អាពាហ៍ពិពាហ៍រវាងអ្នកស្រឡាញ់ភេទដូចគ្នានៅតែត្រូវច្បាប់ហាមប្រាម
ប្រទេសបារាំងនៅតែមិនអនុញ្ញាតជានិច្ចឲ្យមានអាពាហ៍ពិពាហ៍រវាងអ្នកស្រឡាញ់ភេទដូចគ្នា។ ក្រុមប្រឹក្សាធម្មនុញ្ញ នៅថ្ងៃសុក្រម្សិលមិញ ២៩មករា បានអនុម័តសេចក្តីសំរេចចិត្តរបស់ខ្លួន បន្ទាប់ពីបានទទួលពាក្យបណ្តឹងរបស់ស្រ្តីពីរនាក់ដែលប្រាថ្នាចង់ធ្វើឲ្យមានលក្ខណៈជាផ្លូវការស្របច្បាប់ការរស់នៅរួមសុខរួមទុក្ខរបស់ខ្លួន១៤ឆ្នាំមកហើយ។ សមាជិកក្រុមប្រឹក្សាធម្មនុញ្ញបានយល់ឃើញថា ការហាមប្រាមអាពាហ៍ពិពាហ៍រវាងអ្នកស្រឡាញ់ភេទដូចគ្នាមានលក្ខណៈត្រឹមត្រូវស្របតាមរដ្ឋធម្មនុញ្ញ។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
អ្នកស្រីCorinneនិងSophieទាំងពីរនាក់ស្រឡាញ់គ្នារស់នៅតំបន់Reims បានទាមទារសិទ្ធិរៀបការជាមួយគ្នា ដើម្បីការពារទំនុកបំរុងកូនបួននាក់របស់ខ្លួន។ក្រុមប្រឹក្សាធម្មនុញ្ញដែលគាត់បានប្តឹងប្តល់ទើបនឹងឆ្លើយប្រាប់គេថា ប្រការ៧៥និង១៤៤នៃក្រមរដ្ឋប្បវេណីដែលបដិសេធអាពាហ៍ពិពាហ៍អ្នកស្រឡាញ់ភេទដូចគ្នាមានលក្ខណៈត្រឹមត្រូវស្របតាមរដ្ឋធម្មនុញ្ញ។
ដូច្នេះគឺពុំមែនតាមផ្លូវរដ្ឋធម្មនុញ្ញនោះទេដែលគោលជំហរស្តីពីបញ្ហាអាពាហ៍ពិពាហ៍នេះនឹងវិវឌ្ឍ។ប៉ុន្តែ ចាប់ពីអំណើះតទៅ គ្មានអ្វីនឹងឃាត់ឃាំងរដ្ឋាភិបាលកុំឱ្យតាក់តែងច្បាប់នោះទេ។គេនៅនឹកចងចាំបញ្ហាអ្នកស្រឡាញ់ភេទដូចគ្នាមានសិទ្ធិអាចចិញ្ចឹមកុមារធ្វើជាកូនគឺក្រុមប្រឹក្សាធម្មនុញ្ញបានផ្ទុកផ្តាក់ឱ្យពួកអ្នកនយោបាយជាអ្នកសំរេចចិត្តក្នុងបញ្ហានេះ។
សេចក្តីសំរេចចិត្តអំពីអាពាហ៍ពិពាហ៍រវាងអ្នកស្រឡាញ់ភេទដូចគ្នាពុំគួរឱ្យភ្ញាក់ផ្អើលឡើយ ដ្បិតលោកប្រធានក្រុមប្រឹក្សាធម្មនុញ្ញ Jean-Louis Debréបានថ្លែងកាលពីប៉ុន្មានថ្ងៃមុនថា សមាជិកក្រុមប្រឹក្សាធម្មនុញ្ញគ្មានបេសកកម្មត្រូវធ្វើជម្រើសក្នុងបញ្ហាសង្គមនោះទេ។
ក៏ប៉ុន្តែពួកសកម្មជនការពារមូលហេតុអ្នកស្រឡាញ់ភេទដូចគ្នាបានសង្ឃឹមទៅលើសញ្ញាដ៏ខ្លាំងមួយ ដើម្បីធ្វើឱ្យចម្រើនជឿនលឿនទៅមុខការប្រយុទ្ធតស៊ូរបស់ខ្លួន” យើងទើបនឹងធ្វើឱ្យកន្លងផុតទៅខណៈមួយជាប្រវត្តិសាស្ត្រ “ -នេះជាការថ្លែងរបស់ស្ត្រីជាមេធាវី Caroline Mécary ដែលតំណាងសមាគមSOS Homophobie។គាត់បានពោលបន្ថែមទៀតថា “ គឺរបៀបដែលបណ្តាជនភាគច្រើនជាអ្នកស្រឡាញ់ភេទខុសគ្នាប្រព្រឹត្តទៅលើពួកជនភាគតិចជាអ្នកស្រឡាញ់ភេទដូចគ្នាត្រូវគេវាស់វែងកំរិតនៃអរិយធម៌របស់បណ្តាជនភាគច្រើននោះ “ ។
សមូហភាពដទៃទៀតបន្ទោសបារាំងថាជាប្រទេសស្ថិតនៅក្រោយគេក្នុងចំណោមរដ្ឋប្រជាធិបតេយ្យនៅអឺរ៉ូប។ គេរំឭកប្រាប់ថា ប្រទេសជាច្រើន ដូចយ៉ាង ប៊ែលហ្ស៊ិក ហុល្លង់ អេស្ប៉ាញ ព័រទុយហ្កាល់ អនុញ្ញាតឲ្យគ្រប់ជនដែលស្រឡាញ់ភេទដូចគ្នារៀបការជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ