លោកប្រ៊ីស រ៉ូបំាង៖Piloteអម មានចេតនាបំផ្លាញយន្តហោះ
ការស៊ើបអង្កេតជុំវិញគ្រោះថ្នាក់ធ្លាក់យន្តហោះរបស់ក្រុមហ៊ុនអាល្លឺម៉ង់ Germanwings ក្នុងប្រទេសបារំាងកំពុងបន្តធ្វើទៅមុខ។ នៅរសៀលថ្ងៃព្រហស្បតិ៍ ទី២៦ មីនា លោករដ្ឋអាជ្ញាបារំាងប្រ៊ីស រ៉ូបំាង (Brice Robin) ដែលទទួលបន្ទុកការស៊ើបអង្កេតបានធ្វើសន្និសីទកាសែតមួយស្តីពីលទ្ធផលដែលទទួលបានពីការវិភាគលើប្រអប់ខ្មៅមួយដែលមានតួនាទីជាអ្នកថតកិច្ចសន្ទនារវាងអ្នកបើកបរទំាងពីរនាក់នៅក្នុងបន្ទប់អ្នកបើកបរ។ ក្នុងសន្និសីទកាសែតនោះ លោករ៉ូបំាងបានរៀបរាប់ពីកិច្ចសន្ទនារវាង Pilote ទំាងពីរ និងសម្លេងដែលប្រអប់ខ្មៅថតសម្លេងបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
នៅក្នុងរយៈពេល ២០នាទីដំបូង គេបានឮ Pilote ទំាងពីរនាក់និយាយឆ្លើយឆ្លងគ្នាធម្មតា និងយ៉ាងស្និទ្ធស្នាល ដោយគ្មានបញ្ហាអ្វីកើតឡើងទេ។ បន្ទាប់មក គេបានឮសម្តី Pilote commandant បានរៀបចំគម្រោងដើម្បីចុះចតយន្តហោះពេលទៅដល់គោលដៅ។ នៅពេលនោះ សម្តីឆ្លើយតបវិញរបស់ Piloteអមហាក់ដូចជាសោះអង្គើយ។ បន្ទាប់មកទៀត គេបានឮសូរសម្តី Pilote commandant ស្នើឲ្យ Piloteអមជាអ្នកបញ្ជាយន្តហោះ ហើយក្នុងពេលជាមួយគ្នានោះ គេបានឮសូរសម្លេងរំកិលកៅអីថយក្រោយ និងសម្លេងបិទទ្វារ។ ត្រង់ចំណុចនេះនំាឲ្យគេយល់បានថា Pilote commandant បានអវត្តមានពីបន្ទប់បើកបរដើម្បីទៅបង្គន់ ឬក៏ទៅធ្វើអ្វីផ្សេង។
គឺនៅពេលនោះហើយដែល Piloteអមកំពុងស្ថិតតែម្នាក់នៅក្នុងបន្ទប់បើកបរ និងដែលនាឱកាសនោះឯងដែលរូប Piloteអមបានចុចប៊ូតតុងដើម្បីបញ្ចុះយន្តហោះ។ ទង្វើបញ្ជាបញ្ចុះយន្តហោះ គឺជាទង្វើចេតនា។ នៅពេលនោះ គេបានឮការហៅជាច្រើនដង ដោយគោះទ្វារពី Pilote commandant ដែលនៅខាងក្រៅបន្ទប់បើកបរ តែ Piloteអមដែលស្ថិតនៅខាងក្នុងមិនព្រមបើកទ្វារឲ្យ។ បន្ទាប់មកទៀត គេបានឮសូរការដកដង្ហើមធម្មតារបស់រូប Piloteអមនោះ មានន័យថា រូបគេនៅមានជីវិត។ ក្រោយមកទៀត គេបានឮសូរសម្លេងហៅរបស់ប៉ុស្តិ៍ត្រួតពិនិត្យពីអាកាសយានដ្ឋានក្នុងខេត្ត Marseille តែគ្មានចម្លើយពីរូប Piloteអម។ មួយវិញទៀត ប៉ុស្តិ៍ត្រួតពិនិត្យនៅអាកាសយានដ្ឋានក៏មិនបានទទួលសារអាសន្នហៅឲ្យជួយពីយន្តហោះនោះដែរ។
ដូច្នេះ ការដែល Piloteអមមិនព្រមបើកទ្វារឲ្យ Pilote commandant និងការដែល Piloteអមបានចុចប៊ូតតុងបញ្ចុះយន្តហោះពីកម្ពស់ ១២ ០០០ម៉ែត្រមកនៅត្រឹម ២ ០០០ម៉ែត្រតែក្នុងរយៈពេល ៨នាទីដែលគេនៅមិនទាន់ដឹងពីមូលហេតុនោះនំាគេទាញសេចក្តីសន្និដ្ឋានដំបូងថា Piloteអមមានចេតនាបំផ្លាញយន្តហោះនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ