កាសែតអង់គ្លេសបង្ហាញឈ្មោះមេពេជ្ឈឃាតជីហាត ដែលទទួលខុសត្រូវលើការប្រហារជីវិតចំណាប់ខ្មាំង
នាយករដ្ឋមន្រ្តីអង់គ្លេស លោកដាវីដ កាមឺរូន កាលពីថ្ងៃសុក្រទី ២៧ បានចេញមុខ ការពារទីភ្នាក់ងារស៊ើបការណ៍សម្ងាត់អង់គ្លេស បន្ទាប់ពីប្រព័ន្ធផ្សព្វផ្សាយអង់គ្លេស និងអាមេរិកបានចុះផ្សាយថា មេពេជ្ឈឃាតនៃក្រុមជីហាតរបស់អង្គការរដ្ឋអ៊ីស្លាម ដែលមានឈ្មោះមូហាមេដ អេមវ៉ាហ្ស៊ី តាមពិតធ្លាប់ស្ថិតនៅក្នុងបញ្ជីតាមដានរបស់ទីភ្នាក់ងារស៊ើបការណ៍សម្ងាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
មួយថ្ងៃក្រោយ ប្រព័ន្ធផ្សព្វផ្សាយអង់គ្លេស និងអាមេរិកចុះផ្សាយព្រោងព្រាត បញ្ជាក់អត្តសញ្ញាណរបស់មេពេជ្ឈឃាត ជីហាត នាយករដ្ឋមន្រ្តីអង់គ្លេស លោកដាវីដ កាមឺរ៉ូន បានប្រកាសនៅក្នុងសន្និសីទកាសែត កាលពីថ្ងៃសុក្រ ថា រដ្ឋាភិបាលរបស់លោកនឹងធ្វើការជាមួយប៉ូលិស និងភ្នាក់ងារស៊ើបការណ៍សម្ងាត់របស់អង់គ្លេស ដើម្បីតាមចាប់មេឧក្រិដ្ឋជនដៃដល់។
ប្រព័ន្ធផ្សព្វផ្សាយអង់គ្លេស ដូចជាBBC The Guardian និងកាសែតអាមេរិក The Washington Post ឬThe New York Timesជាអ្នកទម្លាយឈ្មោះ មេពេជ្ឈឃាតដែលគេតែងតែឃើញនៅក្នុងវីដេអូប្រហារជីវិតអ្នកកាសែត អាមេរិកាំង អ្នកធ្វើការមនុស្សធម៌អង់គ្លេស និងចុងក្រោយ អ្នកកាសែតជប៉ុន ដែលពួកជីហាតចាប់ធ្វើជាចំណាប់ខ្មាំង។
ក្នុងសម្លៀកបំពាក់ខ្មៅ បិទមុខជិត និងឈរកាន់កាំបិតសស្ញាច គំរាមអារក ចំណាប់ខ្មាំងពាក់អាវពណ៌ទឹកក្រូច Jihadi John ដែលនិយាយអង់គ្លេស តាមរបៀបអ្នកទីក្រុងឡុងដ៍ ត្រូវកាសែតជឿថា មានឈ្មោះ ពិតប្រាកដមូហាមេដ អេមវ៉ាហ្ស៊ី។ មានដើមកំណើតជាជនជាតិកូវ៉ែត និងរស់នៅក្នុងទីក្រុងឡុងដ៍ តាំងពីអាយុ ៦ឆ្នាំ មូហាមេដ អេមវ៉ាហ្ស៊ីធ្លាប់បានទទួលសញ្ញាប័ត្រ ព័ត៌មានវិទ្យាពីសកលវិទ្យាល័យ Westminster មុននឹងទៅចូលរួមជាមួយពួកជីហាត នៅប្រទេសស៊ីរី។
តាមអង្គការការពារសិទ្ធិអ្នកកាន់សាសនាអ៊ីស្លាម ឈ្មោះ Cage មូហាមេដ អេមវ៉ាហ្ស៊ីអាចចុះចូលជាមួយក្រុមអ៊ីស្លាមជ្រុលនិយម បន្ទាប់ពីរងការដាក់សំពាធ និងការប្រមាថមើលងាយពីភ្នាក់ងារស៊ើបការណ៍សម្ងាត់អង់គ្លេស។ តាមអង្គការCage ភ្នាក់ងារសម្ងាត់អង់គ្លេសបានព្យាយាមរើសបញ្ចូលមូហាមេដ អេមវ៉ាហ្ស៊ី ឲ្យធ្វើជាចារកិច្ចរបស់ខ្លួន ប៉ុន្តែ មិនបានសម្រេច។ នេះសបញ្ជាក់ឲ្យឃើញថា មូហាមេដ អេមវ៉ាហ្ស៊ីធ្លាប់ស្ថិតក្នុងបញ្ជីតាមដាន យូរមកហើយ របស់ទីភ្នាក់ងារស៊ើបការណ៍សម្ងាត់។ ប៉ុន្តែ កាសែតអង់គ្លេស និងអាមេរិក ចោទសួរថា ហេតុអ្វីជាគេបណ្តោយឲ្យមូហាមេដ អេមវ៉ាហ្ស៊ីអាចធ្វើដំណើរទៅប្រយុទ្ធកៀកស្មាជាមួយក្រុមជីហាត នៃអង្គការរដ្ឋអ៊ីស្លាម នៅស៊ីរីបានទៀត?
នៅក្រោយការចុះផ្សាយរិះគន់របស់កាសែត ប៉ូលិសអង់គ្លេសបានបដិសេធមិនធ្វើអត្ថាធិប្បាយដោយលើកហេតុផល ថា គេកំពុងដំណើរការស៊ើបអង្កេតរកអត្តសញ្ញាណពិតប្រាកដរបស់មេពេជ្ឈឃាត Jihadi John។ តាមវិទ្យាស្ថាន អង់គ្លេស មួយក្នុងទីក្រុងឡុងដ៍ មានជនជាតិអង់គ្លេស ៧០០នាក់ដែលប្រយុទ្ធសម្រាប់ក្រុមជីហាត ក្នុងទឹកដីស៊ីរី និងអ៊ីរ៉ាក់។ ពួកគេទាំងនោះបានចូលរួមប្រយុទ្ធ ស៊ុបក្នុងសង្រ្គាម ដោយអាចទទួលយកបេសកកម្ម ជាភេរវជនអត្តឃាត អ្នកចាប់ជំរិតមនុស្ស ឬជាមេពេជ្ឈឃាត។
អ្នកជំនាញយោធាជាច្រើន ដែលសុំមិនបញ្ចេញឈ្មោះបាននិយាយថា គេពិបាកនឹងអន្តរាគមន៍យោធាលើសមរភូមិប្រយុទ្ធ ដើម្បីចាប់មេពេជ្ឈឃាតជនជាតិអង់គ្លេស យកកាត់ទោសតាមច្បាប់។ ប៉ុន្តែ អ្វីដែលគេដឹង នៅពេលនេះ ជនអាវខ្មៅ បិទមុខJihadi John ដែលត្រូវគេស្គាល់ឈ្មោះ មូហាមេដ អេមវ៉ាហ្ស៊ីនឹងមិនអាចធ្វើដំណើរដោយស្រួល ចូលក្នុងទឹកដីអង់គ្លេសវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ