បុគ្គលិករថភ្លើងក្រោមដី នៅប្រេស៊ីលធ្វើកូដកម្ម មួយសប្តាហ៍មុនការប្រកួតបាល់ទាត់ពិភពលោក
នៅប្រមាណជាមួយសប្តាហ៍ទៀតប៉ុណ្ណោះ ការប្រកួតកីឡាបាល់ទាត់ពិភពលោក នៅប្រទេសប្រេស៊ីល នឹងត្រូវចាប់ផ្តើម។ ប៉ុន្តែគេមានការព្រួយបារម្ភជាខ្លាំងដោយបុគ្គលិកអ្នកបម្រើការងារក្នុងប្រពន្ធ័រថភ្លើងក្រោមដី នៅទីក្រុងសាវប៉ូឡូ បានសម្រេចធ្វើកូដកម្មដោយគ្មានពេលកំណត់ នៅថ្ងៃព្រហស្បត៍នេះ ។ កូដកម្មនេះអាចនឹងបង្ករឲ្យមានការរាំងស្ទះដល់ប្រពន្ធ័ដឹកជញ្ជូន នៅទីក្រុងសាវប៉ូឡូ ទីក្រុងដែលនឹងមានរៀបចំការ ប្រកួតបើកឆាករវាងក្រុមកីឡាករប្រទេសប្រេស៊ីល និង ប្រទេសក្រូអាស៊ី។
ចុះផ្សាយនៅថ្ងៃ៖
ស្តាប់ - ០២:២៣
ប្រពន្ធ័រថភ្លើងក្រោមដីនៅទីក្រុងសាវប៉ូឡូ ជា មធ្យោបាយធ្វើដំណើរ ដ៏សំខាន់បំផុតឆ្ពោះទៅពហុកីឡាដ្ឋាន ដែល ពហុកីឡាដ្ឋានដ៏ទំនើបមួយនេះ ទើបតែត្រូវបានសាងសង់ឡើងដើម្បី ទទួលរៀបចំសម្ភោធបើកការប្រកួតកីឡាបាល់ទាត់ពិភពលោក ដែលនឹងចាប់ផ្តើមនៅថ្ងៃទី ១២មិថុនា ខាងមុខនេះ។
សហជីពការពារបុគ្គលិកទាំង ១ម៉ឺននាក់ បានសម្រេចធ្វើកូដកម្មនេះបន្ទាប់ពីមានការចចារមិនបានសំរេច លើការទាមទារដំឡើងបា្រក់ខែ។ សហជីពបានសុំ ដំឡើងចំនួន ១៦,៥% ប៉ុន្តែរដ្ឋាភិបាលក្រុងសាវប៉ូឡូយល់ព្រមដំឡើងតែចំនួន ៧,៨% ប៉ុណ្ណោះ។ បើតាមសហជីព ការផ្តល់ឲ្យរបស់រដ្ឋាភិបាល គឺមិនបានធ្វើឡើងដោយយោងទៅតាមស្ថានភាពជាក់ស្តែងនៃអត្រាតំលៃទំនិញសព្វសារពើ ដែលកាន់តែឡើងថ្លៃទៅៗ នោះទេ។
គួររំលឹកផងដែរថា កាលពីខែមិថុនាឆ្នាំទៅ ទីក្រុងសាវប៉ូឡូ ក៏បានប្រឈមមុខនឹងវិបត្តសង្គមរបៀបនេះរួចមកហើយ ដែលកាលនោះ មានក្រុមបាតុករជាច្រើនម៉ឺននាក់ ដែលភាគច្រើនជាសិស្ស និស្សិត បាននាំគ្នាស្រែកទាមទារសុំឲ្យពួកគេអាចធ្វើដំណើរតាមប្រពន្ធ័ដឹកជញ្ជូនសាធារណ:ដោយឥតគិតថ្លៃ។ ប៉ុន្តែកាលនោះក្រុមបាតុករ ត្រូវបានអជ្ញាធរបង្ក្រាបយ៉ាងចាស់ដៃ។
ប្រជាជនជាច្រើនលាននាក់បានរិះគន់រដ្ឋាភិបាល ថាបានខ្ជះខ្ជាយថវិការរដ្ឋចំនួន១១ពាន់លានដុល្លា ក្នុងការរៀបចំការប្រកួតកីឡាបាល់ទាត់ពិភពលោក។ រដ្ឋាភិបាលគួរណាស់ តែប្រើបា្រស់បា្រក់ទាំងនោះ ក្នុងការសាងសង់ហេដ្ឋារចនាសម្ពន្ធ័ដឹកជញ្ជូនសាធារណ: វិសយ័សុខាភិបាល រឺ វិសយ័អប់រំជាដើម។ មួយឆ្នាំកន្លងមកនេះ រដ្ឋាភិបាលមិនបានធ្វើអ្វីទាល់តែសោះ។
បើយោងតាមសំដីរបស់លោកប្រធានអង្ការក្រៅរដ្ឋាភិបាលមួយរូប ថ្វីដ្បិតប្រទេសប្រេស៊ីលស្ថិតក្នុងលំដាប់ទី៧ ក្នុងចំណោមប្រទេសដែលមានសេដ្ឋកិច្ចលូតលាស់ ប៉ុន្តែប្រទេសនេះប្រឈមមុខនឹង វិបត្តសង្គមជាច្រើន។ ក្នុងមួយឆ្នាំៗ មានឃាតុកម្ម ប្រមាណជា៥ម៉ឺនករណី។ លោកបន្តថាប្រជាជនមានការខឹងសម្បារកាន់តែខ្លាំងឡើងៗ ដោយឃើញថវិការរដ្ឋ ជាច្រើនពាន់លានត្រូវចំណាយទៅលើការសាងសង់ពហុកីឡាដ្ឋានដោយឥតប្រយោជន៍។
ប៉ុន្មានឆ្នាំកន្លងមកនេះប្រទេសប្រេស៊ីលមានកំនើនសេដ្ឋកិច្ចខ្ពស់ជាលំដាប់ ហើយការទទួលរៀបចំ កីឡាបាល់ទាត់ពិភពលោកឆ្នាំនេះ ត្រូវបានគេរំពឹងថានឹងមានការហូរចូលនូវវិនិយោគទនកាន់តែ ច្រើន។ ប៉ុន្តែបន្ទាប់ពីទទួលរងនូវអតិផរណាចំនួន៦,៥% មួយឆ្នាំកន្លងមកនេះ អ្វីៗហាក់ដូចជារាំងស្ទះ ហើយជីវភាពរបស់ប្រជាជនកាន់តែលំបាកទៅ។ ទាំងនេះហើយ ដែលបានជំរុញ ឲ្យប្រជាជនបះបោរ ធ្វើបាតុកម្មជាបន្តបន្ទាប់។ តែទោះជាយ៉ាងណា កូដកម្មលើកនេះខុសប្លែកពី លើកមុន ដោយថាប្រជាពលរដ្ឋហាក់មានការភយ័ខ្លាចនូវការបង្ក្រាបដោយហឹង្សា នឹងការធ្វើទុក្ខបុកម្នេញពីសំណាក់អជ្ញាធរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ