ប៉ារីស៖នៅមានបញ្ហាសំខាន់ៗជាច្រើនទៀតដែលត្រូវដោះស្រាយស្តីពីនុយក្លេអ៊ែរអ៊ីរ៉ង់
សំណុំរឿងនុយក្លេអ៊ែររបស់ប្រទេសអ៊ីរ៉ង់ត្រូវបានលោកប្រមុខការទូតបារំាង Laurent Fabius និងលោកប្រមុខការទូតអ៊ីរ៉ង់ Mohammad Zarif ព្រមទំាងលោកប្រមុខការទូតអាមេរិក John Kerry លើកយកទៅជជែកនៅក្នុងទីក្រុងប៉ារីស ប្រទេសបារំាង។ នៅក្រោយជំនួបជាមួយលោក Zarif លោក Fabius បានថ្លែងថា នៅមានបញ្ហាជាច្រើនទៀតដែលត្រូវដោះស្រាយ មុននឹងសម្រេចបាននូវកិច្ចព្រមព្រៀងចុងក្រោយមួយស្តីពីរឿងនុយក្លេអ៊ែរអ៊ីរ៉ង់ដ៏ស្មុគស្មាញ។
ចុះផ្សាយនៅថ្ងៃ៖
ស្តាប់ - ០១:៥៦
បារំាងបានទទួលស្គាល់ថា មុននឹងសម្រេចបាននូវកិច្ចព្រមព្រៀងស្ថាពរមួយស្តីពីរឿងនុយក្លេអ៊ែរអ៊ីរ៉ង់ដែលអាចទទួលយកបានទំាងអស់គ្នា គេត្រូវតែដោះស្រាយបញ្ហាខ្វែងគំនិតដែលនៅសេសសល់ជាមុនសិន។ ទោះជាយ៉ាងនេះក្តី បារំាងបានគិតថា កិច្ចសន្ទនារវាងប្រមុខការទូតបារំាង និងប្រមុខការទូតអ៊ីរ៉ង់ពេលនេះបានរម្លឹកជាថ្មីពីការប្តេជ្ញាចិត្តរបស់ប៉ារីសក្នុងការស្វែងរកកិច្ចព្រមព្រៀងផ្តាច់ព្រាត់មួយដែលធានាឲ្យមានកម្មវិធីនុយក្លេអ៊ែរស៊ីវិលរបស់អ៊ីរ៉ង់។ ដោយឡែក និងក្រៅពីមានជំនួបជាមួយលោកប្រមុខការទូតបារំាង Laurent Fabius លោកប្រមុខការទូតអ៊ីរ៉ង់ Mohammad Zarif ក៏បានជួបសន្ទនាជាមួយលោកប្រមុខការទូតអាមេរិក John Kerry ជិត ១ម៉ោងដែរ ហើយមុននឹងជួបគ្នាក្នុងទីក្រុងប៉ារីសពេលនេះ លោក Kerry និងលោក Zarif ក៏បានជួបគ្នារយៈពេល ៦ម៉ោងនៅទីក្រុងហ្សឺណែវ ប្រទេសស្វីស។
ប្រភពបស្ចិមលោកស្និទ្ធិនឹងរឿងចរចានុយក្លេអ៊ែរអ៊ីរ៉ង់ឲ្យដឹងថា គ្រប់គ្នាចង់បានកិច្ចព្រមព្រៀងចុងក្រោយមួយឲ្យបានលឿន តែផ្លូវដែលត្រូវដើរហាក់ដូចជានៅឆ្ងាយនៅឡើយ និងថា គឺភាគីអ៊ីរ៉ង់ទេដែលនៅមិនទាន់ធ្វើសម្បទានអ្វីដើម្បីសម្រេចឲ្យបាននូវកិច្ចព្រមព្រៀងដែលអាចទទួលយកបានទំាងអស់គ្នា។ គួរជម្រាបជូនថា ទន្ទឹមនឹងកិច្ចចរចារវាងប្រមុខការទូតបារំាង អ៊ីរ៉ង់ និងអាមេរិកក្នុងទីក្រុងប៉ារីស ក៏មានកិច្ចចរចាស្របគ្នានៅក្នុងទីក្រុងហ្សឺណែវដែរ ហើយគឺនៅថ្ងៃអាទិត្យ ទី១៨ ស្អែកដែលកិច្ចចរចា ៥ភាគី បូក១ ត្រូវចាប់ផ្តើមជាថ្មីក្នុងគោលដៅស្វែងរកកិច្ចព្រមព្រៀងផ្តាច់ព្រាត់មួយស្តីពីរឿងនុយក្លេអ៊ែរអ៊ីរ៉ង់ពីពេលនេះដល់ថ្ងៃទី១ កក្កដាខាងមុខ។
ដោយឡែក រឿងនុយក្លេអ៊ែរអ៊ីរ៉ង់នេះក៏ត្រូវបានលោកប្រធានាធិបតីអាមេរិកអូបាម៉ា និងលោកនាយករដ្ឋមន្រ្តីអង់គ្លេស David Cameron លើកយកទៅជជែកក្នុងទីក្រុងវ៉ាស៊ីនតោននាឱកាសទស្សនកិច្ចរបស់លោក Cameron នៅអាមេរិក។ លោកអូបាម៉ា និងលោក Cameron បានយល់ឃើញដូចគ្នាថា ក្នុងកាលៈទេសៈនេះ គេមិនគួរស្វែងរកទ័ណ្ឌកម្មថ្មីដាក់លើប្រទេសអ៊ីរ៉ង់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ