ការបារម្ភទៅលើជោគវាសនារបស់ជនអ៊ុយហ្គួរដែលកម្ពុជាបានធ្វើបត្យាប័ន
ក្រុមអ្នកការពារជនអ៊ុយហ្គួរបានប្រកាសអំពាវនាវនៅថ្ងៃសុ្រនេះ ឲ្យទីក្រុងប៉េកាំងឆ្លើយបំភ្លឺទៅលើជោគវាសនារបស់ជនអ៊ុយហ្គួរ២០នាក់ដែលជាជនជាតិពន្ធុភាគតិចរស់នៅតំបន់ស៊ីនជាំងឋិតនៅប៉ែកពាយ័ព្យនៃប្រទេសចិន ហើយដែលត្រូវបានធ្វើបត្យាប័នដោយប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
បើយោងតាមប្រភពព័ត៌មានខ្លះបានឲ្យដឹងថា ជនជាតិពន្ធុភាគតិចអ៊ុយហ្គួរ៤នាក់ក្នុងចំណោមជនជាតិអ៊ុយហ្គួរជាច្រើននាក់ទៀតដែលបានរត់គេចចេញពីប្រទេសចិន ក្រោយពីមានកុបកម្មរវាងជាតិពន្ធុនៅឆ្នាំ២០០៩នៅទីក្រុង Urumqi ដែលជាទីក្រុងធំជាងគេនៃតំបន់ស៊ីនជាំង បានត្រូវតុលាការចិនកាត់ទោសប្រហារជីវិត ហើយ១៤នាក់ទៀតត្រូវជាប់ពន្ធនាគារមួយជីវិត។
ប៉ុន្តែរដ្ឋាភិបាលចិនបដិសេធពុំព្រមធ្វើការឆ្លើយបំភ្លឺទៅលើជោគវាសនារបស់ជនអ៊ុយហ្គួរទាំងនោះឡើយ។ នេះបើយោងតាម សមាជពិភពលោកអ៊ុយហ្គួរ ដែលមានទីស្នាក់ការនៅទីក្រុង Munich នៃប្រទេសអាល្លឺម៉ង់។
ជនជាតិអ៊ុយហ្គួរ២០នាក់នេះបានដាក់ពាក្យសុំលក្ខន្តិកៈជាជនភៀសខ្លួននយោបាយនៅប្រទេសកម្ពុជា ក៏ប៉ុន្តែបានត្រូវកម្ពុជាធ្វើបត្យាប័នបញ្ជូនទៅប្រទេសចិនវិញនៅខែធ្នូឆ្នាំ២០០៩។ សេចក្តីសម្រេចចិត្តដ៏ឆាប់រហ័សនេះ ធ្វើឡើងក្រោយពីប្រទេសចិនបានផ្តល់ជំនួយហើយនិងប្រាក់កម្ចីប្រមាណ១ ២០០លានដុល្លារឲ្យកម្ពុជា។ ប៉ុន្តែរដ្ឋាភិបាលចិនឆ្លើយបដិសេធទំនាក់ទំនងរវាងបញ្ហាទាំងពីរនេះ។
ដូច្នេះហើយបានជាលោកស្រី Kadeer ប្រធានសមាជពិភពលោកអ៊ុយហ្គួរបានអំពាវនាវជាថ្មីម្តងទៀត ឲ្យរដ្ឋាភិបាលបរទេសដាក់សម្ពាធទៅលើអាជ្ញាធរចិនឲ្យធ្វើការឆ្លើយបំភ្លឺទៅលើជោគវាសនារបស់ជនអ៊ុយហ្គួរដែលបានត្រូវកម្ពុជាធ្វើបត្យាប័នបញ្ជូនទៅប្រទេសចិនវិញ។
បើយយោងតាមវិទ្យុអាមេរិកាំង Radio Free Asia ជនអ៊ុយហ្គួរម្នាក់ឈ្មោះ Musa Muhamad ដែលបានត្រូវកម្ពុជាបញ្ជូនទៅប្រទេសចិនវិញនោះ បានត្រូវតុលាការនៃទីក្រុង Kashgar កាត់ទោសនៅថ្ងៃទី២០តុលាឲ្យជាប់គុក១៧ឆ្នាំ។
គួរបញ្ជាក់ថា កុបកម្មដែលបានកើតមានរវាងជនជាតិពន្ធុភាគតិចអ៊ុយហ្គួរនិងជនជាតិ Han ដែលជាជនជាតិភាគច្រើននៅប្រទេសចិននៅទីក្រុង Urumqi នៅខែកក្កដាឆ្នាំ២០០៩បានបណ្តាលឲ្យមានមនុស្សស្លាប់យ៉ាងតិច២០០នាក់ នេះបើយោងតាមប្រភពផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ