បារាំងរៀបចំពិធីគោរពវិញ្ញាណក្ខន្ធជាតិចំពោះជនរងគ្រោះក្នុងអំពើភេរវកម្មថ្ងៃទី១៣ វិច្ឆិកា
នៅក្នុងប្រទេសបារំាង ២សប្តាហ៍ក្រោយអំពើភេរវកម្មក្នុងទីក្រុងប៉ារីស និងជាយក្រុងប៉ារីសដែលបានបណ្តាលឲ្យមានមនុស្សស្លាប់ ១៣០នាក់ និងរបួសជាង ៣០០នាក់កាលពីថ្ងៃទី១៣ វិច្ឆិកាមក រដ្ឋាភិបាលបានរៀបចំពិធីគោរពវិញ្ញាណក្ខន្ធជាតិ និងសាធារណៈរដ្ឋនៅក្នុងវិមាន Invalides ក្នុងទីក្រុងប៉ារីស។ គោលដៅនៃការរៀបចំពិធីជាលក្ខណៈជាតិ និងសាធារណរដ្ឋថ្ងៃបានធ្វើឡើង ដើម្បីចូលរួមគោរពវិញ្ញាណក្ខន្ធចំពោះជនរងគ្រោះក្នុងអំពើភេរវកម្ម។ ក្រៅពីពិធីគោរពវិញ្ញាណក្ខន្ធនៅក្នុងវិមាន Invalides និងដើម្បីសម្តែងឯកភាពជាតិ លោកប្រធានាធិបតីបារាំងក៏បានអំពាវនាវឲ្យពលរដ្ឋបារាំងដោតទង់ជាតិនៅតាមផ្ទះដែរក្នុងថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:១៩
ថ្ងៃសុក្រ ទី២៧ វិច្ឆិកានេះ ប្រទេសបារាំងទំាងមូលបានចូលរួមនៅក្នុងពិធីគោរពវិញ្ញាណក្ខន្ធចំពោះជនរងគ្រោះទាំង ១៣០នាក់ដែលបានបាត់បង់ជីវិតនៅក្នុងអំពើភេរវកម្មកាលពីថ្ងៃទី១៣ វិច្ឆិកាក្នុងទីក្រុងប៉ារីស និងជាយក្រុងប៉ារីស។ ពិធីគោរពវិញ្ញាណក្ខន្ធដែលរៀបចំនៅក្នុងវិមាន Invalides បានចាប់ផ្តើមនៅម៉ោង ១០ និង៣០នាទី ម៉ោងក្នុងប្រទេសបារាំង ត្រូវជាម៉ោង ៤ និង ៣០នាទីរសៀល ម៉ោងក្នុងប្រទេសកម្ពុជា។ ពិធីបុណ្យបានចូលរួមដោយលោកប្រធានាធិបតីបារាំងហ្រ្វង់ស័រ ហូឡង់ ថ្នាក់ដឹកនំារដ្ឋាភិបាល និងឥស្សរជននយោបាយមកពីគ្រប់គណបក្សទំាងអស់ ព្រមទំាងក្រុមគ្រួសារជិត ឆ្ងាយរបស់ជនរងគ្រោះ និងអ្នករងរបួសជាច្រើននាក់ដែលអាចធ្វើដំណើរមកចូលរួមបាន ព្រោះមានអ្នករងរបួសខ្លះកំពុងបន្តសម្រាកព្យាបាលក្នុងមន្ទីរពេទ្យនៅឡើយ។
ជាសរុប មានមនុស្សចូលរួមប្រមាណជា ២ ៥០០នាក់នៅក្នុងពិធីគោរពវិញ្ញាណក្ខន្ធជាលក្ខណៈជាតិ និងសាធារណរដ្ឋថ្ងៃនេះ។ ពិធីបុណ្យបានចាប់ផ្តើមជាមួយនឹងភ្លេងជាតិ និងបន្តដោយបទចម្រៀងក្រោមចំណងជើងថា « យើងមានតែក្តីស្រឡាញ់ »។ បន្ទាប់មកទៀត គឺជាឈានដល់ដំណាក់កាលក្តុកក្តួលដោយមានការប្រកាសឈ្មោះ និងអាយុរបស់អ្នកស្លាប់ទំាង ១៣០នាក់។ គួរជម្រាបជូនថា ជនរងគ្រោះទំាង ១៣០នាក់មានអាយុចន្លោះពី ២០ ទៅជាង ៦០ឆ្នំា តែភាគច្រើនមានអាយុក្រោម ៣៥ឆ្នាំ។ ទន្ទឹមនឹងការប្រកាសឈ្មោះជនរងគ្រោះម្នាក់ៗ ក៏មានការដាក់បញ្ចាំងរូបថតជនរងគ្រោះនៅលើផ្ទាំងសំពត់ ស ដ៏ធំអមដោយទង់ជាតិបារាំងផងដែរ។
ពិធីបុណ្យបានបិទបញ្ចប់តាមរយៈការថ្លែងសុន្ទកថារបស់លោកប្រធានាធិបតីបារាំងហ្រ្វង់ស័រ ហូឡង់។
« ថ្ងៃសុក្រ ទី១៣ វិច្ឆិកា ថ្ងៃដែលយើងមិនអាចបំភ្លេចបានទេ។ ប្រទេសបារាំងបានទទួលរងការវាយប្រហារដោយក្រុមមនុស្សកំសាកបំផុត។ គឺជាទង្វើសង្រ្គាមដែលបានរៀបចំបញ្ជាពីចម្ងាយដោយបានសម្លាប់មនុស្ស ១៣០នាក់ និងរបួសជាច្រើនរយនាក់ក្នុងបុព្វហេតុដ៏ឆ្កួតលីលា។ ថ្ងៃនេះ ប្រទេសបារំាងទំាងមូលយំសោកចំពោះជនរងគ្រោះទំាង ១៣០នាក់។ ជីវិត ១៣០នាក់ត្រូវបានសម្លាប់ ព្រហ្មលិខិតចំនួន ១៣០ ត្រូវបានបំផ្លាញចោល និងគេលែងបានឮទៀតឡើយ នូវសំណើចក្អាកក្អាយទំាង ១៣០នាក់ »
បារាំងបង្ហាញពីឯកភាពជាតិប្រឆាំងនឹងភេរវនិយម
មានហេតុផលចំនួនពីរដែលរដ្ឋាភិបាលបានរៀបចំពិធីគោរពវិញ្ញាណក្ខន្ធចំពោះជនរងគ្រោះក្នុងអំពើភេរវកម្មនាទីក្រុងប៉ារីស និងជាយទីក្រុងប៉ារីសកាលពីថ្ងៃទី១៣ វិច្ឆិកា។ ហេតុផលទី១ រដ្ឋអំណាចត្រូវការពេលវេលា និងការរួមសហការណ៍ជាមួយក្រុមគ្រួសារជនរងគ្រោះដើម្បីស្វែងរកអត្តសញ្ញាណឲ្យបានច្បាស់លាស់ ព្រោះនៅក្នុងចំណោមសាកសពទំាង ១៣០នាក់ មានសាកសពមួយចំនួនបានខ្ទេចខ្ទីរ បាត់បង់ភិនភាគដើមដោយឥទ្ធិពលគ្រាប់ផ្ទុះ និងគ្រាប់កាំភ្លើងរបស់ពួកភេរវជន។
ហេតុផលទី២ រដ្ឋអំណាចបានទុកពេលវេលាឲ្យក្រុមគ្រួសារជនរងគ្រោះរៀបចំពិធីបុណ្យទៅតាមប្រពៃណីទំនៀមទម្លាប់។ ដូច្នេះឃើញថា ការរៀបចំពិធីគោរពវិញ្ញាណក្ខន្ធចំពោះជនរងគ្រោះជាលក្ខណៈជាតិ និងសាធារណរដ្ឋដោយរដ្ឋាភិបាលថ្ងៃនេះមិនជាយឺតពេលទេ។ អ្វីដែលសំខាន់តាមរយៈពិធីបុណ្យថ្ងៃនេះ គឺបារំាងចង់បង្ហាញពីការឯកភាពជាតិក្នុងការមិនចុះញ៉មនឹងការគំរាមកំហែងរបស់ពួកភេរវជន និងមិនចុះញ៉មចំពោះការញុះញង់ឲ្យមានការស្អប់ខ្ពើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ