ្នំា មានដើមកំណើតជាជនជាតិន័រវែស និងជាមនុស្សស្និទ្ធនឹងគណបក្សស្តំាជ្រុលនិយម។ បុរសនោះឯងដែលបានបាញ់រះលើហ្វូងមនុស្សនៅលើកោះអូតូយ៉ា និងប្រហែលជាអ្នកដែលបានរៀបចំអំពើភេរវកម្មនៅក្នុងទីក្រុងអូស្លូក្នុងថ្ងៃតែមួយ។ ខណៈនេះ ប៉ូលិសបានបិទខ្ទប់សកម្មភាពរបស់បុរសនោះនៅតាមបណ្តាញសង្គម Twitter ឬមួយក៏ Facebook។ គឺតាមរយៈបណ្តាញសង្គមនោះឯង ដែលបុរសរូបនោះបានសរសេរប្រាប់ពីចំណង់ចំណូលចិត្ត និងពីជំហររបស់ខ្លួន នោះគឺប្រឆំាងនឹងសាសនាអ៊ីស្លាម ស្អប់ខ្ពើមសង្គមមួយដែលមានវប្បធម៌ចំរុះ និងមានគំនិតនយោបាយអភិរក្សនិយម។ យ៉ាងណាក៏ដោយ ប៉ូលិសនៅមិនទាន់អាចបញ្ជាក់បានទេថា នេះសុទ្ធសឹងជាហេតុផលដែលជម្រុញឲ្យបុរសរូបនោះប្រព្រឹត្តអំពើយ៉ាងសាហាវ និងកម្រោលរបៀបនេះ។ ម្យ៉ាងទៀត គេក៏នៅមិនទាន់អាចសន្និដ្ឋានបានទេថា អំពើភេរវកម្មទំាងពីរបានត្រូវរៀបចំដោយបុរសតែម្នាក់នោះ។ ជារួមទៅ ទោះបីជាមិនទាន់មានជនណាម្នាក់ ឬក្រុមណាមួយចេញមុខប្រកាសថា ជាស្នាដៃរបស់ខ្លួនក៏ដោយ ក៏មានសម្មតិកម្មចំនួន ៣ ត្រូវបានលើកឡើង ទីមួយ៖ អាចជាទង្វើរបស់មនុស្សកម្រោលចូល ទីពីរ៖ អាចជាស្នាដៃរបស់ក្រុមជ្រុលនិយម ព្រោះថា ន័រវែសជាជម្រករបស់ក្រុមណាស៊ីជំនាន់ថ្មី និងសម្មតិកម្មចុងក្រោយ អាចជាស្នាដៃរបស់ក្រុមអ៊ីស្លាមនិយមជ្រុល Jihad។
សូមជម្រាបជូនថា ប្រទេសន័រវែសត្រូវបានគេទទួលស្គាល់ថា បានដើរតួនាទីជាអន្តរការីស្វែងរកសន្តិភាពឲ្យប្រទេសស៊ូដង់ ទីម័រខាងកើត សេរីលង្កា និងនៅប៉ាឡេស្ទីន។ ម្យ៉ាងទៀត ក្នុងនាមជាសមាជិកអូតង់ ន័រវែសបានបញ្ជូនទាហានខ្លួនទៅចូលរួមសង្រ្គាមនៅក្នុងប្រទេសអាហ្វហ្កានីស្តង់ និងនៅលីប៊ី។ សំណួរដែលចោទ តើទង្វើទំាងអស់នេះ ឬ ដែលន័រវែសបានទទួលលទ្ធផលនៅថ្ងៃម្សិលមិញ ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ