ធ្លាក់យន្តហោះ Germanwings A៣២០៖ អ្នកបើកបរម្នាក់មិនស្ថិតក្នុងបន្ទប់បើកបរទេ នៅពេលយន្តហោះធ្លាក់
នៅក្នុងប្រទេសបារំាង ២ថ្ងៃក្រោយការធ្លាក់យន្តហោះ A៣២០ របស់ក្រុមហ៊ុនអាល្លឺម៉ង់ Germanwings មក ប្រអប់ខ្មៅមួយដែលគេរកឃើញបានផ្តល់ព័ត៌មានឲ្យដឹងថា មានអ្នកបើកបរម្នាក់មិនបានស្ថិតនៅក្នុងបន្ទប់បើកបរទេ នៅពេលយន្តហោះនោះធ្លាក់។ តាមការស្តាប់ខ្សែអាត់សម្លេងដែលប្រអប់ខ្មៅថតបានឲ្យដឹងថា ក្រោយពីយន្តហោះបានហោះឡើងបន្តិច មានអ្នកបើកបរម្នាក់បានងើបដើរចេញពីបន្ទប់បើកបរ រួចបែរជាមិនអាចត្រឡប់ចូលវិញបានទេក្នុងពេលដែលយន្តហោះកំពុងបន្ទាបខ្លួនចុះយ៉ាងគំហុក។ ដោយឡែក ក្រុមអ្នកស៊ើបអង្កេតកំពុងបន្តស្វែងរកប្រអប់ខ្មៅទី២ របស់យន្តហោះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
គឺជាព័ត៌មានមួយដែល AFP ទទួលបានពីប្រភពស្និទនឹងការស៊ើបអង្កេត ពិសេសទាក់ទងនឹងសម្លេងដែលប្រអប់ខ្មៅថតបាន។ លទ្ធផលដំបូងផ្តល់ដោយប្រអប់ខ្មៅដែលមានតួនាទីជាអ្នកថតសម្លេង ព្រមកិច្ចសន្ទនារវាងអ្នកបើកបរទំាងពីរនាក់ឲ្យដឹងថា នៅពេលយន្តហោះបានហើរឡើងដំបូង គេឮសូរសម្លេងរំកិលកៅអីថយក្រោយ រួចឮសូរសម្លេងបើកទ្វារ រួចបិទទ្វារ។ បន្តិចក្រោយមក គេបានឮស្នូរសម្លេងគោះទ្វារ ហើយនៅពេលនោះ ក៏លែងមានកិច្ចសន្ទនាអ្វីទំាងអស់រវាងអ្នកបើកបររហូតដល់យន្តហោះនោះធ្លាក់។ តាមរយៈខ្សែអាត់សម្លេងពីប្រអប់ខ្មៅនេះនំាឲ្យគេសន្និដ្ឋានបានថា មានអ្នកបើកបរម្នាក់បានងើបដើរចេញពីបន្ទប់បើកបរទៅក្រៅ រួចបានព្យាយាមត្រឡប់ចូលមកវិញ តែមិនអាចបើកទ្វារបាន។
អ្វីដែលគេមិនទាន់អាចដឹងនោះគឺថា តើអ្នកបើកបរមួយណាដែលបានងើបដើរចេញពីបន្ទប់បើកបរ តើជា Pilote commandant ឬមួយក៏ជា Pilote អម និងថា តើមានមូលហេតុអ្វីបានជាអ្នកបើកបរម្នាក់នោះបានក្រោកដើរចេញពីកៅអីរបស់ខ្លួន។ អ្វីដែលគេដឹង អ្នកបើកបរទំាងពីរនាក់និយាយភាសាអាល្លឺម៉ង់។ បើយោងតាមក្រុមហ៊ុនមេរបស់ក្រុមហ៊ុន Germanwings គឺក្រុមហ៊ុន Lufthansa ឲ្យដឹងថា រូប Pilote អម បានចូលធ្វើការក្នុងក្រុមហ៊ុនតំាងពីឆ្នំា ២០១៣ និងធ្វើការហោះហើរបានជាង ៦០០ម៉ោង។ ដោយឡែក ក្រៅពីឮសូរសម្លេងទាញកៅអីថយក្រោយ និងស្នូរបើក បិទទ្វាររបស់បន្ទប់បើកបរ ប្រអប់ខ្មៅក៏បានផ្តល់ស្នូរសម្លេងអាសន្នដែលបញ្ជាក់ពីយន្តហោះស្ថិតក្បែរដីដែរ។
អ្វីជាការកត់សម្គាល់ ព័តមាននេះបានបញ្ជាក់ដូចគ្នាទៅនឹងព័ត៌មានលើកឡើងដោយកាសែតអាមេរិកំាង New York Times ដែលចុះផ្សាយសម្តីអ្នកស៊ើបអង្កេតម្នាក់ដែលថា នៅក្នុងប្រអប់ខ្មៅនោះ គេបានឮសូរសម្លេងការព្យាយាមវាយទ្វារបន្ទប់អ្នកបើកបរ។ គួររម្លឹកជូនថា តំាងពីក្រោយមហាភេរវកម្មថ្ងៃ១១ កញ្ញា ២០០១ មក ទ្វារបន្ទប់អ្នកបើកបរយន្តហោះត្រូវចាក់សោពីខាងក្នុងដើម្បីចៀសវាងទង្វើចូលគំរាមអ្នកបើកបរក្នុងគោលដៅពង្វាងយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ