រឿងអាស្រូវផ្លូវភេទរបស់អតីតប្រធានFMIត្រូវយកទៅច្នៃធ្វើជារឿងកុន
Welcome to New York “ទីក្រុងញូវយ៉កសូមស្វាគម” ត្រូវបានផលិតឡើងដោយសមិទ្ធិករអាមេរិកាំង ដោយយកលំនាំតាមសាច់រឿងអាស្រូវផ្លូវភេទរបស់លោក Strauss-Kahn អតីតប្រធានមូលនិធិរូបិយវត្ថុអន្តរជាតិ FMI ដែលធ្លាប់ជាប់ចោទពីបទរំលោភបំពានផ្លូវភេទ ស្រ្តីសម្អាតបន្ទប់សណ្ឋាគារក្នុងក្រុងញូវយ៉ក។ មេធាវីរបស់អតីតប្រធានFMIបានប្រាប់ប្រព័ន្ធផ្សព្វផ្សាយបារាំង កាលពីថ្ងៃចន្ទទី ១៩ ឧសភាថា លោក Strauss-Kahnនឹងដាក់ពាក្យបណ្តឹងប្តឹងក្រុមហ៊ុនផលិតកុនពីបទបរិហារកេរ្តិ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
Welcome to New Yorkជារឿងប្រឌិតរបស់សមិទ្ធិករអាមេរិកាំង Abel Ferrara ប៉ុន្តែ ដំណើរសាច់រឿងនេះមានលក្ខណៈដូចគ្នាបេះបិទទៅនឹងរឿងអាស្រូវផ្លូវភេទរបស់លោកDominique Strauss-Kahn។ តួកុនបារាំងដ៏ល្បីឈ្មោះGerard Depardieuជាអ្នកសំដែងតួអង្គមន្រ្តីធំម្នាក់ដែលល្មោភតណ្ហា និងបានចាប់រំលោភស្រ្តីសម្អាតបន្ទប់ ស្បែកខ្មៅម្នាក់ គឺដូចលោក Strauss-Kahnដែលស្រ្តីសម្អាតបន្ទប់ជាតិហ្គីណេម្នាក់បានប្តឹងផ្តល់ពីបទរំលោភផ្ហូវភេទ។ អ្វីដែលធ្វើឲ្យគេចាប់អារម្មណ៍ខ្លាំង នៅក្នុងកុន Welcome to New Yorkគឺសមិទ្ធិករបានជួលប៉ូលិសពិតៗ ដែលធ្លាប់ក្រៀកលោក Strauss-Kahnមកសំដែងជាតួប៉ូលិសដដែល។ លើសពីនោះ គេថែមទាំងបានយកផ្ទះដែលលោក Strauss-Kahnធ្លាប់ស្នាក់នៅក្នុងរយៈពេលប្តឹងផ្តល់ មកធ្វើជាកន្លែងថតសាច់រឿងទៀត។ ចំណុចដែលសាច់រឿងកុនមានលក្ខណៈខុសពីជីវិតពិតរបស់លោក Strauss-Kahn គឺនៅត្រង់លោក Strauss-Kahnត្រូវបានរដ្ឋអាជ្ញាអាមេរិកដោះលែងឲ្យមានសេរីភាព បន្ទាប់ពីមានការសម្របសម្រួលរឿងលុយកាក់ ប៉ុន្តែនៅក្នុងរឿងកុនរបស់លោកAbel Ferraraតួអង្គរំលោភផ្លូវភេទត្រូវបានតុលាការផ្តន្ទាទោសឲ្យជាប់ពន្ធនាគារ។
យ៉ាងណាក៏ដោយ បើទោះជាតុលាការអាមេរិកសម្រេចដោះលែងលោក Strauss-Kahnឲ្យរួចទោស ប៉ុន្តែ គឺរឿងអាស្រូវ ប្តឹងផ្តល់តាមតុលាការនេះហើយដែលបានធ្វើលោក Strauss-Kahnធ្លាក់ចេញពីតំណែងប្រធានមូលនិធិរូបិយវត្ថុ កាលពីបីឆ្នាំមុន។ នៅពីរថ្ងៃក្រោយចាក់បញ្ចាំងខ្សែភាពយន្ត Welcome to New Yorkនៅទីក្រុងកាន លោកDominique Strauss-Kahnបានបញ្ចេញប្រតិកម្ម ដែលបើតាមមេធាវី លោក Strauss-Kahn នឹងដាក់ពាក្យបណ្តឹងទៅតុលាការ ប្តឹងម្ចាស់ផលិតកុន ពីបទបរិហារកេរ្តិ៍។ សម្រាប់មេធាវីរបស់លោកអតីតប្រធានFMI លោកStrauss-Kahn បានជ្រះស្រឡះពីរឿងក្តីក្តាំ និងមានសិទ្ធិដូចពលរដ្ឋដទៃទៀត គឺបំភ្លេចរឿងចាស់។
អតីតភរិយារបស់លោក Strauss-Kahnបានបញ្ចេញប្រតិកម្មផងដែរទៅនឹងខ្លឹមសារកុន Welcome to New York។ លោកស្រីAnne Sinclairមកពីគ្រួសារជ្វីវ វាយតម្លៃថា កុននេះបានប្រមាថ រើសអើងជនជាតិជ្វីវ ប៉ុន្តែលោកស្រីប្រកាសថា លោកស្រីនឹងមិនរវល់ទៅធ្វើការប្តឹងផ្តល់អ្វីទេ។
ដោយពិតទៅខ្សែភាពយន្ត Welcome to New Yorkមិនត្រូវបានជ្រើសរើសមិនត្រូវបានជ្រើសរើសជាខ្សែភាពយន្តសម្រាប់ការប្រកួតប្រជែងនៅក្នុងមហោស្រពភាពយន្តកាន ដែលបានចាប់ផ្តើមពីថ្ងៃទី ១៤ ដល់ថ្ងៃទី២៥ឧសភាទេ។ កាលពីថ្ងៃសៅរ៍ កុនត្រូវបានចាក់បញ្ចាំងជាលក្ខណៈឯកជន នៅក្នុងរោងកុនតូចមួយ នៅក្នុងក្រុង ក្រៅបរិវេណមហោស្រពកាន។ កុននេះបានបំផុសបំផុលមនុស្សឲ្យចូលមើលច្រើន ដោយសារតែការផ្សព្វផ្សាយពាណិជ្ជកម្មខ្លាំង និងរបៀបចែកចាយកុនមានលក្ខណៈខុសពីប្រពៃណីទម្លាប់កុនបារាំង ដែលតម្រូវឲ្យខ្សែភាពយន្តទាំងអស់ត្រូវចាក់បញ្ចាំងនៅរោងកុន មុននឹងផលិតចេញឌីស ឬចែកចាយតាមបណ្តាញទូរទស្សន៍។ ប៉ុន្តែផ្ទុយទៅវិញ ចាប់តាំងពីថ្ងៃសៅរ៍ កុនWelcome to New York ត្រូវបានដាក់ជួលឲ្យមើលតាមអ៊ីនធ័រណេត ក្នុងតម្លៃ ៧អឺរ៉ូ។ តាមម្ចាស់ផលិតកម្ម គេធ្វើដូច្នេះគឺដើម្បីជៀសវាងការលួចថតចម្លង ដែលពេលនេះកំពុងធ្វើឲ្យអ្នកផលិតកុនពិបាកនឹងរកប្រាក់ចំណេញពីទីផ្សារ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ