សកម្មជនប្រឆាំងអំពើពុករលួយនៅឥណ្ឌា គឺលោក Anna Hazare ត្រូវបានអាជ្ញាធរឥណ្ឌាដោះលែងវិញហើយ បន្ទាប់ពីត្រូវបានប៉ូលិសចាប់ឃុំខ្លួន តាំងពីថ្ងៃអង្គារ ដោយសារតែលោកបានរៀបចំធ្វើកូដកម្មអត់អាហារ ដើម្បីប្រឆាំងនឹងសេចក្តីព្រាងច្បាប់ប្រឆាំងអំពើពុករលួយ ដែលលោកយល់ថា មានលក្ខណៈធូររលុងពេក។ ការចាប់ខ្លួនលោក Anna Hazare បានបណ្តាលឲ្យចលនាប្រឆាំងអំពើពុករលួយបានផ្ទុះឡើង នៅទូទាំងប្រទេស។ ឥណ្ឌាតែងតែត្រូវបានគេទទួលស្គាល់ថាជាប្រទេសប្រជាធិបតេយ្យដ៏ធំមួយ ក៏ប៉ុន្តែ អំពើពុករលួយកំពុងស៊ីរូងនៅស្ទើរតែគ្រប់ស្រទាប់សង្គម។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងរយៈពេលតែប៉ុន្មានថ្ងៃប៉ុណ្ណោះ លោក Anna Hazare បានក្លាយទៅជាមហាត្មះគន្ធី នៅសតវត្សរ៍ទី២១។ កាលពីថ្ងៃពុធ មួយថ្ងៃក្រោយពីប៉ូលិសចាប់ខ្លួនលោក Hazare មនុស្សរាប់ម៉ឺននាក់បាននាំគ្នាចេញធ្វើបាតុកម្ម នៅទូទាំងប្រទេសឥណ្ឌា ដើម្បីគាំទ្រចលនាប្រឆាំងអំពើពុករលួយ ដឹកនាំដោយលោក Hazare ។
ប្រឈមមុខនឹងចលនាប្រឆាំងរដ្ឋាភិបាលដ៏ធំបំផុត ដែលកម្រនឹងជួបប្រទះបែបនេះ រដ្ឋាភិបាលឥណ្ឌាក៏បានសុខចិត្តដោះលែងលោក Anna Hazare វិញ ក៏ប៉ុន្តែ លោកបានបដិសេធមិនចេញពីមន្ទីរឃុំឃាំង ដោយសារតែអាជ្ញាធរបានហាមឃាត់លោកមិនឲ្យធ្វើកូដកម្មអត់អាហារ។
ក្រោយពីឆ្លងកាត់ការចរចាគ្នា លោក Hazare ក៏បានសុខចិត្តចេញពីមន្ទីរឃុំឃាំង ក្រោយពីរដ្ឋាភិបាលអនុញ្ញាតឲ្យលោកធ្វើកូដកម្មអត់អាហារ នៅទីសាធារណៈ រួមជាមួយនឹងអ្នកគាំទ្ររបស់លោក ក៏ប៉ុន្តែ ការធ្វើកូដកម្មនេះអនុញ្ញាតឲ្យធ្វើតែក្នុងរយៈពេល ១៥ថ្ងៃប៉ុណ្ណោះ។
គួររំឭកថា តាមគម្រោង កាលពីថ្ងៃអង្គារ លោក Anna Hazare ចង់ធ្វើកូដកម្មអត់អាហារនៅទីសាធារណៈ រហូតដល់ស្លាប់ ប្រសិនបើរដ្ឋាភិបាលមិនពង្រឹងវិធានការកម្ចាត់អំពើពុករលួយទេនោះ។
ក្នុងមួយរយៈកាលចុងក្រោយនេះ រដ្ឋាភិបាលរបស់លោកម៉ាន់មហាន់ ស៊ិញ (Manmohan Singh) មានជាប់ពាក់ព័ន្ធនឹងរឿងរ៉ាវអាស្រូវពុករលួយជាច្រើន។ អតីតរដ្ឋមន្រ្តីក្រសួងទូរគមនាគមន៍របស់លោកស៊ិញ កំពុងតែប្រឈមមុខនឹងការចោទប្រកាន់ ជុំវិញភាពមិនប្រក្រតី ក្នុងការផ្តល់អាជ្ញាប័ណ្ណដល់ក្រុមហ៊ុនឯកជន ដែលបណ្តាលឲ្យរដ្ឋខាតបង់ប្រាក់ចំណូលប្រមាណ ៣៩ពាន់លានដុល្លារ។
ក៏ប៉ុន្តែ ប្រជាជនឥណ្ឌា ដែលចេញធ្វើបាតុកម្មប្រឆាំងអំពើពុករលួយ នៅពេលនេះ មិនមែនប្រឆាំងតែនឹងអំពើពុករលួយនៅថ្នាក់កំពូលៗនោះទេ ប៉ុន្តែ សំខាន់ គឺប្រឆាំងនឹងអំពើពុករលួយ ដែលពួកគេជួបប្រទះនៅក្នុងការរស់នៅប្រចាំថ្ងៃ។ ការទារសំណូកកើតមាននៅស្ទើរតែគ្រប់កន្លែង រាប់ចាប់តាំងពីការសុំអាជ្ញាប័ណ្ណធ្វើជំនួញ រហូតដល់ការសុំសេចក្តីចម្លងសំបុត្រកំណើត ឬការចុះឈ្មោះចូលរៀននៅសកលវិទ្យាល័យ។
ឥណ្ឌាមិនមែនជាប្រទេសកាន់អំណាចផ្តាច់ការ ដូចជានៅបណ្តាប្រទេសអារ៉ាប់នោះទេ។ ក៏ប៉ុន្តែ មានអ្នកវិភាគខ្លះយល់ថា ចលនាប្រឆាំងនឹងអំពើពុករលួយនៅពេលនេះអាចនឹងរាលដាលទៅជាបដិវត្តន៍មួយ ប្រសិនបើរដ្ឋាភិបាលមិនចាត់វិធានការដោះស្រាយបញ្ហាឲ្យបានហ្មត់ចត់ទេនោះ៕
