បារាំងរងគ្រោះភេវរកម្មជីហាតកាត់-ក ជាលើកទីមួយនៅក្នុងប្រទេស
ប្រទេសបារាំង នៅថ្ងៃសុក្រ ទី ២៦ មិថុនា ២០១៥ នេះ បានរងគ្រោះភេរវកម្មជីហាតជាថ្មីមួយទៀត។ ជា ការវាយប្រហារភេរវកម្ម បែបឃោរឃៅដូចទង្វើរបស់ពួកអង្គការរដ្ឋអ៊ីស្លាម ដោយមានជនរងគ្រោះម្នាក់ ត្រូវកាត់ក និងមានមនុស្សពីរនាក់រងគ្រោះ ក្រោយសំឡេងផ្ទុះ។ ភេរវជនសង្ស័យ ដែលធ្លាប់មានឈ្មោះក្នុងបញ្ជីខ្មៅអ៊ីស្លាមជ្រុលនិយមត្រូវចាប់ខ្លួនបាន ក្រោយការកើតហេតុបន្តិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ហេតុការណ៍ភេរវកម្មបានផ្ទុះឡើងនៅវេលាម៉ោង ១០ព្រឹក ក្នុងតំបន់រោងចក្រឧស្សាហកម្មឧស្ម័នមួយ ក្បែរក្រុងលីយ៉ុង ក្រុងដ៏ធំទីបីរបស់បារាំង។ បើតាមប្រភពព័ត៌មានបឋម ភេរវជនបានបើករថយន្តកាមីញ៉ុងតូចមួយ សំដៅបុកអាគារក្រុមហ៊ុន ឱ្យចំធុងហ្កាស ជាហេតុបង្កឱ្យមានការផ្ទុះឆេះឡើង។ មនុស្សពីរនាក់បានរងរបួស ហើយនៅក្បែរនោះគេប្រទះឃើញ សាកសពមនុស្សម្នាក់ដាច់ក រុំដោយទង់ជាតិសរសេរជាភាសាអារ៉ាប។ ជនរងគ្រោះនេះជាប្រធានក្រុមហ៊ុនដឹកជញ្ជូនម្ចាស់ឡានដែលភេរវជនបើកបំផ្ទុះ។
ភេរវជនសង្ស័យម្នាក់ ដែលចាប់ខ្លួនបានភ្លាម មានឈ្មោះ យ៉ាស៊ីន សាលី អាយុ៣៥ឆ្នាំ ធ្លាប់មានឈ្មោះក្នុងបញ្ជីជនអ៊ីស្លាមជ្រុលនិយមសាឡាហ្វីស នៅពីឆ្នាំ២០០៦មក តែមិនបានសើរើតាំងពីឆ្នាំ២០០៨មក និងគ្មានប្រវត្តិជាប់ទោសទេ។ មនុស្សពាក់ព័ន្ធជាច្រើននាក់ផ្សេងទៀតត្រូវឃាត់ខ្លួន ក្នុងនោះមានម្នាក់គឺជាប្រពន្ធ និងប្អួនស្រី របស់យ៉ាស៊ីនសាលីផង។
បើតាមប្រធានាធិបតីបារាំង លោក ហ្វ្រង់ស័រហូឡង់ ដែលបានរួសរាន់ចាកចេញពីជំនួបប្រជុំអឺរ៉ុប ត្រលប់មកក្រុងប៉ារីសវិញ ដើម្បីដឹកនាំកិច្ចប្រជុំបន្ទាន់ ភេរវជនទំនងជាមានគ្នាយ៉ាងហោចពីរនាក់។ ភេរវកម្មដ៏ឃោរឃៅនៅបារាំងលើកនេះ ផ្ទុះឡើងក្នុងខណៈដែលមានភេរវកម្មផ្ទុះឡើងដែរនៅទុយនីស៊ី មានស្លាប់២៧នាក់ ខ្លះជាទេសចរបារាំងផង និងចំពេលដែលបណ្តាជនអ៊ីសា្លមកំពុងប្រារព្ធពិធីតមអាហារតាមបែបសាសនាទៀត និងក្រោយមហាភេរវកម្មក្រុងប៉ារីសតែ៦ខែប៉ុណ្ណោះ។
នាយករដ្ឋមន្ត្រីបារាំងដែលកំពុងបំពេញការងារនៅអាមេរិកខាងត្បូង ក៏បានបង្ខើចទស្សនកិច្ចរបស់ខ្លួន បានបញ្ជាពីចម្ងាយឱ្យគ្រប់សមត្ថកិច្ចពាក់ព័ន្ធពង្រឹងសន្តិសុខក្នុងតំបន់ឧស្សាហកម្មហ្កាសដ៏រសើប។ ប្រមុខដឹកនាំអាល្លឺមង់ អេស្ប៉ាញបានបញ្ចេញប្រតិកម្មរួមដៃជាមួយបារាំងប្រយុទ្ធប្រឆាំងដាច់ខាតនឹងអំពើភេរវនិយម។ អ្នកនយោបាយបារាំងគ្រប់ពណ៌សម្បុរក៏មិនបង្អង់នឹងថ្កោលទោសទង្វើភេរវកម្មនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ