ជនជាតិភាគតិចរ៉ូហ៊ីងយ៉ានាំគ្នាភៀសខ្លួនចេញពីភូមាយ៉ាងគំហុក
ជនជាតិភាគតិច គ្មានទឹកគ្មានដី រ៉ូហ៊ីងយ៉ា បាននាំគ្នារត់ភៀសខ្លួនទាំងហ្វូងៗ ចេញពីប្រទេសភូមា ក្នុងរយៈពេលចុងក្រោយនេះ។ បើអង្គការក្រៅរដ្ឋាភិបាល ក្នុងរយៈពេលតែពីរសប្តាហ៍នេះសោះ មានជនជាតិរ៉ូហ៊ីងយ៉ា ប្រមាណ ១ម៉ឺននាក់ បាននាំគ្នាចុះទូករត់ ចាកចេញពីភូមា។
ចុះផ្សាយនៅថ្ងៃ៖
ស្តាប់ - ០១:៥៧
មិនធ្លាប់មានឡើយ ការរត់ភៀសខ្លួនទាំងហ្វូងៗយ៉ាងដូច្នេះពីមុនមក ! នេះបើតាមនាយកអង្គការការពារសិទ្ធិមនុស្សរ៉ូហ៊ីងយ៉ា Arakan Project។ អង្គការក្រៅរដ្ឋាភិបាល ក្នុងស្រុកដែលត្រូវបានគេចាត់ទុកជាបង្អែកសម្រាប់តាមដានស្ថានភាពជនជាតិភាគតិចរ៉ូហ៊ីងយ៉ានៅភាគខាងលិចភូមា បានបន្ថែមទៀតថា មូលហេតុនៃការសម្រុកចេញនាពេលនេះ ទំនងជាជនជាតិរ៉ូហ៊ីងយ៉ាដឹងថាលែងមានអ្វីត្រូវរង់ចាំពីរដ្ឋរ៉ាឃិនទៀតហើយ។
បើតាមទិន្នន័យ ជនជាតិរ៉ូហ៊ីងយ៉ា ប្រមាណជាង ១សែននាក់ ដែលអង្គការសហប្រជាជាតិបានចាត់ទុកជាជនជាតិភាគតិចរងគ្រោះខ្លាំងជាងគេនៅលើពិភពលោក បាននាំគ្នាភៀសខ្លួនចេញពីភូមា តាមផ្លូវសមុទ្ទ តាំងពីខែមិថុនា ២០១២មក។ ឆ្នាំដែលមានអំពើហិង្សាផ្ទុះឡើងខ្លាំងរវាងក្រុមអ្នកកាន់ព្រះពុទ្ធសាសនា និងជនជាតិរ៉ូហ៊ីងយ៉ា កាន់សាសនាអ៊ីស្លាម រហូតមានស្លាប់ជាង២០០នាក់ និងជនភៀសខ្លួន ភាគច្រើនជាក្រុមជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ា។
ក្រុមនេះបន្តរស់នៅក្នុងជំរំរខេករខាក និងលក្ខខណ្ឌយ៉ាងត្រដាបត្រដួស។ ដោយប្រថុយនឹងមរណៈ ជនជាតិភាគតិចរ៉ូហ៊ីងយ៉ា សុខចិត្តការរត់ភៀសខ្លួនតាមសមុទ្ទ ដោយទូកតូចៗ សំដៅជាពិសេសទៅប្រទេសម៉ាឡេស៊ី កាន់តែច្រើនឡើងៗ ក៏ព្រោះតែមានលេចធ្លាយព័ត៌មានស្តីពីគម្រោង “ផែនការសកម្ម” របស់រដ្ឋាភិបាលភូមាថ្មី ដែលចង់ដាក់បង្ខំឱ្យពួករ៉ូហ៊ីងយ៉ា រស់នៅតែក្នុងជំរំ។
ប៉ុន្តែអាជ្ញាធរភូមា បានបដិសេធដំណឹងនេះ និងបានបរិហារថាមានការឃោសនាបំបោងព័ត៌មានពីសំណាក់ក្រុមរ៉ូហ៊ីងយ៉ាខ្លួនឯង។ បើតាមអ្នកនាំពាក្យរដ្ឋរ៉ាឃិន គ្មានទេការចាប់ខ្លួន ឬការធ្វើទារុណកម្មលើជនជាតិភាគតិចនេះ។ ក្នុងពេលធ្វើជំរឿន ជាលើកទីមួយ តាំងពីជាង៣០ឆ្នាំមក ជនជាតិរ៉ូហ៊ីងយ៉ា ភាគច្រើនមិនត្រូវបានចុះឈ្មោះរាប់ក្នុងបញ្ជីទេ ព្រោះខ្លាចគេដឹងថាជាជនជាតិភាគតិចកាន់សាសនាអ៊ីស្លាម មានការស្អប់ខ្ពើម បង្កភាពតានតឹងនាំដល់អំពើហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ