ប្រាក់អឺរ៉ូងើបមុខឡើងវិញក្រោយពីធនាគារកណ្តាលបានធ្វើអន្តរាគមន៍
នៅព្រឹកថ្ងៃព្រហស្បតិ៍ទី១ធ្នូឆ្នាំ២០១១នេះ តម្លៃប្រាក់អឺរ៉ូបានស្ទុះកើនឡើងទៅមុខ ដោយសារតែមានអន្តរាគមន៍ស្របគ្នាពីសំណាក់ធនាគារកណ្តាលនៃប្រទេសធំៗនៅលើលោក ក្នុងគោលបំណងជួយសម្រួលហិរញ្ញប្បទាននៃវិស័យធនាគារដែលកំពុងជាប់ផុងក្នុងវិបត្តិប្រាក់បំណុលអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២២
នៅម៉ោង៧ព្រឹកម៉ោងសកលត្រូវជាម៉ោង៨នៅទីក្រុងប៉ារីស ប្រាក់១អឺរ៉ូដូរបាន១,៣៤៤៩ដុល្លារអាមេរិកទល់នឹង១,៣៤៣៨នៅល្ងាចមិញ។ ហើយនៅថ្ងៃពុធទី៣០វិច្ឆិកាឆ្នាំ២០១១ ប្រាក់អឺរ៉ូបានស្ទុះកើនឡើងដល់១,៣៥៣៣ដុល្លារ ដែលជាកម្រិតមួយដ៏សែនខ្ពស់ចាប់តាំងពីថ្ងៃទី២២វិច្ឆិកាមក។
ជាមួយនឹងប្រាក់យេនជប៉ុនវិញ ក្នុង១អឺរ៉ូប្តូរបាន១០៤,៥០យេនទល់នឹង១០៤,២៥នៅយប់ថ្ងៃពុធម្សិលមិញនៅម៉ោង២២,០០ម៉ោងសកល។
ធនាគារកណ្តាលអឺរ៉ុប ធនាគារកណ្តាលអាមេរិក ធនាគារកណ្តាលកាណាដា ធនាគារកណ្តាលអង់គ្លេស ធនាគារកណ្តាលជប៉ុន និងធនាគារកណ្តាលស្វីសបានព្រមព្រៀងគ្នាធ្វើអន្តរាគមន៍ដើម្បីជួយសម្រួលប្រព័ន្ធហិរញ្ញវត្ថុ ដោយហេតុថា ធនាគារពុំសូវមានទំនុកចិត្តនឹងគ្នាហើយក៏លែងផ្តល់ប្រាក់កម្ចីឲ្យគ្នាទៅវិញទៅមកដូចពេលមុនៗទៀតឡើយ។ ទាំងនេះក៏ជាមូលហេតុមួយទៀតដែលនាំឲ្យធនាគារលែងឲ្យសហគ្រាសឬអតិថិជនរបស់ខ្លួនខ្ចីប្រាក់សម្រាប់យកទៅអភិវឌ្ឍសកម្មភាពពាណិជ្ជកម្មឬឧស្សាហកម្មរបស់ខ្លួន។
គួរកត់សម្គាល់ថា ធនាគារកណ្តាលធំៗទាំង៦ខាងលើនេះបានព្រមព្រៀងសម្រួលធ្វើការដោះដូររូបិយប័ណ្ណនឹងគ្នារហូតដល់ខែកុម្ភៈឆ្នាំ២០១៣។
សូមបញ្ជាក់ថា បច្ចុប្បន្ននេះតំបន់អឺរ៉ូកំពុងងាកទៅរកជំនួយហិរញ្ញវត្ថុពីមូលនិធិរូបិយវត្ថុអន្តរជាតិ FMI ដោយហេតុតែមូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុ FESF ដែលកាលពីដំបូងគ្រោងថាមានសមត្ថភាពអាចផ្តល់ប្រាក់កម្ចីបានប្រមាណ៤៤០ពាន់លានអឺរ៉ូ ឥឡូវនេះយល់ដឹងថាពុំអាចបង្កើនសមត្ថភាពរបស់ខ្លួនឲ្យឡើងដល់១ ០០០ពាន់លានអឺរ៉ូដូចសន្យាសម្រាប់ជួយប្រទេសក្នុងតំបន់អឺរ៉ូមានវិបត្តិបានឡើយ។
ដូច្នេះហើយ បានជាវិនិយោគិននាំគ្នារង់ចាំមើលជំនួបកំពូលអឺរ៉ុបត្រូវប្រព្រឹត្តទៅនៅថ្ងៃទី៨និង៩ធ្នូឆ្នាំ២០១១ខាងមុខនេះដែលត្រូវដោះស្រាយពីបញ្ហាថវិកាជាតិនៃប្រទេសក្នុងតំបន់អឺរ៉ូ។ ហើយនិងត្រូវពិនិត្យមើលពីស្ថានភាពនៃប្រទេសក្រិកនិងអ៊ីតាលី ថាតើបានវិវត្តដល់ណា? ហើយថាតើប្រទេសអាល្លឺម៉ង់យល់ព្រមផ្តល់ហិរញ្ញប្បទានច្រើនគ្រប់គ្រាន់សម្រាប់ជួយដោះស្រាយវិបត្តិហិរញ្ញវត្ថុក្នុងតំបន់ដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ