តួកគីចង់បំផ្លាញគម្រោងសម្ព័ន្ធអន្តរជាតិ ដែលចង់វាយប្រហារក្រុមជីហាតអង្គការរដ្ឋអ៊ីស្លាម?
ភាពតានតឹងនៅ បន្តមាន បន្ទាប់ពី តួកគីបាញ់ទម្លាក់យន្តហោះចម្បាំងរុស្ស៊ី មួយគ្រឿង នៅព្រំដែនតួកគី ស៊ីរី។ ប្រធានាធិបតីរុស្ស៊ី លោកវ្លាឌីមៀរ ពូទីន កាលពីថ្ងៃម្សិលមិញ បានព្រមានខ្លាំងពីផលវិបាកដែលតួកគីនឹងជួប នៅក្រោយបាញ់ទម្លាក់យន្តហោះរុស្ស៊ី។ ទីក្រុងម៉ូស្គូបានប្រកាសនៅថ្ងៃពុធ តាំងទីខែលមីស៊ីល នៅខេត្ត Lattaquié ជាទីដែលយន្តហោះរុស្ស៊ី ធ្លាក់ កាលពីថ្ងៃម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:២៨
ប្រធានាធិបតីរុស្ស៊ី លោកពូទីន បានអំពាវនាវ នៅថ្ងៃពុធទី ២៥ វិច្ឆិកា កុំឲ្យប្រជាជនរុស្ស៊ី ធ្វើដំណើរទៅប្រទេសតួកគីតទៅទៀត។ ទេសចររុស្ស៊ី តំណាងឲ្យ៣៥ភាគរយនៃអ្នកទេសចរបរទេស នៅប្រទេសតួកគី។ នៅក្នុងសេចក្តីថ្លែងការណ៍នៅថ្ងៃពុធ នាយករដ្ឋមន្រ្តីរុស្ស៊ីបានប្រកាសផ្អាកគម្រោងការរួម ដែលរុស្ស៊ី និងតួកគីមានជាមួយគ្នា។ តាមប្រមុខរដ្ឋាភិបាលរុស្ស៊ី ក្រុមហ៊ុនតួកគីជាច្រើននឹងបាត់បង់ប្រយោជន៍ច្រើននៅទីផ្សាររុស្ស៊ី។
ក្រសួងការពារជាតិរុស្ស៊ីបានបញ្ជាក់ដែរថា អ្នកបើកបរយន្តហោះម្នាក់ ដែលនៅរស់រានមានជីវិត នៅក្រោយការបាញ់ទម្លាក់របស់តួកគី ត្រូវបានគេជួយសង្រ្គោះ និងដឹកចូលបន្ទាយ ក្នុងមូលដ្ឋានទ័ពជើងទឹករបស់រុស្ស៊ី នៅខេត្តLattaquié ដែលស្ថិតនៅតាមព្រំដែនស៊ីរី និងតួកគី។ ក្រៅតែប្រកាសបញ្ជូននាវាចម្បាំងដែលមានបំពាក់ដោយគ្រាប់មីស៊ីលបាញ់យន្តហោះ ក្រសួងការពារជាតិរុស្ស៊ីនៅបានបញ្ជាក់ថា អំណើះតទៅ រាល់យន្តហោះទម្លាក់គ្រាប់បែករបស់រុស្ស៊ី នឹងត្រូវអមដំណើរដោយយន្តហោះ ប្រមាញ់រុស្ស៊ីបន្ថែមទៀត។
នៅថ្ងៃអង្គារ ទីក្រុងអង់ការ៉ា បាននិយាយថា ខ្លួនបានបាញ់ទម្លាក់យន្តហោះ មិនស្គាល់មុខមួយ ដែលបានរំលោភ ហោះចូលក្នុងដែនអាកាសរបស់តួកគី អស់រយៈពេល ១៧វិនាទី។ តួកគីបានអះអាងថា ក្នុងរយៈពេល ៥នាទី អ្នកបើកបរតួកគីបានបញ្ជូនសញ្ញា ព្រមានទៅយន្តហោះ ពីរគ្រឿងដែលហោះសំដៅដែនអាកាសតួកគី។ តាមផែនទី គូសបញ្ជាក់ដោយក្រសួងការពារជាតិតួកគី គេឃើញថា យន្តហោះរុស្ស៊ី ត្រូវបានបាញ់ទម្លាក់ នៅក្នុងទឹកដីស៊ីរី នៅក្រោយហោះចេញពីដែនអាកាសតួកគី។
ចាប់តាំងពីឆ្នាំ ១៩៥០ នេះជាលើកទី ១ដែលយន្តហោះរុស្ស៊ី ត្រូវគេបាញ់ធ្លាក់ ដោយ សមាជិកអូតង់ ឬអាចនិយាយថា តួកគី ជាប្រទេសសមាជិកអូតង់ដំបូងគេ ដែលបានបាញ់ទម្លាក់យន្តហោះរុស្ស៊ី។
ការបាញ់ទម្លាក់យន្តហោះរុស្ស៊ី កាលពីថ្ងៃម្សិលមិញ ជារឿងដែលគេរំពឹងថា នឹងអាចកើតមាន គ្រប់ពេលវេលា។ ចាប់តាំងពីរុស្ស៊ី បើកប្រតិបត្តិការទ័ពនៅស៊ីរី ប្រទេសជិតខាងរបស់ខ្លួន តួកគីបានចោទកាលពីដើមខែតុលា ថា យន្តហោះរុស្ស៊ីបានរំលោភចូលក្នុងដែនអាកាសរបស់ខ្លួន។ តួកគីធ្លាប់បានព្រមានរួចហើយថា នឹងមិនលើកលែង នៅពេលក្រោយៗនោះទេ។
ព្រឹត្តិការណ៍នៅថ្ងៃម្សិលមិញ គឺជារឿងដែលជៀសមិនផុត។ យន្តហោះតួកគីតាមប្រមាញ់បាញ់យន្តហោះរុស្ស៊ី ក្នុងទឹកដីតួកគី ព្រោះថា តួកគីទំនងចង់ការពារក្រុមឧទ្ទាម តួកកូម៉ាន់ ដែលតួកគី ទើបបណ្តុះបណ្តាល និងដែលកំពុងជាប់ដៃប្រយុទ្ធជាមួយកងទ័ពរដ្ឋាភិបាលស៊ីរី បាស្ហា អាល់អាសាដ នៅប៉ុន្មានថ្ងៃចុងក្រោយនេះ។ តួកគីអាចគិតថា យន្តហោះទម្លាក់គ្រាប់បែករុស្ស៊ី ដែលតួកគីបាញ់ទម្លាក់ កាលពីថ្ងៃអង្គារ មានគម្រោងទៅទម្លាក់គ្រាប់បែកលើក្រុមឧទ្ទាម តួកកូម៉ាន ដែលខ្លួនគាំទ្រ។ អីចឹងហើយ បានជាតួកគីត្រូវតែសម្រេចចាត់ការបាញ់ទម្លាក់យន្តហោះរុស្ស៊ីជាមុន។ តាមតួកគី យន្តហោះរបស់រុស្ស៊ី មិនបានទម្លាក់គ្រាប់បែកលើក្រុមជីហាតទេ ប៉ុន្តែ ទៅលើក្រុមឧទ្ទាម ក្រុមប្រឆាំងស៊ីរី ក្នុងគោលបំណងការពារអំណាចរបស់ប្រធានាធិបតីស៊ីរី។
ការណ៍ដែលតួកគីហ៊ានបាញ់ទម្លាក់យន្តហោះរុស្ស៊ីនៅពេលនេះ គឺមិនខ្លាចការវាយបកវិញ ពីរុស្ស៊ី គឺមកពីតួកគី អាងអង្គការអូតង់ ដែលទើបបានបញ្ជាក់ជាថ្មី គាំទ្រ គោរពចំណាត់ការរបស់តួកគី ដែលចង់ការពារដែនអធិបតេយ្យរបស់ខ្លួន។
ម្យ៉ាងទៀត តួកគីក៏កំពុងខកចិត្ត ដែលឃើញ ប្រទេសលោកខាងលិច ដែលនៅក្នុងនោះ មានតាំងពីអាមេរិក និងបារាំង ដែលចង់សហការជាមួយរុស្ស៊ី ដើម្បី ក្រុមជីហាត នៃអង្គការរដ្ឋអ៊ីស្លាម។ តួកគីសម្រេចបាញ់ទម្លាក់យន្តហោះរុស្ស៊ី នៅពេលនេះ ក៏ព្រោះតែតួកគី ចង់ផ្ញើសារ ដាស់សតិប្រទេសលោកខាងលិច ថា រុស្ស៊ី នៅតែជាសម្ព័ន្ធមិត្តរបស់បាស្ហា អាល់អាសាដ ដែលគេមិនត្រូវបោះដៃសហការជាមួយដាច់ខាត។
ជំហរដ៏ស្រពិចស្រពិលរបស់តួកគី ក្នុងការប្រយុទ្ធប្រឆាំងនឹងក្រុមជីហាតនៅស៊ីរី
ប្រធានាធិបតីតួកគី ធ្លាប់បានចោទថា គឺប្រធានាធិបតីស៊ីរី ដែលជួយគាំទ្រក្រុមគួដ ស៊ីរី និងតួកគី ដើម្បីងើបបះបោរប្រឆាំង រដ្ឋាភិបាលតួកគី។ ទិសដៅសំខាន់របស់តួកគី ធ្វើយ៉ាងម៉េចឲ្យប្រធានាធិបតីស៊ីរី ចុះចេញពីអំណាចជាដាច់ខាត។ រហូតមក បើទោះបីជាតួកគីចូលរួមក្នុងសម្ព័ន្ធអន្តរជាតិដឹកនាំដោយអាមេរិក ធ្វើប្រតិបត្តិការទ័ពនៅ ស៊ីរី ប៉ុន្តែ យន្តហោះចម្បាំងតួកគីវាយសំដៅតែទៅលើក្រុមគួដ ដែលជាសត្រូវរបស់ក្រុងអង់ការ៉ា ប៉ុន្តែមិនមែនទៅលើក្រុមជីហាតនៃអង្គការរដ្ឋអ៊ីស្លាមនោះទេ។ តួកគីនៅបានជួយបណ្តុះបណ្តាល ពួកឧទ្ទាមតួកកូម៉ាន ដែលកំពុងប្រយុទ្ធនឹងទាហានរដ្ឋាភិបាលស៊ីរីថែមទៀត។ ទិសដៅសំខាន់របស់តួកគី កម្ចាត់ប្រធានាធិបតីស៊ីរីដែលគ្រោះថ្នាក់មិនថា សម្រាប់ប្រជាជនស៊ីរី និងតួកគី។
តួកគីជាសមាជិករបស់អូតង់ ជាមួយប្រទេសលោកខាងលិច ប៉ុន្តែ តួកគីគ្មានជំហរដូចសមាជិកដទៃទៀតនោះទេ។ បារាំង និងអាមេរិកចង់វាយបំផ្លាញក្រុមជីហាតនៃអង្គការរដ្ឋអ៊ីស្លាមដែលកំពុងដើរធ្វើភេរវកម្មនៅអឺរ៉ុប និងកំពុងរីករាលដាលទៅទុយនីស៊ី លីប៊ី ឬអាហ្វហ្កានីស្ថាន។ ប៉ុន្តែ សម្រាប់តួកគី ក្រុមជីហាតនៃអង្គការរដ្ឋអ៊ីស្លាមមិនមែនជាសត្រូវរបស់ខ្លួននោះទេ។
ដោយសារតែជំហរមិនច្បាស់លាស់របស់តួកគី ប្រធានាធិបតីពូទីន នៅក្រោយហេតុការណ៍បាញ់ទម្លាក់យន្តហោះរុស្ស៊ី បាននិយាយថា យន្តហោះរុស្ស៊ី បាញ់ទម្លាក់ដោយក្រុមចូលដៃជើងជាមួយពួកភេរវនិយម។ លោកពូទីននៅចោទសួរពីតួនាទីរបស់តួកគី ដែលបើតាមរុស្ស៊ី គឺជាដៃគូ ទិញប្រេងពីក្រុមជីហាត នៃអង្គការរដ្ឋអ៊ីស្លាម។ គឺលុយរបស់តួកគី នេះហើយ ដែលបានជួយចិញ្ចឹមក្រុមជីហាត ឲ្យចេញទៅធ្វើភេរវកម្ម នោះ។
តួកគីចង់បាញ់ព្រួញមួយសម្លាប់សត្វពីរ។ ទីមួយ គឺព្រមានរុស្ស៊ី កុំឲ្យខ្លាំង ព្រហើនបើកយន្តហោះ រំលោភដែនអាកាសរបស់ខ្លួន និងទី ២ គឺតួកគីចង់បញ្ជាក់ទៅប្រទេសសម្ព័ន្ធមិត្តលោកខាងលិចថា តួកគីប្រឆាំងដាច់ខាត មិនចង់ឲ្យមានការចូលរួមសហការរបស់អាមេរិក និងបារាំង ជាមួយរុស្ស៊ី។ តួកគីប្រហែលប៉ងចង់ឲ្យសម្ព័ន្ធអន្តរជាតិ ដែលរួមបញ្ចូល អាមេរិក បារាំង និងរុស្ស៊ី ដើម្បីប្រយុទ្ធប្រឆាំងនឹងក្រុមជីហាត រលាយទៅវិញ ដោយសារភាពតានតឹង ក្រោយការបាញ់ទម្លាក់យន្តហោះរុស្ស៊ីលើកនេះ។
អគ្គលេខាធិការអង្គការអូតង់ និងប្រធានាធិបតីអាមេរិកបារ៉ាក់ អូបាម៉ា សុទ្ធតែប្រកាសគាំទ្រតួកគី ក្នុងបុព្វហេតុការពារដែនអាកាសរបស់ខ្លួន។ ប៉ុន្តែ ជាមួយគ្នានោះ សម្ព័ន្ធមិត្តរបស់តួកគីបានដាស់តឿន តួកគី ឲ្យអត់ធ្មត់ ពិចារណាល្អិតល្អន់ មុននឹងបង្កើតភាពតានតឹងដូចលើកនេះ។ អូតង់ និងអាមេរិកបានអំពាវនាវផងដែរឲ្យភាគីជម្លោះ ស្ងប់ស្ងាត់ និងចរចា ដើម្បី ដោះស្រាយបញ្ហាតានតឹង។ ប្រហែលដោយសារតែឃើញអាមេរិក ឬអូតង់មិនសូវនិយាយច្រើន អីចឹងហើយ ទើបបានជានៅថ្ងៃពុធនេះ លោកប្រធានាធិបតីតួកគីបានចេញមុខមកនិយាយថា តួកគីគ្មានបំណង បង្កើតភាពតានតឹងនោះទេ។
គំនិតប៉ងរបស់ទីក្រុងអង់ការ៉ាដែលចង់ឲ្យរុស្ស៊ី ប្រឈមមុខជាមួយប្រទេសលោកខាងលិចជួបបរាជ័យ ដោយសារតែទាំងអូតង់ និងអាមេរិកគឺគ្មានឆន្ទៈប្រឈមមុខជាមួយរុស្ស៊ីនោះទេ។ មួយវិញទៀត រុស្ស៊ីវិញ ក៏មិនបានផ្ទុះកំហឹង រហូតដល់ប្រកាសធ្វើសង្រ្គាមជាមួយតួកគីដែរ។ រូបភាពនេះ អាចកើតមាននៅក្នុងសម័យសង្រ្គាមត្រជាក់។ ឯកអគ្គរដ្ឋទូតរុស្ស៊ី នៅប៉ារីសនៅបានបញ្ជាក់ថា រុស្ស៊ី នៅតែត្រៀមខ្លួនសហការជាមួយប្រទេសលោកខាងលិច ឬទាំងតួកគី ផងដើម្បីប្រយុទ្ធប្រឆាំង នឹងក្រុមជីហាតនៃអង្គការរដ្ឋអ៊ីស្លាម។ មានន័យថា តួកគីទោះជាមានផែនការចង់បំផ្លាញគម្រោងបង្កើតសម្ព័ន្ធអន្តរជាតិ ប្រឆាំងនឹងក្រុមជីហាត ប៉ុន្តែ តួកគីនៅតែមិនបានសម្រេច ព្រោះថា ក្រុមភេរវនិយម ជីហាតនៃអង្គការរដ្ឋអ៊ីស្លាម បានក្លាយជាសត្រូវរួមរបស់ពិភពលោក គឺមិនមែនប្រធានាធិបតីស៊ីរី តាមការគិតទុករបស់តួកគីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ