ប្រមុខដឹកនាំអាល្លឺម៉ង់និងបារាំងរិះរកដំណោះស្រាយឲ្យវិបត្តិនៃតំបន់អឺរ៉ូ
លោកប្រធានាធិបតីបារាំងនីកូឡាសាកូហ្ស៊ីនិងលោកស្រីនាយករដ្ឋមន្ត្រី អាល្លឺម៉ង់មែរកែលបានជួបពិភាក្សាគ្នានៅថ្ងៃចន្ទទី៥ធ្នូឆ្នាំ២០១១ ដើម្បីស្វែងរកដំណោះស្រាយឲ្យវិបត្តិនៃតំបន់អឺរ៉ូ។ ប្រមុខដឹកនាំនៃប្រទេសទាំងពីរសម្រេចបាននូវកិច្ចព្រមព្រៀងដើម្បី ធ្វើការពង្រឹងអភិបាលកិច្ចនៅក្នុងតំបន់អឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៤
នៅក្នុងកិច្ចព្រមព្រៀងបារាំង-អាល្លឺម៉ង់សម្រេចបាននៅពេលថ្មីៗនេះ គេកត់សម្គាល់ឃើញមានវិធានការសំខាន់ៗ៤៖
ទី១- ពង្រឹងទណ្ឌកម្មដាក់ទៅលើប្រទេសដែលមានឧនភាពហួសហេតុ
លោកប្រធានាធិបតីបារាំងនីកូឡាសាកូហ្ស៊ីនិងលោកស្រីនាយករដ្ឋមន្ត្រីអាល្លឺម៉ង់មែរកែលគ្រោងពង្រឹងទណ្ឌកម្មស្វ័យប្រវត្តដាក់ទៅលើប្រទេសក្នុងតំបន់អឺរ៉ូណាដែលពុំគោរពកិច្ចព្រមព្រៀងរក្សាស្ថិរភាព ពោលគឺប្រទេសណាដែលមានឧនភាពថវិកាលើសពី៣%នៃផលិតផលដុលក្នុងប្រទេស។ គួរបញ្ជាក់ថា ប្រទេសបារាំងនិងប្រទេសអាល្លឺម៉ង់គ្មានបំណងដាក់ទណ្ឌកម្មហិរញ្ញវត្ថុបន្ថែមទៅលើប្រទេសដែលកំពុងមានវិបត្តិហិរញ្ញវត្ថុស្រាប់នោះឡើយ។
ទី២- ពង្រឹងវិធានច្បាប់ “សុវណ្ណ” Renforcer la règle d’or
ដើម្បីកុំឲ្យប្រទេសក្នុងតំបន់អឺរ៉ូមានការធ្វេសប្រហែស ប្រមុខដឹកនាំបារាំងនិងអាល្លឺម៉ង់បានទាមទារឲ្យចារវិធានច្បាប់ “សុវណ្ណ” ឬ la règle d’or នេះនៅក្នុងរដ្ឋធម្មនុញ្ញរបស់ប្រទេសនីមួយៗ។ ពិតមែនតែ លោកស្រីនាយករដ្ឋមន្ត្រីអាល្លឺម៉ង់មែរកែលពុំយល់ព្រមឲ្យតុលាការអឺរ៉ុបធ្វើជាអ្នកអារកាត់ទៅលើបញ្ហាថវិកាជាតិនៃប្រទេសក្នុងតំបន់អឺរ៉ូ ក៏ប៉ុន្តែលោកស្រីមែរកែលយល់ព្រមឲ្យតុលាការអឺរ៉ុបត្រួតពិនិត្យទៅលើភាពសមស្របនឹងវិធានច្បាប់ “សុវណ្ណ” នៃសេចក្តីសម្រេចចិត្តរបស់ប្រទេសក្នុងតំបន់អឺរ៉ូពាក់ព័ន្ធនឹងការគោរពអត្រានៃឧនភាពថវិកាពុំឲ្យមានលើសពី៣%នៃផលិតផលដុលសរុប។
ទី៣- រដ្ឋាភិបាលសេដ្ឋកិច្ចអឺរ៉ុប
ទីក្រុងប៉ារីសនិងទីក្រុងបែរឡាំងបានយល់ព្រមព្រៀងគ្នាឲ្យមាន ជំនួបកំពូលប្រចាំខែ រវាងប្រមុខរដ្ឋនិងប្រមុខរដ្ឋាភិបាននៃប្រទេសក្នុងតំបន់អឺរ៉ូ ដោយមានកម្មវត្ថុយ៉ាងជាក់ច្បាស់គឺត្រូវរិះរកធ្វើយ៉ាងណាឲ្យមានសន្ទុះកំណើនសេដ្ឋកិច្ចនៅក្នុងតំបន់អឺរ៉ូ។
ទី៤- យន្តកម្មអឺរ៉ុបសម្រាប់រក្សាស្ថិរភាព
មូលនិធិអឺរ៉ុបដើម្បីរក្សាស្ថិរភាពហិរញ្ញវត្ថុ Fonds Européen de Stabilité Financière (FESF) ដែលបានបង្កើតឲ្យមានយ៉ាងបន្ទាន់នៅខែឧសភាឆ្នាំ២០១០ដោយមានទឹកប្រាក់ប្រមាណ៤៤០ពាន់លានអឺរ៉ូសម្រាប់ធ្វើការឆ្លើយតបនឹងតម្រូវការហិរញ្ញប្បទានយ៉ាងបន្ទាន់នៃប្រទេសសមាជិកតំបន់អឺរ៉ូ។ មូលនិធិអឺរ៉ុបដើម្បីរក្សាស្ថិរភាពហិរញ្ញវត្ថុ Fonds Européen de Stabilité Financière (FESF) នេះ នឹងត្រូវជំនួសដោយ យន្តកម្មអឺរ៉ុបសម្រាប់រក្សាស្ថិរភាព “ Mécanisme Européen de Stabilité”នៅខែឧសភាឆ្នាំ២០១៣ខាងមុខ ដោយមានមូលធនបានមកពីប្រទេសជាសមាជិកនៃតំបន់អឺរ៉ូ។
យន្តកម្មអឺរ៉ុបសម្រាប់រក្សាស្ថិរភាព “ Mécanisme Européen de Stabilité” នេះមានលំនាំជា“មូលនិធិរូបិយវត្ថុអឺរ៉ុប”ដែលនឹងធ្វើឲ្យទីផ្សារហិរញ្ញវត្ថុមានទំនុកចិត្តកក់ក្តៅ។ មូលហេតុនេះហើយដែលធ្វើឲ្យប្រទេសបារាំងនិងប្រទេសអាល្លឺម៉ង់ខិតខំជំរុញពន្លឿនការរៀបចំឲ្យមាន“មូលនិធិរូបិយវត្ថុអឺរ៉ុប”ថ្មីនេះ។ គួរបញ្ជាក់ថា សេចក្តីសម្រេចចិត្តរបស់យន្តកម្មអឺរ៉ុបសម្រាប់រក្សាស្ថិរភាពនេះអាចនឹងប្រព្រឹត្តទៅដោយមានការយល់ព្រមពីសំណាក់ប្រទេសជាសមាជិកចំនួន៨៥% ពុំចាំបាច់មានការយល់ព្រមជាឯកច្ឆ័ន្ទឡើយ។ ទាំងនេះដើម្បីចៀសវាងកុំឲ្យប្រទេសសមាជិកតូចៗក្នុងតំបន់អឺរ៉ូអាចធ្វើការជំទាស់ប្រឆាំង។
សំណើទាំងប៉ុន្មានខាងលើរបស់ប្រមុខដឹកនាំបារាំងនិងអាល្លឺម៉ង់នេះ នឹងត្រូវយកទៅពិភាក្សានាឱកាសជំនួបកំពូលនៅទីក្រុងព្រុចសែលនៅថ្ងៃព្រហស្បតិ៍ទី៨និងថ្ងៃសុក្រទី៩ធ្នូឆ្នាំ២០១១ខាងមុខដ៏ខ្លីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ