អាជ្ញាធរឥណ្ឌូណេស៊ីឃាត់ខ្លួនប្រធានតុលាការធម្មនុញ្ញពីបទពុករលួយ
យោងតាមប្រភពព័ត៌មានផ្លូវការឥណ្ឌូណេស៊ី នៅថ្ងៃព្រហស្បតិ៍ម្សិលមិញនេះ អាជ្ញាធរឥណ្ឌូណេស៊ីបានឃាត់ខ្លួនប្រធានតុលាការធម្មនុញ្ញ គឺលោក អាគីល មុច្ឆតា Akil Mochtar ជាប់ចោទពីបទស៊ីសំណូកពុករលួយ។ លោក មុច្ឆតា ជាមន្ត្រីស្ថិតក្នុងប្រព័ន្ធយុត្តិធម៌ជាន់ខ្ពស់បំផុត នៅក្នុងប្រទេស។
ចុះផ្សាយនៅថ្ងៃ៖
អាគីល មុច្ឆតា ជាប្រធានតុលាការធម្មនុញ្ញ ត្រូវបានអាជ្ញាធរឃាត់ខ្លួន កាលពីល្ងាចថ្ងៃពុធកន្លងទៅ ពីបទបានទទួលសំណូកទឹកប្រាក់ប្រមាណ ១៨ម៉ឺន៤ពាន់អឺរ៉ូ ដើម្បីជួយជនដែលសូកលុយលោកនោះ ដោះស្រាយរឿងរ៉ាវពាក់ព័ន្ធនឹងការបោះឆ្នោត។ នេះបើយោងតាមការប្រាប់អោយដឹង របស់គណៈកម្មការកំចាត់អំពើពុករលួយឥណ្ឌូណេស៊ី។
រឿងអាស្រូវពុករលួយនេះ បានធ្វើអោយលោក អាគីល មុច្ឆតា ក្លាយជាអ្នកទទួលខុសត្រូវជាន់ខ្ពស់ចុងក្រោយគេ ដែលត្រូវអាជ្ញាធរឃាត់ខ្លួន។ តំណែងជាប្រធានតុលាការធម្មនុញ្ញ ស្ថិតក្នុងតំណែងផ្នែកយុត្តិធម៌ជាន់ខ្ពស់បំផុត នៅឥណ្ឌូណេស៊ី។ ការឃាត់ខ្លួនចៅក្រមជាន់ខ្ពស់រូបនេះ បានធ្វើអោយប្រធានាធិបតី បាំបង់ យូដូយ៉ូណូ ភ្ញាក់ផ្អើល រហូតថ្លែងសន្ទរកថា ថា លោកអាចដឹងបានពីអារម្មណ៍របស់ប្រជាជនប្រជាជនឥណ្ឌូណេស៊ីដែលខឹងសម្បារ និងទទួលការប៉ះទង្គិចចិត្ត ដោយសារតែរឿងនេះ។
ឥណ្ឌូណេស៊ីចាត់ទុកអំពើពុករលួយ ថាជាជំងឺរាតត្បាត។ ក្នុងខែសីហាកន្លងមក រឿងពុករលួយ បានធ្វើអោយអាជ្ញាធរឃាត់ខ្លួនមន្ត្រីជាន់ខ្ពស់មួយរូបទៀតដែរ ដែលជាប្រធានទីភ្នាក់ងារនៃភាពទៀងទាត់ផ្នែកថាមពលឥណ្ឌូណេស៊ី។ គេសង្ស័យថា មន្ត្រីរូបនេះបានទទួលសំណូក ៦សែនដុល្លារ។
ក្នុងរឿងពុករលួយនេះ អង្គការតម្លាភាពអន្តរជាតិ បានដាក់ប្រទេសឥណ្ឌូណេស៊ី ក្នុងចំណាត់ថ្នាក់ទី១១៨ ក្នុងចំណោមប្រទេសសរុប ចំនួន ១៧៦ គឺជាចំណាត់ថ្នាក់អន់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ