ជប៉ុនសន្យាផ្តល់ជំនួយ១៤ពាន់លានដុល្លារដល់ប្រទេសនៅអាហ្វ្រិក
នៅក្នុងឱកាសសន្និសីទអន្តរជាតិស្តីពីតំបន់អាហ្វ្រិក ដែលបើកធ្វើ នៅក្បែររដ្ឋធានីតូក្យូ នៅថ្ងៃសៅរ៍នេះ លោកស្ហ៊ីនហ្សូ អាបេ នាយករដ្ឋមន្រ្តី ជប៉ុនបានប្រកាសសន្យាថា រដ្ឋាភិបាលជប៉ុននឹងផ្តល់ជំនួយអភិវឌ្ឍន៍ចំនួន ១៤ពាន់លានដុល្លារ ដល់បណ្តាប្រទេសនៅអាហ្វ្រិក សម្រាប់រយៈពេល ៥ឆ្នាំខាងមុខ។ លោកស្ហ៊ីនហ្សូ អាបេ ក៏បានប្រកាសឲ្យដឹងផងដែរថា លោកគ្រោងនឹងធ្វើដំណើរទៅបំពេញទស្សនកិច្ច នៅក្នុងតំបន់អាហ្វ្រិក នៅក្នុងពេលឆាប់ៗខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សន្និសីទដែលបើកធ្វើ នៅជប៉ុន នៅថ្ងៃសៅរ៍នេះ មានឈ្មោះថា សន្និសីទអន្តរជាតិតូក្យូស្តីពីការអភិវឌ្ឍន៍តំបន់អាហ្វ្រិក (Tokyo International Conference on Africa Development) ដែលតែងតែបើកធ្វើនៅរៀងរាល់ ៥ឆ្នាំម្តង។
ថ្លែងទៅកាន់មេដឹកនាំអាហ្វ្រិកប្រមាណជា ៥០រូប នៅក្នុងពេលបើកសន្និសីទ នៅព្រឹកថ្ងៃសៅរ៍នេះ លោកស្ហ៊ីនហ្សូ អាបេ បានប្រកាសឲ្យដឹងថា សម្រាប់ ៥ឆ្នាំខាងមុខ ជប៉ុននឹងផ្តល់កញ្ចប់ថវិកា ទាំងជាជំនួយសាធារណៈ និងឯកជន ដែលគិតជាទឹកប្រាក់រហូតដល់ទៅ ៣២ពាន់លានដុល្លារ សម្រាប់ប្រទេសនៅអាហ្វ្រិក។ ក្នុងកញ្ចប់ជំនួយនេះ មានប្រមាណជា ១៤ពាន់លានដុល្លារ គឺជាជំនួយអភិវឌ្ឍដោយផ្ទាល់ ផ្តល់ដោយរដ្ឋាភិបាលជប៉ុន និង ៦ពាន់ ៥រយលានដុល្លារ ជាជំនួយទ្រទ្រង់ផ្នែកហេដ្ឋារចនាសម្ព័ន្ធ ហើយក្រៅពីនេះ គឺជាជំនួយ ឬការវិនិយោគរបស់ដៃគូ ក្នុងវិស័យឯកជន។
ជប៉ុន ដែលជាប្រទេសមហាអំណាចដ៏សំខាន់មួយ ក៏ប៉ុន្តែ មិនសូវសម្បូរធនធានធម្មជាតិ កំពុងតែសំឡឹងទៅរកធនធានធម្មជាតិដ៏ក្រាស់ក្រែល នៅក្នុងតំបន់អាហ្វ្រិក។ ធនធានធម្មជាតិ ដូចជា ប្រេង និងឧស្ម័ន ដែលជប៉ុនកំពុងតែត្រូវការកាន់តែខ្លាំង ចាប់តាំងពីមានគ្រោះថ្នាក់នៅហ្វ៊ូគូស្ហ៊ីម៉ា ដែលតម្រូវឲ្យជប៉ុនត្រូវបិទ ឬផ្អាកលែងដំណើរការរោងចក្រអគ្គិសនីនុយក្លេអ៊ែរ។
ក៏ប៉ុន្តែ នៅក្នុងដំណើរផ្សងព្រេងស្វែងរកធនធានធម្មជាតិ នៅក្នុងតំបន់អាហ្វ្រិកនេះ ជប៉ុនត្រូវប្រឈមមុខនឹងគូប្រជែងដ៏ធំមួយ គឺចិន ដែលកំពុងតែព្យាយាមយ៉ាងខ្លាំងក្លា ក្នុងការបង្កើនឥទ្ធិពល នៅក្នុងតំបន់អាហ្វ្រិកនេះដែរ។ នៅក្នុងការប្រកួតប្រជែងគ្នានេះ គេសង្កេតឃើញថា ជប៉ុននៅមានការយឺតយ៉ាវជាងចិនឆ្ងាយណាស់។
បើមើលទៅលើទិន្នន័យ កាលពីឆ្នាំ២០១១កន្លងទៅ គេឃើញថា វិនិយោគផ្ទាល់របស់ជប៉ុន នៅក្នុងតំបន់អាហ្វ្រិកមានតែប្រមាណជា ៤៦០លានដុល្លារប៉ុណ្ណោះ ចំណែកឯចិនវិញ មានរហូតដល់ទៅជាង ៣ពាន់លានដុល្លារ។
លោកស្ហ៊ីនហ្សូ អាបេ ដែលជាអ្នកនយោបាយអភិរក្សនិយម ហើយដែលចាប់តាំងពីបានឡើងកាន់តំណែងមកបានធ្វើការវាយលុកផ្នែកការទូត ដើម្បីព្យាយាមប្រណាំងប្រជែងជាមួយចិននោះ បានប្រកាសឲ្យដឹងថា លោកមានគម្រោងនឹងទៅបំពេញទស្សនកិច្ច ជុំវិញតំបន់អាហ្រ្វិក នៅក្នុងពេលឆាប់ៗខាងមុខនេះ។
គួររំឭកផងដែរថា លោកស៊ី ជីនពីង បានទៅបំពេញទស្សនកិច្ច នៅក្នុងតំបន់អាហ្វ្រិក តាំងពីខែមីនាម៉្លេះ ពោលគឺ ភ្លាមៗក្រោយពីលោកឡើងកាន់តំណែងជាប្រធានាធិបតីចិន ដែលនេះជាកាយវិការបញ្ជាក់ច្បាស់ថា អាហ្វ្រិក គឺជាតំបន់យុទ្ធសាស្រ្តដ៏ចម្បងមួយ ក្នុងនយោបាយការបរទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ