ផ្អាកសង្គ្រាមដោយអាវុធ អ៊ីស្រាអែលត្រៀមខ្លួនធ្វើសង្គ្រាមផ្លូវច្បាប់ជាមួយតុលាការ
បន្ទាប់ពីបានដាក់អាវុធផ្អាកឈប់បាញ់បណ្តោះអាសន្ន អ៊ីស្រាអែលកំពុងរៀបជើងព្រួលដើម្បីធ្វើសង្គ្រាមតាមផ្លូវច្បាប់ជាមួយតុលាការអន្តរជាតិ ដែលអ៊ីស្រាអែលប្រឈមមុខជាមួយបណ្តឹងចោទប្រកាន់ពីបទឧក្រិដ្ឋកម្មសង្គ្រាមប្រឆាំងមនុស្សជាតិ។ អ៊ីស្រាអែលថាខ្លួនមិនខ្លាចនឹងប្រឈមមុខនឹងការពិតនោះទេ ព្រោះថាខ្លួនមានភស្តុតាងគ្រប់គ្រាន់ ដើម្បីអះអាងថាការវាយប្រហាររបស់អ៊ីស្រាអែលទៅលើតំបន់ហ្គាហ្សាគឺជាការការពារខ្លួនដោយស្របច្បាប់។
ចុះផ្សាយនៅថ្ងៃ៖
ស្តាប់ - ០១:៥២
ក្រុមប្រឹក្សា សិទ្ធមនុស្សអង្គការសហប្រជាជាតិបានឲ្យដឹងថា ខ្លួនទើបបានរៀបចំបង្កើតគណៈកម្មាធិការមួយទទួលបន្ទុកស៊ើបអង្កេតជុំវិញបទឧក្រិដ្ឋប្រឆាំងមនុស្សជាតិទាំងអស់ ដែលបានកើតឡើងក្នុងពេលមានជម្លោះរវាងអ៊ីស្រាអែល និងប៉ាឡេស្ទីន ជាពិសេសការវាយប្រហារនៅតំបន់ហ្គាហ្សា នាពេលកន្លងមកនេះ។ បើទោះបីជាក្រុមប្រឹក្សានេះ មិនទាន់ដាក់ការចោទប្រកាន់ទៅលើភាគីណាមួយក៏ដោយ ក៏អ៊ីស្រាអែល បានដឹងខ្លួនទុកជាមុន ថាគ្មាននរណាក្រៅពីអ៊ីស្រាអែលទេ ដែលក្រុមប្រឹក្សាសិទ្ធមនុស្សចោទពីបទឧក្រិដ្ឋកម្មសង្គ្រាម។
ដើម្បីទប់ទល់ផ្នែកផ្លូវច្បាប់ អ៊ីស្រាអែលបានឲ្យដឹងថា ខ្លួនបានរៀបចំរួចយ៉ាងល្អិតល្អន់ អំពីប្រតិបត្តិការណ៍វាយប្រហាររបស់ខ្លួន។ អ្នកនាំពាក្យយោធាអ៊ីស្រាអែលបាននិយាយពន្យល់ថា យោធាអ៊ីស្រាអែលបានកត់ត្រាយ៉ាងច្បាស់នូវរាល់ទីតាំងវាយប្រហាររបស់ខ្លួន ដែលជាទីតាំងបាញ់គ្រាប់រ៉ុកែតរបស់ពួកហាម៉ាស។ អ្នកនាំពាក្យនេះបន្តថា ក្នុងករណីទីតាំងនោះជាទីតាំងបាញ់ផ្លោងគ្រាប់រ៉ុកែត ដូច្នេះតាមច្បាប់សង្គ្រាម អ៊ីស្រាអែលមានសិទ្ធិវាយបកទៅវិញ បើទោះទីតាំងនោះជាផ្ទះរបស់ប្រជាជនក៏ដោយ។ ដូច្នោះការវាយប្រហាររបស់អ៊ីស្រាអែលគឺជាការការពារខ្លួនដោយស្របច្បាប់។
ទន្ទឹមនឹងនោះដែរ រដ្ឋមន្ត្រីក្រសួងយុត្តិធម៌អ៊ីស្រាអែលក៏បានឲ្យដឹងផងដែរថា លោកស្រីបានរៀបចំក្រុមអ្នកច្បាប់មួយ ដើម្បីវាយបកតាមផ្លូវច្បាប់ទៅលើរាល់ការចោទប្រកាន់ទាំងអស់។ ក្រុមនោះនឹងដាក់ពាក្យបណ្តឹងបកទៅក្រុមហាម៉ាសប៉ាឡេស្ទីនវិញ ពីបទឧក្រិដ្ឋកម្មប្រឆាំងមនុស្សជាតិ ដោយបាន យកប្រជាជនស្លូតត្រង់ ធ្វើជាខែល ព្រោះបានបាញ់គ្រាប់រ៉ុកែតចេញពីដំបូលផ្ទះប្រជាជនទាំងនោះ។
មួយវិញទៀតអ៊ីស្រាអែលបានធ្វើការរិះគន់ទៅលើក្រុមប្រឹក្សាសិទ្ធិមនុស្សអង្គការសហប្រជាជាតិថាមានការលម្អៀង ដោយបានតែងតាំងលោក វីល្លៀម ឆាបាស៍ ជាប្រធានគណៈកម្មាធិការស៊ើបអង្កេត។ អ៊ីស្រាអែលថា នរណាក៏គេដឹង ថាលោកម្នាក់នេះប្រឆាំងនឹងអ៊ីស្រាអែលយ៉ាងពេញទី។ ទោះបីជាយ៉ាងណាលោក វីល្លៀម ឆាបាស៍ បានសុំឲ្យអ៊ីស្រាអែលធ្វើកិច្ចសហប្រតិបត្តិការ ក្នុងការលាតត្រដាងការពិត បើសិនជាការវាយប្រហាររបស់អ៊ីស្រាអែល ពិតជាសមមាត្រទៅនឹងការគម្រាមកំហែងរបស់ពួកហាម៉ាសប្រាកដមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ