អតីតហេរញ្ញិកគណបក្សកាន់អំណាចជាប់ពន្ធនាគារពីបទពុករលួយ
អតីតហេរញ្ញិកគណបក្សប្រជាធិបតេយ្យដែលជាគណបក្សរបស់គណបក្សកាន់អំណាច ត្រូវបានតុលាការប្រឆាំងអំពើពុករលួយនៅទីក្រុង ហ្សាការតាផ្តន្ទាទោសនៅថ្ងៃសុក្រ២០មេសានេះ ឲ្យជាប់ឃុំឃាំងក្នុងពន្ធនាគារចំនួន៤ឆ្នាំ ១០ខែ បន្ទាប់ពីការជំនុំជំរះលើសំណុំរឿងអាស្រូវពុករលួយមួយដែលបានលេចឮសូរខ្ចខា្ចយពេញប្រទេសឥណ្ឌូណេស៊ី ។ ករណីនេះ បានធ្វើគណបក្សលោកប្រធានាធិបតី មានការទើសទាល់ចិត្តយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
តុលាការប្រឆាំងអំពើពុករលួយនៅទីក្រុងហ្សាការតា បានទទួលស្គាល់ការជាប់ពិរុទ្ធរបស់លោក Muhammad Nazaruddin អតីតហេរិញ្ញិកគណបក្សប្រជាធិបតេយ្យកាន់រដ្ឋអំណាចពីបទ ពុករលួយ ។ លោក Nazaruddin ធ្លាប់បានទទួលប្រាក់សំណូកចំនួន ៤៦០០ លាន រូពី ស្មើ នឹង ៣៨ ម៉ឺនអឺរ៉ូ ក្នុងការ ប្រគល់កិច្ចសន្យាសាងសង់ភូមិមួយសម្រាប់ល្បែងកីឡាអត្តពលកម្មនៃភូមិភាគអាស៊ីអគ្នេយ៍ ដែលបានប្រព្រឹត្តទៅនៅខែវិច្ឆិកាឆ្នាំ២០១១ ក្នុងប្រទេសឥណ្ឌូណេស៊ី។
«ជនជាប់ចោទ បានធ្វើឲ្យអាប់មុខមាត់ដល់រដ្ឋាភិបាលឥណ្ឌូណេស៊ី ដែលបានខិតខំប្រឹងប្រែងប្រយុទ្ធកំចាត់ទល់នឹងអំពើពុករលួយនៅក្នុងប្រទេស »- នេះជាការថ្លែងប្រាប់របស់លោកចៅក្រម Darmawati Ningsih និងបានប្រកាសសេចក្តីវិនិច្ឆ័យទោសថា ជនជាប់ចោទត្រូវបង់ពិន័យប្រាក់ចំនួន ២០០ លានរូពីឬស្មើនឹង១ .៦៦០០អឺរ៉ូ ទៀត ។
លោក Nazaruddinធ្លាប់បានរត់គេចខ្លួនទៅនៅប្រទេសកូឡុមប៊ីក៏ប៉ុន្តែ ត្រូវបានអាជ្ញាធរកូឡុមប៊ីចាប់បញ្ជូនខ្លួនមកឲ្យប្រទេសឥណ្ឌូនេស៊ីវិញកាលពីខែសីហា២០១១។
សំណុំរឿងអាស្រូវរបស់អតីតហេរញ្ញិកគណបក្សកាន់អំណាចនៅឥណ្ឌូណេស៊ីដែលត្រូវបានគ្រប់កាសែតក្នុងស្រុកលើកបរិហារយ៉ាងភ្លូកទឹកភ្លូកដីនៅលើទំព័រទី១របស់ខ្លួនអស់រយៈពេលដ៏យូរខែ និងបានធ្វើឲ្យលោកប្រធានាធិបតី SusiloBambang Yudhono មានការទើសទាល់ចិត្តយ៉ាងខ្លាំង ពីព្រោះ លោកបានជាប់ឆ្នោតប្រធានាធិបតីឥណ្ឌូណេស៊ីទាំងពីរលើកនៅឆ្នាំ ២០០៤ និង ២០០៩ គឺដោយសារតែកម្មវិធីមួយរបស់លោក គឺការប្រយុទ្ធប្រឆាំងទល់នឹងអំពើពុករលួយ ។
ដោយមិនព្រមសុខចិត្តទទួលទោសតែម្នាក់ឯងគត់ លោក Nazaruddin -បាននិយាយ ចោទប្រកាន់ទៅលើអ្នកទទួលខុសត្រូវមួយចំនួនធំផ្សេងទៀតនៅពេលជំនុំជំរះជាអាទិ៍ ទៅលើប្រធានគណបក្សប្រជាធិបតេយ្យឥណ្ឌូណេស៊ី លោក Anas Urbaningrum តែ លោកប្រធានគណបក្ស បានបដិសេធ យ៉ាងដាច់អហង្ការាល់ការគៃបន្លំ។
គួរបញ្ជាក់ដែរថា សំណុំរឿងអាស្រូវទាំងនេះ បានផ្ទុះឡើង នៅតែពីរឆ្នាំទៀតប៉ុណ្ណោះដល់ថ្ងៃរៀបចំ ការបោះឆ្នោតប្រធានាធិបតីឥណ្ឌូណេស៊ីលើកក្រោយនៅឆ្នាំ២០១៤-ការបោះឆ្នោត-ដែលមកទល់ពេលនេះ នរណាក៏គិតដែរថា លោក Anas Urbaningrum នេះ អាចនឹងឈរឈ្មោះជាបេក្ខជនប្រធានាធិបតីឥណ្ឌូណេស៊ីនាពេលខាងមុខនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ