ជនសង្ស័យសម្លាប់មេបក្សប្រឆាំង សារភាពនៅតុលាការ ដោយហេតុរងទារុណកម្មខ្លាំង
នៅរុស្ស៊ី ជនឃាត់ខ្លួនដែល៣ថ្ងៃមុនសារភាពថា បានបាញ់សម្លាប់មេប្រឆាំងម្នាក់ ក្នុងប្រទេស ឥឡូវច្រានចោលការសារភាពនោះ។ “សម្តីសារភាព កាលពីថ្ងៃ៨មីនា របស់ជនជាប់សង្ស័យខ្លាំងជាងគេ ឈ្មោះZaour Dadayev ថាបានប្រព្រឹត្តឃាតកម្មលើរូបមេបក្សប្រឆាំងដ៏ល្បីនៅរុស្ស៊ី លោក បូរិស ញ៉េមសូវ ក្នុងក្រុងម៉ូស្គូ ១២ថ្ងៃមុន តាមមើលទៅ គឺបានត្រូវជននេះបន្លឺចេញមកដោយទ្រាំមិនបាននឹងទារុណកម្មលើរូបកាយគាត់ ពីខាងអាជ្ញាធរ” - សេចក្តីនេះថ្លែងទៅ AFP នៅព្រឹកថ្ងៃពុធនេះ ដោយសមាជិកម្នាក់នៃ “ក្រុមប្រឹក្សាពិគ្រោះខាងសិទ្ធិមនុស្ស” នៅអមវិមានក្រេមឡាំង ដែលបានទៅកាន់មន្ទីរឃុំឃាំងបុរសនោះ។
ចុះផ្សាយនៅថ្ងៃ៖
ស្តាប់ - ០២:០៨
តាមប្រសាសន៍សមាជិកក្រុមប្រឹក្សានោះ លោក Andrei Babouchkine ដែលថ្ងៃអង្គារម្សិលមិញ បានទៅជួបជនឃាត់ខ្លួនជាតិឆេឆេន ឈ្មោះ Zaour Dadayev នៅក្នុងបន្ទប់ឃុំឃាំងនៃពន្ធនាគារម៉ូស្គូ ទាំងអមដំណើរដោយស្ត្រីអ្នកកាសែត Moskovski Komsomolets ជាកាសែតរុស្ស៊ីសែនប្រជាប្រិយ ៖
-មានមូលហេតុ ដែលញ៉ាំងឲ្យជឿទុកចិត្តលើសម្តី Zaour Dadayev ដែលថា គាត់បានសារភាពក្នុងរឿងធ្វើឃាតនោះ គឺក្រោមការរងទារុណកម្មមែនពិត។
-យើងមិនអាចពោលអះអាងថា គាត់បានរងនូវការសួរចម្លើយធ្វើបាបគាត់ឡើយ ប៉ុន្តែយើងបានឃើញនឹងភ្នែក ស្នាមរបួសច្រើនឥតគណនា នៅលើខ្លួនប្រាណគាត់ បែបយ៉ាងស្នាមស្បែករលាត់ ស្នាមជាំឈាមនៅត្រង់ កដៃ និង កជើង ដែលរឹតដោយខ្នោះដៃ ខ្នោះជើង”។
អ្នកការពារសិទ្ធិមនុស្សនៅរុស្ស៊ី លោក Babouchkine បន្ថែមថា ៖ តាមដែលបុរស Zaour Dadayev ជាអតីតប៉ូលិស នៃកងកម្លាំងពិសេសឆេឆេន ដំណាលប្រាប់ពួកអ្នកទៅសួរសុខទុក្ខគាត់ “ក្រោយពីរូបគាត់ត្រូវបានឃាត់ខ្លួនក្នុងសប្តាហ៍មុន អស់ពីរថ្ងៃជាប់ គាត់បានស្ថិតនៅក្នុងស្ថានភាព កាលដែលដៃរបស់គាត់ជាប់ខ្នោះផង និងក្បាលរបស់គាត់គ្របជិតស្លុងផង ដោយស្បោងក្រណាត់។ គឺក្នុងស្ថានភាពនេះ តាមសម្តី Dadayev ដែល គេស្រែកគំហកគ្មានឈប់ទៅគាត់ ទាំងចោទជាសំនួរ តើឯងឬ ដែលជាអ្នកបានបាញ់សម្លាប់លោក ញ៉េមសូវ ? ហើយខ្ញុំ តែងឆ្លើយទៅវិញថា “មិនមែនខ្ញុំទេ”។
តាមលោក Babouchkine ដដែល ៖ បុរស Zaour Dadayev បានចង្អុលឲ្យឃើញថា ពេលគេចាប់ខ្លួនគាត់ នៅលើដែនដីសាធារណរដ្ឋ Ingouchie ជាប់នឹងឆេឆេនី គាត់បានស្ថិតនៅជាមួយមិត្តភ័ក្តិគាត់ ដែលជាសហសេវិកគាត់។ ពួកប៉ូលិស បានសន្យាទៅគាត់ថា បើគាត់សុខចិត្តសារភាព ថាបានធ្វើឃាតលោក ញ៉េមសូវ នោះគេនឹងព្រលែងមិត្តគាត់ឲ្យមានសេរីភាព។ ហើយខ្ញុំក៏យល់ព្រម ទាំងគិតក្នុងចិត្តថា បើអញ្ចឹង ខ្ញុំនឹងជួយសង្គ្រោះមិត្តខ្ញុំមែន។
ជាការកត់សម្គាល់ ការសួរចម្លើយដោយធ្វើបាប ជារឿងធម្មតា នៅក្នុងគុក និង មន្ទីរឃុំឃាំង នៃប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ