បារាំងគ្រោងចំណាយជិត៣០០ពាន់លានអឺរ៉ូលើវិស័យការពារជាតិពីឆ្នាំ២០១៩ដល់២០២៥
រដ្ឋាភិបាលរបស់លោកអេម៉ានុយអែល ម៉ាក្រុង គ្រោងនឹងបង្កើនការចំណាយក្នុងវិស័យការពារជាតិបារាំង រហូតទៅដល់ទៅជិត ៣០០ពាន់លានអឺរ៉ូ នៅក្នុងរយៈពេល ៦ឆ្នាំ ខាងមុខ គឺពីឆ្នាំ២០១៩ រហូតទៅដល់ឆ្នាំ២០២៥។ ការបង្កើនថវិកាការពារជាតិដ៏ច្រើនសន្ធឹកសន្ធាប់នេះ ត្រូវធ្វើឡើង ក្រោយពីមានការកាត់បន្ថយជាបន្តបន្ទាប់ កាលពីប៉ុន្មានឆ្នាំកន្លងទៅ។
ចុះផ្សាយនៅថ្ងៃ៖
កញ្ចប់ថវិកាការពារជាតិថ្មីនេះ ត្រូវបានដាក់បញ្ចូលទៅក្នុងរបៀបវារៈ នៃកិច្ចប្រជុំគណៈរដ្ឋមន្រ្តីបារាំង នៅថ្ងៃព្រហស្បតិ៍នេះ ហើយបើយោងតាមលោកអេម៉ានុយអែល ម៉ាក្រុង ការបង្កើនកញ្ចប់ថវិកាការពារជាតិដ៏ច្រើនសន្ធឹកសន្ធាប់មិនធ្លាប់មាននេះ គឺក្នុងគោលដៅធ្វើយ៉ាងណា ឲ្យការចំណាយក្នុងវិស័យការពារជាតិកើនឡើងដល់ ២% នៃផលិតផលក្នុងស្រុកសរុប នៅឆ្នាំ២០២៥ ស្របទៅតាមកាតព្វកិច្ចរបស់បារាំង ក្នុងនាមជាសមាជិកបក្សសម្ព័ន្ធអូតង់។
គួរបញ្ជាក់ថា នៅក្នុងរយៈពេលជាច្រើនឆ្នាំកន្លងទៅនេះ នៅក្នុងបរិបទនៃវិបត្តិសេដ្ឋកិច្ច បារាំងតែងតែបានធ្វើការកាត់បន្ថយការចំណាយក្នុងវិស័យការពារជាតិជាបន្តបន្ទាប់ ជាពិសេស តាមរយៈការកាត់បន្ថយការទិញបរិក្ខាកងទ័ព និងការកាត់បន្ថយបុគ្គលិកយោធា រហូតដល់ទៅ ៦ម៉ឺននាក់ ក្នុងចន្លោះពីឆ្នាំ២០០៥ ដល់ឆ្នាំ២០១៥កន្លងទៅ។ ការកាត់បន្ថយថវិកាការពារជាតិ ដែលជាដើមហេតុដែលធ្វើឲ្យមានភាពចម្រូងចម្រាសជារឿយៗ រវាងរដ្ឋាភិបាល និងស្ថាប័នកងទ័ព ហើយរហូតធ្វើឲ្យនាយអគ្គសេនាធិការកងទ័ពលាឈប់ពីតំណែង កាលពីខែកក្កដា ឆ្នាំទៅមិញ ដោយសារតែមានទំនាស់ជាមួយលោកប្រធានាធិបតីម៉ាក្រុង ជុំវិញការកាត់បន្ថយថវិកាយោធានេះ។
ប្រតិកម្មទៅនឹងដំណឹងស្តីពីការបង្កើនថវិកាការពារជាតិនេះ អតីតនាយអគ្គសេនាធិការកងទ័ព ដែលលាឈប់ពីតំណែងកាលពីឆ្នាំទៅមិញ បានបង្ហាញនូវភាពប្រយ័ត្នប្រយែង ដោយបានលើកឡើងថា តាមបទពិសោធន៍កាលពីពេលកន្លងមក ទាក់ទងនឹងកញ្ចប់ថវិកាការពារជាតិនេះ រដ្ឋាភិបាលច្រើនតែសន្យាហើយ តែមិនអនុវត្តបានពេញលេញទៅតាមការសន្យា។
កញ្ចប់ថវិកាការពារជាតិដែលគណៈរដ្ឋមន្រ្តីបារាំងកំពុងពិភាក្សានៅពេលនេះ ផ្តោតជាសំខាន់ទៅលើចំណុចសំខាន់បី។
ទីមួយ គឺការបង្កើនបុគ្គលិកទ័ព ដែលគ្រោងនឹងជ្រើសរើសថ្មីប្រមាណជា ៦ពាន់នាក់ ដោយផ្តោតអាទិភាពជាពិសេសទៅលើផ្នែកចារកិច្ច និងសន្តិសុខនៃប្រព័ន្ធអ៊ីនធ័រនែត។
ចំណុចសំខាន់ទីពីរ គឺការធ្វើទំនើបកម្មនៃបរិក្ខាកងទ័ព ដោយនឹងផ្តោតអាទិភាពជាពិសេសលើការជំនួសបរិក្ខាយោធាចាស់ៗ ព្រមទាំងការបង្កើនបរិក្ខាយោធាដែលចាំបាច់ក្នុងវិស័យចារកិច្ច រួមមានដូចជា ផ្កាយរណប ដ្រូន និងយន្តហោះឈ្លបយកការណ៍ ជាដើម។
ចំណុចសំខាន់ទី៣ គឺផ្តោតលើចក្ខុវិស័យយោធាសម្រាប់រយៈពេលវែង តាមរយៈការសិក្សាលើលទ្ធភាពក្នុងការផលិតនាវាផ្ទុកយន្តហោះថ្មី ដើម្បីជំនួសនាវាផ្ទុកយន្តហោះតែមួយគត់ ដែលបារាំងមាននៅក្នុងពេលបច្ចុប្បន្ន ព្រមទាំងការសិក្សាពីបច្ចេកវិទ្យាទំនើបថ្មី សម្រាប់ផលិតយន្តហោះចម្បាំង និងរថក្រោះ ដែលអាចសម្របខ្លួនទៅតាមការវិវឌ្ឍនៃប្រតិបត្តិការយោធាទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ