រដ្ឋអាជ្ញាបារាំងប្រកាសឲ្យដឹងពីព័ត៌មានថ្មីៗជុំវិញភេរវកម្មក្នុងទីក្រុងប៉ារីសថ្ងៃទី១៣ វិច្ចិកា
នៅក្នុងប្រទេសបារំាង ជាង ១០ថ្ងៃក្រោយអំពើភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកា លោករដ្ឋអាជ្ញាហ្រ្វង់ស័រ ម៉ូឡាំងបានប្រកាសឲ្យដឹងនូវព័ត៌មានថ្មីៗជាច្រើន និងគួរឲ្យតក់ស្លុតទាក់ទងនឹងដំណើរការរៀបចំភេរវកម្មនៅក្នុងទីក្រុងប៉ារីស និងនៅសង្កាត់ Saint Denis ជាយទីក្រុងប៉ារីស។ ការថ្លែងរបស់លោកហ្រ្វង់ស័រ ម៉ូឡាំងត្រូវបានធ្វើឡើងនៅក្នុងសន្និសីទកាសែតមួយនាថ្ងៃទី២៤ វិច្ចិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ព័ត៌មានដែលលោករដ្ឋអាជ្ញាហ្រ្វង់ស័រ ម៉ូឡាំងបានបញ្ជាក់ឲ្យដឹងជាសាធារណៈនៅក្នុងសន្និសីទកាសែត គឺគម្រោងរៀបចំធ្វើភេរវកម្មនៅកន្លែងផ្សេងទៀត ក្រៅពីក្នុងទីក្រុងប៉ារីស និងនៅ Saint Denis ជាយទីក្រុងប៉ារីសកាលពីថ្ងៃទី១៣ វិច្ឆិកា។ តាមលោកហ្រ្វង់ស័រ ម៉ូឡាំង ជន Abdelhamid Abaaoud ដែលជាប់សង្ស័យជាអ្នករៀបចំអំពើភេរវកម្មមានគម្រោងបង្កអំពើភេរវកម្មនៅតំបន់ពាណិជ្ជកម្ម La Defense។ ជន Abdelhamid Abaaoud ដែលបានទាញបំផ្ទុះខ្សែក្រវ៉ាត់ផ្ទុកជាតិផ្ទុះជាប់ខ្លួនក្នុងពេលកម្លំាងប៉ូលិសចូលអន្តរាគមន៍ គឺជាជនម្នាក់ស្ថិតក្នុងក្រុមកុម្ម៉ង់ដូដែលបានចូលរួមបាញ់ប្រហារនៅក្នុងទីក្រុងប៉ារីសសង្កាត់ទី១០ និងសង្កាត់ទី១១។ ការហ៊ានអះអាងយ៉ាងដូចនេះព្រោះស្លាកស្នាមនៅលើសព Abdelhamid Abaaoud ក៏ត្រូវបានប៉ូលិសរកឃើញនៅក្នុងរថយន្តម៉ាក Seat ដែលក្រុមភេរវជនបានប្រើនៅក្នុងព្រឹត្តិការណ៍បាញ់វាយប្រហារក្នុងថ្ងៃទី១៣ វិច្ចិកា។
ចំណែកជនទី៣ ភេទស្រីឈ្មោះ Hasna Aït Boulahcen ដែលបានបាត់បង់ជីវិតនៅក្នុងបទអន្តរាគមន៍របស់ប៉ូលិសនៅ Saint Denis ជាយទីក្រុងប៉ារីស គឺជាបងប្អូនជីដូនមួយរបស់ ជន Abdelhamid Abaaoud និងដែល Hasna បានដឹងមុនពីការរៀបចំភេរវកម្មរបស់ Abdelhamid Abaaoud។ ចំណែកជនដែលប៉ូលិសកំពុងតាមរកចាប់ខ្លួនមកដល់សព្វថ្ងៃ គឺ Salah Abdeslam ដែលបានដឹកភេរវជន ៣នាក់តាមរថយន្តម៉ាក Renault Clio ពណ៌ខ្មៅមួយគ្រឿងទៅបង្កភេរវកម្មនៅ Stade de France ក្នុងយប់ថ្ងៃទី១៣ វិច្ឆិកា។ តាមរដ្ឋអាជ្ញាបារាំងលោកហ្រ្វង់ស័រ ម៉ូឡាំង ប៉ូលិសបានរកឃើញខ្សែក្រវ៉ាត់ផ្ទុកជាតិផ្ទុះមួយនៅជាយក្រុងប៉ារីសដែលអាចជារបស់ជន Salah Abdeslam។
លោកហ្រ្វង់ស័រ ម៉ូឡាំងក៏បានប្រាប់ឲ្យដឹងពីព័ត៌មានទាក់ទងនឹងជនដៃដល់ទី២ ឈ្មោះ Mohamaed Abrini ដែលជាជនជាតិបែលហ្ស៊ិកដើមកំណើតម៉ារ៉ុក។ ជន Abrini នេះត្រូវបានគេប្រទះឃើញចំនួន ២លើកជិះក្នុងឡានម៉ាក Renault Clio ពណ៌ខ្មៅជាមួយជន Salah Abdeslam។ ដោយឡែកទាក់ទងនឹងជន Jawad Bendaoud ដែលជាម្ចាស់ផ្ទះនៅ Saint Denis ត្រូវបានរដ្ឋអាជ្ញាបារំាងប្រាប់ឲ្យដឹងថា ប៉ូលិសបានបញ្ជូនទៅឲ្យចៅក្រមស៊ើបអង្កេតនាយប់ថ្ងៃទី២៤ វិច្ឆិកា បន្ទាប់ពីបានឃុំខ្លួនរយៈពេល ១០ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ