បារាំងបញ្ចុះបញ្ចូលកាណាដាឲ្យបង្កើនការចូលរួមប្រយុទ្ធប្រឆាំងនឹងបម្រែបម្រួលអាកាសធាតុ
ក្នុងសន្ទរកថាជាងកន្លះម៉ោងថ្លែងទៅកាន់សមាជិកសភានិងរដ្ឋាភិបាលនៅឯវិមានរដ្ឋសភានាទីក្រុង អូតាវ៉ាកាលពីព្រឹកថ្ងៃចន្ទ លោកប្រធានាធិបតីបារាំងហ្រ្វង់ស្វ័រហូឡង់ បានថ្លែងផ្តោតជាសំខាន់ពី កាលានុវត្តភាពនៃការអភិវឌ្ឍន៍ចំណងសេដ្ឋកិច្ចបារាំងកាណាដាក្នុងការធ្វើអាជីវកម្មធនធានធម្មជាតិ តែមិនភ្លេចទទូចស្នើឲ្យកាណាដាបង្កើនការចូលរួមប្រយុទ្ធប្រឆាំងនឹងបម្រែបម្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
លោកហ្រ្វង់ស្វ័រហូឡង់បានចាប់ផ្តើមសន្ទរកថាដោយថ្លែងរំលឹកហេតុការណ៍ដ៏សោកនាដកម្មកាលពីថ្ងៃទី ២២តុលាកន្លងទៅ ដែលបណ្តាលឲ្យយោធិន ណាតង់ សុីរីឡូស្លាប់បាត់បង់ជីវិតនៅបូជនីយដ្ឋានរំលឹក វិញ្ញាណក្ខន្ធសង្រ្គាមក្បែរវិមានរដ្ឋសភា។ លោកបានថ្កោលទោសអំពើព្រៃផ្សៃនេះ ព្រមទាំងរំលឹកថា ទាំងបារាំង ទាំងកាណាដាសុទ្ធតែមានគោលជំហរប្រយុទ្ធប្រឆាំងនឹងអំពើភេវកម្ម និងបានដឹកនាំទ័ពវាយ ប្រយុទ្ធនឹងអង្គការរដ្ឋអ៊ីស្លាមដូចគ្នា។
ក្នុងសន្ទរកថាដដែលនោះលោកបានលើកឡើងពីកាលានុវត្តភាពនៃការរឹតចំណងកិច្ចសហប្រតិ្តបត្តិការ សេដ្ឋកិច្ច ការផ្តោះផ្តូរពាណិជ្ជកម្ម និង ពោលកោតសរសើរ ពីភាពមានបានខាងធនធានធម្មជាតិរបស់ ខេត្តអាល់បែរតាដែលលោកទើបនឹងបានបំពេញទស្សនៈកិច្ច។
តែលោកមិនភ្លេចទទូចស្នើឲ្យកាណាដា បង្កើនការចូលរួមប្រយុទ្ធប្រឆាំងនឹងបម្រែបម្រួលអាកាសធាតុ តាមរយៈការកាត់បន្ថយ ការសាយភាយ ឧស្ម័នកាបូនិក។ លោកហូឡង់ ក៏ធ្លាប់បានបញ្ចុះបញ្ជូលម្តងរួចមកហើយកាលពីជំនួបជាមួយលោក នាយករដ្ឋមន្រ្តីស្ទីវិនហាភឺនាថ្ងៃអាទិត្យនៅទីក្រុងកាល់ហ្ការី។ នៅទីនោះ លោកបាននិយាយថា បារាំងនិង កាណាដា នឹងពួតដៃគ្នាក្នុងការដោះស្រាយបញ្ហា បរិស្ថាននិង អាកាសធាតុ។
បើទោះជាកាណាដានិងបារាំង អាចមានផលប្រយោជន៍ខុសគ្នា តែយើងមានក្តីបារម្ភដូចគ្នា ហើយយើងនឹងធ្វើការរួមគ្នាសម្រាប់សន្និសីទអាកាសធាតុដែលនឹងត្រូវប្រារព្ធឡើងនៅក្នុងទីក្រុង ប៉ារីស នៅចុងឆ្នាំ២០១៥។
នៅថ្ងៃចន្ទនេះក្នុងសន្ទរកថាថ្លែងទៅកាន់សមាជិករដ្ឋសភា និងរដ្ឋាភិបាលទាំងអស់ លោកបានលើកឡើង ពីរបាយការណ៍កាលពីថ្ងៃអាទិត្យរបស់ក្រុមអ្នកស្រាវជ្រាវនៃអង្គការសហប្រជាជាតិ ជាសក្ខីភាពដែលមិនអាចប្រកែកបាន ពីគ្រោះអាសន្នដែលនឹងអាចកើតមានចំពោះភពផែនដី ពីការកើនកំដៅផែនដី និងថានេះមិនមែនជាបញ្ហាសំរាប់ទីកន្លែងមួយឬតំបន់មួយប៉ណ្ណោះទេ តែវាគឺជាបញ្ហាសំរាប់ភពផែនដីទាំងមូលដែលទាមទារឲ្យមានការចូលរួមពីគ្រប់រដ្ឋទាំងអស់ក្នុងពិភពលោក។
ហើយលោកសង្ឈឹមថា កាណាដានឹងចូលរួមយ៉ាងពេញទំហឹងក្នុងការប្រយុទ្ធប្រឆាំងនឹងបម្រែបម្រួល អាកាសធាតុនេះ។ គួរំលឹកផងដែរថា ប្រទេសកាណាដា កាលពីខែធ្នូឆ្នាំ២០១១ បានដកខ្លួនចេញពី ពិធីសារក្យូតូស្តីពីការកាត់បន្ថយការបំភាយឧស្ម័នផ្ទះកញ្ចក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ