Germanwings៖ របាយការណ៍ត្រូវថ្លឹងថ្លែងរវាងសន្តិសុខអ្នកដំណើរនិងការសម្ងាត់សុខភាពបុគ្គល
គ្រោះថ្នាក់ធ្លាក់យន្តហោះរបស់ក្រុមហ៊ុន Germanwings កាលពីថ្ងៃទី ២៤ មីនា ឆ្នាំ២០១៥ នៅប្រទេសបារាំង បានសម្លាប់ជីវិតមនុស្ស១៥០នាក់។ នៅថ្ងៃអាទិត្យទី ១៣ មីនានេះ ការិយាល័យស៊ើបអង្កេតគ្រោះថ្នាក់ផ្លូវអាកាសរបស់បារាំង និងត្រូវចេញរបាយចុងក្រោយ ដើម្បីបិទបញ្ចប់ការងាររបស់ខ្លួន។ ករណីគ្រោះថ្នាក់ធ្លាក់យន្តហោះរបស់ក្រុមហ៊ុន Germanwings គឺជាករណីពិសេសមិនធ្លាប់មាន ព្រោះវាជាករណីធ្វើអត្តឃាតរបស់អ្នកបើកបរយន្តហោះ ហើយឆ្លងកាត់មេរៀននេះ ភ្នាក់ងារស៊ើបអង្កេតត្រូវចេញអនុសាសន៍ជាច្រើន ដើម្បីបញ្ចៀសករណីគ្រោះថ្នាក់បែបនេះទៅថ្ងៃខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
យន្តហោះ Airbus A320 របស់ក្រុមហ៊ុន Germanwings ដែលមានដឹកអ្នកដំណើរ១៤៤នាក់ និងបុគ្គលិកធ្វើការលើយន្តហោះ៦នាក់ បានធ្លាក់នៅតំបន់ភ្នំក្នុងប្រទេសបារាំង កាលពីថ្ងៃទី២៤ មីនា ឆ្នាំ២០១៥។ ការស៊ើបអង្កេតពីរដាច់ដោយឡែកពីគ្នា ត្រូវបានចាប់ផ្តើមធ្វើ ទីមួយគឺខាងតុលាការបារាំង ដែលត្រូវស៊ើបរកអ្នកទទួលខុសត្រូវលើគ្រោះថ្នាក់នេះ ហើយមួយទៀតគឺការស៊ើបអង្កេតរបស់ការិយាល័យសន្តិសុខផ្លូវអាកាសបារាំង ដែលត្រូវស្រាវជ្រាវ ពីមូលហេតុនៃការធ្លាក់។ គឺរបាយការណ៍ចុងក្រោយរបស់ការិយាល័យនេះហើយ ដែលគេកំពុងតែរងចាំស្តាប់ ព្រោះវានឹងមានកំណត់ នូវអនុសាសន៍ធំៗ ទាញចេញពីមេរៀនគ្រោះថ្នាក់នេះ ដើម្បីសំដៅចៀសវាងគ្រោះថ្នាក់ដដែល ទៅថ្ងៃខាងមុខ។
ឆ្លងតាមការស៊ើបអង្កេតអស់រយៈពេលជិតមួយឆ្នាំ អ្វីដែលគេដឹងប្រាកដ គឺយន្តហោះធ្លាក់ដោយសារតែអ្នកបើកយន្តហោះម្នាក់ឈ្មោះ Andreas Lubitz ជាអ្នកបញ្ជាយកយន្តហោះ ទៅបំបុកនឹងភ្នំដើម្បីសម្លាប់ខ្លួន។ ជននេះ បានឆ្លៀតពេល ដែលអ្នកបើកយន្តហោះម្នាក់ទៀតចេញទៅបន្ទប់ទឹក បានចាក់សោពីខាងក្នុងបន្ទប់បើកបរ ហើយបានចាប់ផ្តើមបញ្ជាយន្តហោះតែម្នាក់ឯង ដោយបានហោះសំដៅទៅបុកនឹងជំរាលភ្នំ នាំយកទាំងជីវិតមនុស្ស១៤៩នាក់ទៀតទៅជាមួយផង។
ការស៊ើបអង្កេតបានបង្ហាញផងដែរ ថាមុនពេលកើតហេតុ អ្នកបើកយន្តហោះរូបនេះ មានបញ្ហាផ្លូវចិត្ត សតិអារម្មណ៍មិននឹងន ដោយមានសំបុត្រពេទ្យជាច្រើនបានបញ្ជាក់។ ក៏ប៉ុន្តែគ្មាននរណាម្នាក់ដឹង ហើយអាចហាមឃាត់ជននេះមិនឲ្យ ទៅធ្វើការបានទេ ដោយសារតែក្រុមហ៊ុនគ្មានសិទ្ធិលូកលាន់រឿងសម្ងាត់ ទាក់ទងនឹងសុខភាព របស់បុគ្គលិក ម្នាក់ៗបានទេ។
គឺត្រង់ចំណុចនេះហើយ ដែលកំពុងតែចោទជាបញ្ហា ព្រោះក្នុងករណីនេះ បញ្ហាសុខភាពរបស់អ្នកបើកយន្តហោះ គឺជាលក្ខខណ្ឌសន្តិសុខចំបងរបស់អ្នកដំណើរ។ គេមិនអាចបន្ត យកអាយុជីវិតមនុស្សរាប់រយនាក់ ទៅផ្ញើរនឹងអ្នកបើកបរ ដែលមានបញ្ហាផ្លូវចិត្តចង់សម្លាប់ខ្លួន បែបនេះបានទេ។ របាយការណ៍ របស់ក្រុមការងារស៊ើបអង្កេត នឹងត្រូវតែថ្លឹងថ្លែងពីបញ្ហានេះ ដោយធ្វើយ៉ាងណា ផ្តល់អទិភាពទៅដល់សុវត្ថិភាពរបស់អ្នកដំណើរលើយន្តហោះ។
ចំណុចមួយទៀត ដែលអាចជាបទពិសោធន៍ទាញចេញពីគ្រោះថ្នាក់នេះ គឺការចាក់សោបន្ទប់បើកបរពីខាងក្នុង ព្រមទាំងការទុកឲ្យអ្នកបើកបរតែម្នាក់ នៅខាងក្នុងតែម្នាក់ឯង។ គួររំលឹកថា ចាប់តាំងពីមាន ភេរវកម្ម ថ្ងៃទី ១១ កញ្ញា ឆ្នាំ២០០១ នៅក្រុងញូវយ៉ក គេបានកែប្រែលែងឲ្យអាចបើកទ្វារបន្ទប់បើកបរពីខាងក្រៅបាន ដើម្បីការពារកុំឲ្យមានជនទុច្ចរិតចូលទៅគម្រាម អ្នកបើកបរ។ យ៉ាងណាមិញចាប់តាំងពីមានគ្រោះថ្នាក់យន្តហោះ Germanwings នេះ ភ្នាក់ងារអាកាសចរណ៍អឺរ៉ុបបានចេញអនុសាសន៍មួយ តម្រូវឲ្យមានអ្នកបើកបរពីរនាក់នៅជាប្រចាំ ក្នុងពេលបើកបរ តាំងពីឡើងរហូតដល់ចុះ។ ប៉ុន្តែអនុសាសន៍នេះ មានក្រុមហ៊ុនអាកាសចរណ៍តែមួយចំនួនប៉ុណ្ណោះដែលគោរព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ