សម្តេចប៉ាបហ្រ្វង់ស័រអំពាវនាវឲ្យចាត់វិធានការជាក់ស្តែង និងមានប្រសិទ្ធភាពប្រឆាំងការរំលោភផ្លូវភេទលើកុមារ
បុរីវ៉ាទីកង់បើកជំនួបកំពូលរយៈពេល ៣ថ្ងៃកន្លះដោយមានការចូលរួមពីមន្រ្តីសង្ឃ និងប្រមុខសង្ឃកាតូលិកមកពីគ្រប់ជ្រុងជ្រោយក្នុងលោកចំនួន ១៩០អង្គ។ ជំនួបកំពូលនេះបានធ្វើឡើង ចំពេលដែលរឿងអាស្រូវរំលោភផ្លូវភេទលើកុមារពីសំណាក់មន្រ្តីសង្ឃកាតូលោកកំពុងផ្ទុះឡើងយ៉ាងផុសផុលនៅតាមវិហារកាតូលិកក្នុងប្រទេសមួយចំនួន។ មានបន្ទូលបើកជំនួបកំពូលជាផ្លូវការក្នុងថ្ងៃព្រហស្បតិ៍ ទី២១ កុម្ភៈ ប្រមុខសង្ឃកាតូលិកសម្តេចប៉ាបហ្រ្វង់ស័របានអំពាវនាវឲ្យចាត់វិធានការជាក់ស្តែង និងមានប្រសិទ្ធភាពប្រឆាំងនឹងការបំពានផ្លូវភេទលើកុមារ។
ចុះផ្សាយនៅថ្ងៃ៖
ស្តាប់ - ០២:០៤
« ប្រជាជននៅទូទាំងពិភពលោកកំពុងសម្លឹងមើលយើង និងកំពុងរង់ចាំពីយើងនូវវិធានការជាក់ស្តែង និងមានប្រសិទ្ធភាព ពោលមិនមែនតែសម្តីថ្កោលទោសធម្មតាទេ » នេះជាបន្ទូលរបស់ប្រមុខសង្ឃកាតូលិកសម្តេចប៉ាបហ្រ្វង់ស័រនាឱកាសបើកជំនួបកំពូល។ វិធានការជាក់ស្តែង និងមានប្រសិទ្ធភាពដែលសម្តេចប៉ាបចង់បញ្ជាក់ គឺវិធានការប្រឆាំងនឹងទង្វើរំលោភផ្លូវភេទលើកុមារពីមន្រ្តីសង្ឃកាតូលិក។ នៅក្នុងន័យនេះ សម្តេចប៉ាបបានស្នើដល់មន្រ្តីសង្ឃ និងប្រមុខសង្ឃកាតូលិកទាំង ១៩០អង្គក្នុងលោកដែលបានចូលរួមនៅជំនួបកំពូលពេលនេះឲ្យស្តាប់សម្រែករបស់កុមាររងគ្រោះដែលកំពុងទាមទាររកយុត្តិធម៌។
គួររម្លឹកថា ជំនួបកំពូលនៅបុរីវ៉ាទីកង់ពេលនេះបានធ្វើឡើង ចំពេលដែលរឿងអាស្រូវរំលោភផ្លូវភេទលើកុមារនៅតាមវិហារកាតូលិកពីសំណាក់មន្រ្តីសង្ឃកាតូលិកបានផ្ទុះឡើងយ៉ាងផុសផុលពេញមួយឆ្នាំ ២០១៨ នៅតាមប្រទេសមួយចំនួនក្នុងលោក ដូចយ៉ាងនៅឈីលី សហរដ្ឋអាមេរិក អាល្លឺម៉ង់ ឬមួយនៅក្នុងប្រទេសបារាំង។ ជំនួបកំពូលពេលនេះមានគោលដៅដាស់ស្មារតីដល់មន្រ្តីសង្ឃ និងប្រមុខសង្ឃកាតូលិកនៅទូទាំងពិភពលោកឲ្យទទួលស្គាល់ពីការទទួលខុសត្រូវ និងពីកតាព្វកិច្ចរបស់ខ្លួន។ នៅក្នុងន័យនេះ សម្តេចប៉ាបអំពាវនាវដល់មន្រ្តីសង្ឃ និងប្រមុខសង្ឃកាតូលិកគ្រប់រូបឲ្យជួបជជែកគ្នាដោយស្មោះត្រង់ ស៊ីជម្រៅ និងមានលក្ខណៈជាសង្ឃកាតូលិកដើម្បីប្រឆាំងទប់នឹងទង្វើរំលោភផ្លូវភេទលើកុមារ។
គេនៅមិនទាន់ដឹងថា តើជំនួបកំពូលពេលនេះនឹងអាចជួយស្រោចស្រង់កិត្តិនាម និងសេចក្តីថ្លៃថ្នូររបស់បុរីវ៉ាទីកង់ ពិសេសសម្តេចប៉ាបបានកម្រិតណាទេ។ តែគ្រប់គ្នាបានយល់ឃើញថាយ៉ាងហោចណាស់ ជំនួបកំពូលមួយនេះក៏អាចចូលរួមដាស់ និងពញ្ញាក់ស្មារតីរបស់មន្រ្តី ឬប្រមុខសង្ឃកាតូលិកដែលបានប្រព្រឹត្តកំហុសឆ្គងនាពេលកន្លងមកដែរ។ ដោយឡែក មានមន្រ្តីសង្ឃ និងប្រមុខសង្ឃកាតូលិកមួយចំនួនបានទាមទារឲ្យបុរីវ៉ាទីកង់គិតគូរធ្វើកំណែទម្រង់លើច្បាប់មួយចំនួនដើម្បីឆ្លើយតបនឹងស្ថានការណ៍ជាក់ស្តែងនាពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ