យោធាតួកគីស្លាប់អស់៣នាក់ ដោយការវាយប្រហារអចេតនានៃកងអាកាសរុស្ស៊ី
ការវាយប្រហារនៃកងអាកាសរុស្ស៊ី នៅប៉ែកខាងជើងប្រទេសស៊ីរី បានបណ្តាល ឲ្យយោធាតួកគី ធ្លាក់ខ្លួនស្លាប់អស់៣នាក់ ហើយស្លាប់នេះ គឺមកពីកំហុស នៃទីបញ្ជាការកងទ័ព តួកគី ដែលបានផ្តល់ទិន្នន័យមិនត្រឹមត្រូវ អំពីកន្លែងស្ថិតនៅនៃពួកភេរវជនអង្គការរដ្ឋអ៊ីស្លាម សេចក្តីនេះ ថ្លែងរសៀលម្សិលមិញ ដោយអ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ។
ចុះផ្សាយនៅថ្ងៃ៖
ឧប្បត្តិហេតុបានកើតឡើងព្រឹកថ្ងៃ៩កុម្ភៈ ក្នុងប្រតិបត្តិការវាយប្រហារ ពីអាកាស ទៅលើ ទីតាំងពួកភេរវជននៃអង្គការរដ្ឋអ៊ីស្លាមនៅតំបន់ខាងជើងប្រទេសស៊ីរី។ ជាគ្រោះកាចអភ័ព្វតែម្តង ដែលកងកម្លាំងរុស្ស៊ី ដោយបំពេញប្រតិបត្តិការវាយប្រហារនោះ គឺពឹងផ្អែកលើទិន្នន័យផ្តល់ដោយកងទ័ពតួកគី ជាដៃគូយើង អំពីទីតាំងនៃពួកភេរវជន ហើយ មិនបាននឹកស្មានឡើយ ថា ពេលនោះឯង ក្នុងផ្ទៃក្រឡាដែលយើងវាយប្រហារ ស្រាប់តែ មាន យោធាតួកគីស្ថិតនៅ ម៉្លោះហើយបានជា ប្រព្រឹត្តទៅ ជាការវាយប្រហារអចេតនាបែបនេះ សេចក្តីខាងលើថ្លែង ម្សិលមិញ ទៅពួកអ្នកកាសែត តាមស្ពានទូរទស្សន៍ ដោយ អ្នកនាំពាក្យ របស់ប្រមុខរដ្ឋរុស្ស៊ី លោក ឌ្មីទ្រី ពេស្កូវ ដែលបានបន្ថែមថា មូលហេតុ គឺមកពីមានចំណុចខ្វះខាត ក្នុងការសម្របយោបល់គ្នា។
លោកប្រធានាធិបតីរុស្ស៊ី ពូទីន បានសំដែងតាមទូរស័ព្ទ នូវ ការរួមមរណៈទុក្ខជូន សមភាគីតួកគី លោក អ៊ែរដូហ្កាន់ ចំពោះ ការស្លាប់ដោយចៃដន្យអាក្រក់ នៃ យោធាតួកគី៣នាក់នោះ។ ពេល ពិភាក្សាគ្នា តាមទូរសព្ទនោះ ប្រមុខរដ្ឋទាំងពីរ សម្រេចថា បង្កើនសហប្រតិបត្តិការយោធា រវាង រុស្ស៊ី និង តួកគី នៅតាមទិសប្រយុទ្ធទល់នឹងអង្គការរដ្ឋអ៊ីស្លាមនៅលើដែនដីស៊ីរី។ ចំណែកលោកឧបនាយករដ្ឋមន្ត្រីតួកគី Numan Kurtulmus ពេលថ្លែងម្សិលមិញ នៅពីមុខ ពួក អ្នកកាសែត ក្នុងក្រុងមួយប៉ែកខាងលិចប្រទេស ហាក់បីចែករំលែកមតិមូស្គូ អំពីឧប្បត្តិហេតុនេះ បានប្រកាសថា សំខាន់ គឺលោកប្រធានាធិបតីពូទីន បានសំដែងការរួមមរណៈទុក្ខទៅហើយ។
តាមសំដីគាត់ ការអង្កេតត្រួសៗជាមុន ធ្វើដោយតួកគី បង្ហាញឲ្យឃើញថា ឧប្បត្តិហេតុអចេតនា ដែលកើតឡើង បណ្តាលមកពី ការផ្តល់ពត៌មានមិនត្រឹមត្រូវ ដូច្នេះ គឺ ចាំបាច់ត្រូវតែសម្រប សម្រួល សកម្មភាពគ្នាឲ្យកាន់តែដិតដល់ឡើង បូកទាំងជាមួយសម្ព័ន្ធប្រទេសដែលនាំមុខដោយ ស.រ.អា.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ