វិបត្តិសេដ្ឋកិច្ច និងនយោបាយផ្តាច់ការអាចធ្វើឲ្យអំណាចប្រធានាធិបតីតួកគី រង្គោះរង្គើ
នៅថ្ងៃអាទិត្យទី ៧មិថុនា ប្រជាជនតួកគី ប្រមាណ ៥៤លាននាក់ ត្រូវទៅបោះឆ្នោតជ្រើសរើសសមាជិកសភាតំណាងរាស្រ្ត។ ក្រៅតែពីបញ្ជាក់ចំនួនកៅអីរបស់គណបក្សកាន់អំណាចនៅសភា លទ្ធផលបោះឆ្នោតសភា នៅតួកគីដើរតួសំខាន់ផងដែរ ក្នុងការកំណត់អនាគតអំណាចប្រធានាធិបតីតួកគី លោករេស៊ិប តាយ៊ីប អ៊ែរដូហ្គាន ដែលបានដឹកនាំរដ្ឋាភិបាលតួកគី អស់១៣ឆ្នាំមកហើយ។
ចុះផ្សាយនៅថ្ងៃ៖
ស្តាប់ - ០២:២២
ការបោះឆ្នោតសភា នៅតួកគី នៅឆ្នាំ ២០១៥ នេះ ដើរតួនាទីសំខាន់ ជាងការបោះឆ្នោតណាៗទាំងអស់។ លើកនេះ គណបក្សកាន់អំណាចរបស់លោកប្រធានាធិបតី រេស៊ិប តាយ៊ីប អ៊ែរដូហ្គាន ចង់យកការបោះឆ្នោតសភា ទៅបំរើមហិច្ឆតា ប្រមូលផ្តុំអំណាចនៅលើប្រធានាធិបតី។ លោកប្រធានាធិបតី អ៊ែរដូហ្គាន រំពឹងថា គណបក្សកាន់អំណាចរបស់លោក នឹងអាចដណ្តើមបានអាសនៈ២ភាគ៣នៅសភា (ចំនួន ៣៦៧ ក្នុងចំណោមអាសនៈសរុប ៥៥០) ដែលនឹងអនុញ្ញាតឲ្យគណបក្សអាចបោះឆ្នោត ដោយសំឡេងភាគច្រើន ធ្វើកំណែទម្រង់រដ្ឋធម្មនុញ្ញ ដោយមិនចាំបាច់ឆ្លងកាត់ការបោះឆ្នោតប្រជាមតិ។
លោករេស៊ិប តាយ៊ីប អ៊ែរដូហ្គានមកពីក្រុមអ៊ីស្លាម អភិរក្សនិយម បានឈ្នះឆ្នោតក្លាយជាប្រធានាធិបតីតួកគី កាលពីខែ សីហាឆ្នាំ២០១៤។ តាមរដ្ឋធម្មនុញ្ញ អំណាចប្រធានាធិបតី មានកំណត់ និងមិនអាចលូកដៃ ចូលក្នុងកិច្ចការសម្រេចរបស់រដ្ឋាភិបាល និងសភាទេ។ ដូច្នេះ ដោយធ្វើកំណែទ្រង់ រដ្ឋធម្មនុញ្ញ លោកប្រធានាធិបតី អ៊ែរដូហ្គាន ចង់ប្រែក្លាយរបបសភា ឲ្យទៅជា របបប្រធានាធិបតី ពោលគឺរាល់អំណាចទាំងអស់ មិនថា ប្រតិបត្តិ ឬនិតិប្រតិបត្តិ ត្រូវប្រមូលផ្តុំឲ្យមកស្ថិតនៅក្រោមអំណាចគ្រប់គ្រងរបស់ប្រធានាធិបតីតែម្នាក់។
គណបក្សយុត្តិធម៌ និងអភិវឌ្ឍន៍របស់លោកប្រធានាធិបតី អ៊ែរដូហ្គាន ដែលឈ្នះឆ្នោត មិនដែលចាញ់ តាំងពីឆ្នាំ ២០០២មក ត្រូវគេរំពឹងថា នឹងឈ្នះឆ្នោតម្តងទៀត ដោយគ្មានសង្ស័យ។ ក៏ប៉ុន្តែ អ្វីដែល អាចប្រែប្រួលខុសពីការបោះឆ្នោត មុនៗ គឺ គណបក្សកាន់អំណាចនឹងមិនអាចទទួលបានសំឡេងភាគច្រើន នៅសភា ដូចមុនៗទេ។ វិបត្តិសេដ្ឋកិច្ច យុវជនគ្មានការងារ និងនយោបាយផ្តាច់ការ គាបសង្កត់ទៅលើសេរីភាពបញ្ចេញមតិ របស់លោកប្រធានាធិបតី អ៊ែរដូហ្គាន ជាហេតុផលចំបងដែលអាចធ្វើឲ្យគណបក្សកាន់អំណាច បាត់បង់សំឡេងឆ្នោត នៅសភា។
មួយវិញទៀត គណបក្សរបស់ក្រុមគួក តួកគីដែលកំពុងទទួលប្រជាប្រិយភាព គាំទ្រពីប្រជាជនគួក ដែលតំណាង ឲ្យ២០ភាគរយ នៃប្រជាជនតួកគីកំពុងប៉ងចង់ដណ្តើមឲ្យបានសំឡេង ១០ភាគរយ នៅក្នុងសភា។ តាមប្រព័ន្ធបោះឆ្នោតនៅតួកគី បរាជ័យរបស់គណបក្សតូចៗនឹងផ្តល់សំលេងជាស្វ័យប្រវត្តិទៅឲ្យគណបក្សកាន់អំណាចនៅសភា។ គណបក្សប្រឆាំងធំៗពីរទៀត ដែលមានអាសនៈរួចហើយនៅសភា ធ្លាប់បានចោទ លោកប្រធានាធិបតីអ៊ែរដូហ្គានថា មានចេតនាបង្កើតរបបផ្តាច់ការ។ គណបក្សប្រឆាំង សង្ឃឹមថា នឹងដណ្តើមសំឡេងឆ្នោត បន្ថែមទៀត នៅក្នុងការបោះឆ្នោត នៅថ្ងៃអាទិត្យនេះ ដើម្បីធ្វើយ៉ាងណា ឲ្យគណបក្សកាន់អំណាចរបស់លោកអ៊ែរដូហ្គាន បាត់បង់សំឡេងភាគច្រើននៅសភា ពោលគឺមិនអាចធ្វើកំណែទម្រង់រដ្ឋធម្មនុញ្ញ ដើម្បីបង្កើតរបបប្រធានាធិបតីនៅតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ