អ្នកជំនាញ៖ ការបញ្ជូនមនុស្សទៅភពព្រះអង្គារអាចធ្វើបានក្នុងពេល២០ឆ្នាំខាងមុខ
ក្រុមអ្នកជំនាញខាងអវកាសមកពីទីភ្នាក់ងារអវកាសអាមេរិក (NASA) និងអ្នកជំនាញមកពីវិស័យឯកជនផ្សេងៗទៀតបានយល់ស្របគ្នាថា ការបញ្ជូនមនុស្សទៅកាន់ភពព្រះអង្គារ ដែលពីមុនគ្រាន់តែជាក្តីស្រម័យរបស់មនុស្សជាតិនោះ គឺពិតជាអាចធ្វើទៅបាន នៅក្នុងរយៈពេល ២០ឆ្នាំខាងមុខ។ ក៏ប៉ុន្តែ បញ្ហាប្រឈមខាងផ្នែកបច្ចេកវិទ្យានៅមានច្រើនទៀត ដែលគេចាំបាច់ត្រូវធ្វើការសិក្សាស្រាវជ្រាវបន្ថែម ហើយដែលត្រូវការកញ្ចប់ថវិកាច្រើន។
ចុះផ្សាយនៅថ្ងៃ៖
ស្តាប់ - ០២:៣៥
នៅថ្ងៃចន្ទស្អែកនេះ ក្រុមអ្នកជំនាញកំពូលៗខាងអវកាស ទាំងមកពីស្ថាប័នរដ្ឋ និងមកពីវិស័យឯកជន នឹងធ្វើការជួបប្រជុំគ្នា នៅរដ្ឋធានីវ៉ាស៊ីងតោន ក្នុងសន្និសីទរយៈពេល ៣ថ្ងៃ ដើម្បីជជែកពិភាក្សាគ្នា អំពីលទ្ធភាព ក្នុងការបញ្ជូនមនុស្សទៅកាន់ភពព្រះអង្គារ។ ក្នុងចំណោមអ្នកជំនាញទាំងនេះ ក៏រួមមាន អគ្គនាយកទីភ្នាក់ងារអវកាសអាមេរិក (NASA) និងលោក Buzz Aldrin ផងដែរ។ លោក Buzz Aldrin ដែលបានធ្វើដំណើរទៅកាន់ព្រះចន្ទ រួមជាមួយនឹងលោក Neil Armstrong កាលពីឆ្នាំ១៩៦៩ (លោក Buzz Aldrin ត្រូវបានគេរាប់ថាជាមនុស្សទី២ ដែលបានឈានជើងជាន់ដីព្រះចន្ទ ដោយសារតែលោកបានចេញពីយាន ក្រោយលោក Neil Armstrong)។
គេសង្កេតឃើញថា ក្នុងរយៈពេលប៉ុន្មានខែចុងក្រោយនេះ ចំណាប់អារម្មណ៍អំពីការបញ្ជូនមនុស្សទៅកាន់ភពព្រះអង្គារ បានកើតមានឡើងកាន់តែខ្លាំង ទាំងក្នុងចំណោមអ្នកវិទ្យាសាស្រ្ត និងសាធារណជនទូទៅ នៅអាមេរិក។ ការស្ទាបស្ទង់មតិ កាលពីខែមីនា កន្លងទៅថ្មីនេះ បានបង្ហាញថា ប្រជាជនអាមេរិកជាង ៧០% រំពឹងថា មនុស្សជាតិអាចនឹងឈានជើងជាន់ដីភពព្រះអង្គារបាន នៅក្នុងពេលឆាប់ៗខាងមុខ ហើយចង់ឲ្យរដ្ឋាភិបាលអាមេរិកបង្កើនថវិកា ដល់ទីភ្នាក់ងារ NASA ដើម្បីសិក្សាលើគម្រោងនេះ។
គួរបញ្ជាក់ថា ភពព្រះអង្គារមានចម្ងាយពីផែនដី ចន្លោះពី ៥៦លាន ទៅ ៤០០លានគីឡូម៉ែត្រ អាស្រ័យទៅតាមរដូវកាល។ បើពឹងផ្អែកទៅលើបច្ចេកវិទ្យាបច្ចុប្បន្ន ការធ្វើដំណើរទៅកាន់ភពព្រះអង្គារនឹងត្រូវចំណាយពេលប្រមាណជា ៦ខែ ដោយមិនទាន់គិតពីរយៈពេលដែលត្រូវចំណាយទៅនោះ និងរយៈពេល ដែលត្រូវធ្វើដំណើរត្រឡប់មកវិញ។
ដំណើរដ៏វែងឆ្ងាយនេះ ត្រូវប្រឈមមុខនឹងបញ្ហាបច្ចេកវិទ្យាធំៗជាច្រើន រួមមាន បរិមាណ និងទម្ងន់នៃគ្រឿងចំហេះ ដែលចាំបាច់សម្រាប់ដំណើរការយានទាំងទៅ ទាំងមក និងបញ្ហាទាក់ទងនឹងសុខភាពទាំងខាងផ្លូវកាយ និងផ្លូវចិត្ត របស់អវកាសយានិក ដែលត្រូវចំណាយពេលរាប់ខែ នៅក្នុងទីអវកាស។
ក៏ប៉ុន្តែ ក្រុមអ្នកជំនាញអវកាសជាទូទៅបានយល់ឃើញដូចៗគ្នាថា បញ្ហាប្រឈមខាងបច្ចេកវិទ្យាទាំងប៉ុន្មានខាងលើនេះ ជាបញ្ហា ដែលគេអាចស្វែងរកដំណោះស្រាយបាន ហើយថា ការបញ្ជូនមនុស្សទៅកាន់ភពព្រះអង្គារនេះ អាចនឹងធ្វើទៅបាន នៅក្នុងរយៈពេល ២០ឆ្នាំទៀត ប្រសិនបើយើងចាប់ផ្តើមអនុវត្តគម្រោង នៅពេលនេះ។
បញ្ហាដែលចោទ នៅក្នុងការសិក្សា និងអនុវត្តគម្រោងបញ្ជូនមនុស្សទៅកាន់ភពព្រះអង្គារនេះ គឺបញ្ហាថវិកា។ វិបត្តិសេដ្ឋកិច្ចបានជំរុញឲ្យអាមេរិកកាត់បន្ថយការចំណាយសាធារណៈយ៉ាងច្រើនសន្ធឹកសន្ធាប់ ដែលក្នុងនោះ ក៏រួមមានថវិការបស់ទីភ្នាក់ងារ NASA ផងដែរ។ នៅក្នុងពេលបច្ចុប្បន្ននេះ ទីភ្នាក់ងារ NASA ទទួលបានកញ្ចប់ថវិកាតែ ០,៥%ប៉ុណ្ណោះ នៃ ថវិកាសរុបរបស់រដ្ឋាភិបាលអាមេរិក ធៀបទៅនឹង ៤% កាលពីក្នុងអំឡុងគម្រោង Apollo ទៅកាន់ព្រះចន្ទ នាទសវត្សរ៍ឆ្នាំ៦០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ