គ្រោះធ្លាក់យន្តហោះA៣២០ ៖ តើពីឡុតអមដែលជាអ្នកបញ្ជាយន្តហោះពេលធ្លាក់ជានរណា ?
ក្រោយសេចក្តីជូនដំណឹងរបស់រដ្ឋអាជ្ញាបារាំង ថាអ្នកបើកបរយន្តហោះអម បានបង្ខាំងខ្លួននៅក្នុងបន្ទប់បើកបរតែម្នាក់ឯង និងជាអ្នកបញ្ជាយន្តហោះម្នាក់ឯងឱ្យយន្តហោះGermanwingធ្លាក់មក សំណួរជាច្រើនកំពុងចោទសួរជុំវិញបុគ្គលិកលក្ខណៈរបស់ពីឡុតអមនេះ។ ការអង្កេតកំពុងផ្តុំកម្លាំងលើអតីតកាលរបស់អ្នកបើកបររូបនេះ។ ប៉ូលិសអាល្លឺម៉ង់បានទៅឆែកឆេរផ្ទះទាំងពីររបស់អ្នកបើកបរវ័យក្មេង Andreas Lubitz។ ឯបញ្ហាសុវត្ថិភាពក្នុងបន្ទប់បើកបរក៏កំពុងក្លាយជាប្រធានបទតស៊ូមតិយ៉ាងពុះកញ្ជ្រោល។ ក្រុមហ៊ុនខ្លះ តួយ៉ាងEasyjet បានសម្រេចជាឯកតោភាគី ចេញវិធានការឱ្យមានមនុស្សពីរជាប់ជាប្រចាំក្នុងបន្ទប់បើកបរ។
ចុះផ្សាយនៅថ្ងៃ៖ កែប្រែថ្ងៃទី៖
តាំងពីមហាភេរវកម្មថ្ងៃទី ១១កញ្ញា២០០១ មក អង្គការអាកាសចរណ៍ស៊ីវិលអន្តរជាតិបានតម្រូវ បន្ទប់បើកបរ ត្រូវខណ្ឌដោយទ្វារសុវត្ថិភាព មិនអាចគាស់ទម្លុះបានដោយងាយៗឡើយ និងគ្មានការចេញចូលដោយសេរីពេលកំពុងហោះហើរឡើយ។ ទ្វារសុវត្ថិភាពត្រូវបិទជិតឈឹង។ អ្នកបើកបរត្រូវទទួលទានអាហារ ក្នុងបន្ទប់បើកបរ ហើយអាចដើរចោលកន្លែងបាន តែក្នុងករណីចាំបាច់តែមួយគត់ គឺទៅបន្ទោរបង់។ យន្តហោះAirbusថ្មីៗជំនាន់ក្រោយ មានដាក់បង្គន់និងកន្លែងទម្រេតនៅក្នុងបន្ទប់បើកបរតែម្តង ដើម្បីបញ្ចៀសការបិទបើកទ្វារសុវត្ថិភាព។
ចំពោះការចេញចូលក្នុងបន្ទប់បើកបរវិញ មានតែពីឡុត នៅក្នុងបន្ទប់បើកបរទេ ដែលអាចចុចបើកទ្វារនេះបា។ ពីឡុតមានអេក្រង់ សម្រាប់មើលអត្តសញ្ញាណអ្នកដែលសុំឬចង់ចូលក្នុងបន្ទប់បើកបរ។ មុំអេក្រង់ធំ អាចមើលដឹងបានតើមានមនុស្សម្នាក់ ឬច្រើននាក់ នៅមាត់ទ្វារសុវត្ថិភាព។
សុវត្ថិភាពបន្ទប់បើកបរ
ដើម្បីសុំចូល បុគ្គលិកយន្តហោះត្រូវចុចជាបឋមលេខកូដ នៅខាងក្រៅទ្វារសុវត្ថិភាព។ សំឡេងរោរ៍បានលាន់ឡើងក្នុងបន្ទប់បើកបរ ទើបពីឡុតទាំងពីរ ផ្ទៀងផ្ទាត់មើលមុខអ្នកចុចសុំ ហើយសម្រេចបើកទ្វារឱ្យ ឬមិនឱ្យចូល។ នៅមានលេខកូដ មួយទៀត ជាលេខសម្ងាត់ខ្លាំង (មានមនុស្សតែបីនាក់ស្គាល់) សម្រាប់ប្រើក្នុងករណីបន្ទាន់ ដូចជាអ្នកបើកបរលង់លក់បាត់ស្មារតី ឬពេលមានអ្នកបើកបរនៅតែម្នាក់ឯង ពីឡុតនៅខាងក្រៅអាចត្រលប់ចូលប៉ុស្តិ៍វិញ។ ជាមួយនឹងការចុចលេខកូដសម្ងាត់បន្ទាន់នេះ (បើសិនជាពីឡុតនៅក្នុងគ្មានសមត្ថភាពចុចបើកទ្វារ) ៣០វិនាទីក្រោយទ្វារសុវត្ថិភាពនឹងបើកឯង។ ប៉ុន្តែពីឡុតនៅខាងក្នុង នៅតែអាចធ្វើការសម្រេចចិត្តបានដូចដំណើរការសុំចូលធម្មតា ចុចបើកឱ្យចូល ឬក៏ចុចកុងកាក់បិទទ្វារទាំងស្រុង ពេលនោះទ្វារនឹងបើកដោយស្វ័យប្រវត្តិឡើយ។
នេះហើយជាករណីដែលបានកើតឡើងនៅក្នុងបន្ទប់យន្តហោះA៣២០របស់ក្រុមហ៊ុនGermanwings។ បើតាមប្រសាសន៍រដ្ឋអាជ្ញា ដែលផ្អែកលើសំឡេងថតរបស់ប្រអប់ខ្មៅ ពីឡុតកុម្មង់ដង់ បានសាកល្បងសុំចូលទៅក្នុងបន្ទប់បើកបរវិញ តែមិនបានសម្រេច។ ពីឡុតអម ធ្វើមិនដឹងមិនឮនឹងសំណើរបស់បញ្ជាការ ឬពីប៉ុស្តិ៍កុងត្រូល បញ្ជាយន្តហោះតែម្នាក់ឯងចុះបុកភ្នំ។
តើ Andreas Lubitz ជានរណា និងមានប្រវត្តិយ៉ាងដូចម្តេចខ្លះ ?
ជាយុវជនស្លួតបូត មិនសូវចេះមាត់ក និងមិនធ្លាប់បង្កបញ្ហាអ្វីសោះដល់សង្គម។ នេះបើតាមសំដីសាក្សីជាអ្នកជិតខាង។ មានអាយុ២៨ឆ្នាំ ជាតិអាល្លឺម៉ង់ Andreas Lubitz មានជំនក់ចិត្តខ្លាំងលើការបើកបរយន្តហោះ តាំងពីនៅជំទង់ ចូលចិត្តលេងកីឡានិងការធ្វើដំណើរ។ ក្រោយពីប្រលងជាប់បាក់ឌុប Andreas Lubitz បានចូលរៀនបើកបរយន្តហោះនៅសាលារបស់ក្រុមហ៊ុនLufthansa ក្រុមហ៊ុនអាកាសចរណ៍មេរបស់ក្រុមហ៊ុនGermanwing ហើយបានសម្រេចបំណងប្រាថ្នា ដោយបានក្លាយជាអ្នកបើកបរយន្តហោះដឹកអ្នកដំណើរ នៅឆ្នាំ២០១៣។
អគ្គនាយកក្រុមហ៊ុនLufthansa នាឱកាសសន្និសីទកាសែត ថ្ងៃព្រហស្បតិ៍ម្សិលមិញ បានប្រកាសថា Andreas Lubitz មានសមត្ថភាព១០០%ជាអ្នកបើកបរ ដ៏ពេញលេញ ដែលមិនអាចឱ្យគេចាប់បាននិងយល់បានសោះ ថាហេតុអ្វីបានជាអ្នកបើកបរវ័យក្មេងរូបនេះបែរជាបង្កសោកនាដកម្ម កម្ទេចយន្តហោះបែបនេះ។ គ្មានភស្តុតាង ឬដានអ្វីដែលនាំឱ្យសង្ស័យថា Andreas Lubitz មានពាក់ព័ន្ធនឹងពួកភេរវជនទេ។ នេះបើតាមរដ្ឋមន្ត្រីក្រសួងដឹកជញ្ជូនអាល្លឺម៉ង់។
ប៉ុន្តែមានចម្ងល់មួយ ! ហេតុអ្វីបានជា Andreas Lubitz ផ្អាកការសិក្សា៦ខែ ពេលកំពុងទទួលវគ្គបំពាក់បំប៉នបើកបរយន្តហោះ ?! បើតាមក្រុមហ៊ុនអាកាសចរណ៍នេះជាការសម្ងាត់វេជ្ជសាស្ត្រ ប៉ុន្តែបើតាមប្រភពស្និទ្ធនឹងគ្រួសារ Andreas Lubitz ធ្លាប់មានជំងឺធ្លាក់ទឹកចិត្ត។ កាសែតអាល្លឺម៉ង់ Bild បានបង្ហើបថាពីឡុតអមនេះ មានជំងឺធ្លាក់ទឹកចិត្តធ្ងន់ធ្ងរ កាលពី៦ឆ្នាំមុន និងធ្លាប់បានទទួលការព្យាបាលជំងឺផ្លូវចិត្ត។
ការត្រួតពិនិត្យសុខភាពអ្នកបើកបរយន្តហោះ
គ្រប់គ្នា តក់ស្លុតយ៉ាងខ្លាំង នៅពេលបានឮសម្មតិកម្មថាពីឡុតអម បើកយន្តហោះបុកភ្នំ ដោយចេតនា និងកាន់តែខ្លោចផ្សាទៅទៀត នៅពេលបានទទួលដំណឹងថា Andreas Lubitz មានប្រវត្តិធ្លាប់កើតជំងឺផ្លូវចិត្ត។ រដ្ឋអាជ្ញាបារាំង ក៏ជឿជាក់លើសម្មតិកម្មអត្តឃាត ជាជាងភេរវកម្ម។
អាជីពជាអ្នកបើកបរយន្តហោះសឹងថាទទួលបានតាមដានសុខភាពខ្លាំងជាងមុខរបរផ្សេងទៀតខ្លាំងណាស់។ មុននឹងអាចក្លាយជាអ្នកបើកបរយន្តហោះមានការត្រួតពិនិត្យសុខភាពយ៉ាងច្រើនណាស់ ហើយពេលកំពុងបំពេញការងារ ក៏ដូចគ្នា។ ពីឡុតគ្រប់រូប ត្រូវឆ្លងកាត់វិញ្ញាសាត្រួតពិនិត្យសុខភាព យ៉ាងហោចម្តងក្នុងមួយឆ្នាំ អ្នកខ្លះជារៀងរាល់៦ខែម្តង ដើម្បីតាមដានសុខភាពផ្លូវកាយ ភ្នែក បេះដូង … និងសុខភាពផ្លូវចិត្ត។ Andreas Lubitz ត្រូវបានអាជ្ញាធរអាកាសចរណ៍ស៊ីវិលអាមេរិកចាត់ទុកជាអ្នកបើកបរដែលគួរឱ្យទុកចិត្តជាពិសេស នៅឆ្នាំ២០១៣។
ប៉ុន្តែសុខភាពផ្លូវចិត្ត ជាអ្វីដែលពិបាកមើលនឹងភ្នែក និងជាអ្វីដែលអាចកើតឡើងក្នុងពេលតែមួយប៉ប្រិចភ្នែក។ វិបត្តិផ្លូវចិត្តដែលរុញច្រានឱ្យដល់ការធ្វើអត្តឃាត មិនប្រាកដថាអាចមើលដឹងមុនទេ។ ជួនកាលកើតឡើងដោយភ្លាមៗ ឬដោយហេតុតែមានព្រឹត្តិការណ៍អ្វីមួយក្នុងគ្រួសារ បែកបាក់មិត្តស្រី ឬត្រូវខូចចិត្តរឿងអ្វីមួយ ក៏នាំឱ្យសម្រេចចិត្តផ្តេសផ្តាសភ្លាមពេលនៅម្នាក់ឯង។
ករណីពីឡុតធ្វើអត្តឃាត ជាករណីកម្របំផុត តែក៏ធ្លាប់បាន ពិតជាធ្លាប់កើតមានបីបួនដងហើយ។ អត្តឃាតដែលគេចងចាំខ្លាំងជាងគេ គឺនៅឆ្នាំ១៩៩៩ ពីឡុតអមនៃក្រុមហ៊ុន EgyptAir បានឆ្លៀតពេលពីឡុតកុម្មង់ដង់សម្រាក បានបញ្ជាយន្តហោះម្នាក់ឯងបើកចុះមហាសមុទ្ទ ស្លាប់អ្នកដំណើរអស់ជាងពីររយនាក់។
តាំងពីនោះមកអាជ្ញាធរអាមេរិក បានដាក់កំហិតឱ្យមានមនុស្សពីរនាក់មានវត្តមានជាប់ជាប្រចាំនៅក្នុងបន្ទប់បើកបរ។ វិធានការនេះមិនត្រូវបានអនុវត្តក្នុងគ្រប់ក្រុមហ៊ុនអាកាសចរណ៍ទេ ប៉ុន្តែក្រោយហេតុការណ៍ធ្លាក់យន្តហោះA៣២០របស់ក្រុមហ៊ុនអាល្លឺម៉ង់នេះ ក្រុមហ៊ុនអាកាសចរណ៍អង់គ្លេស Easyjet បានសម្រេចជាឯកតោភាគី ឱ្យមានមនុស្សពីរនាក់ជាប់ជាប្រចាំនៅក្នុងបន្ទប់បើកបរ។ ភ្នាក់ងារសុវត្ថិភាពចរាចរណ៍ផ្លូវអាកាសអឺរ៉ុប ក៏ទំនងជាចេញអនុសាសន៍ក្នុងទិសនេះដែរ ក្នុងពេលឆាប់ៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ