រដ្ឋាភិបាលសឹកថៃហាមឃាត់ល្បែងវីដេអូហ្គេមបែបផ្តាច់ការ
របបសឹកថៃបានចេញបម្រាមហាមឃាត់មិនឱ្យធ្វើចរាចរណ៍លក់វីដេអូហ្គេម ដែលនិយាយអំពីរបបផ្តាច់ការ នៅលើកោះសប្បនិម្មិតមួយ មានព្រះអាទិត្យរះចែងចាំង មានឆ្នេរខ្សាច់សល្អប្រណិត តែមានរបបនយោបាយពុករលួយ។ តាមរយៈវីដេអូហ្គេមនេះ អ្នកលេងអាចស្រមៃស្ថាបនាជាតិ និងរដ្ឋាភិបាលមួយ ដោយអាចជ្រើសរើសប្រព័ន្ធនយោបាយដឹកនាំប្រទេស តាមការចូលចិត្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
« បង្កើតសង្គមដ៏ល្អឥតខ្ចោះមួយ ថ្នាក់ដឹកនាំស្តាប់ និងពិចារណាសំឡេងពលរដ្ឋ ឬស្ថាបនាជាតិមួយ តាមក្តីស្រមៃ ប្រែក្លាយអណ្តូងរ៉ែមាស ទៅជាធនាគារនៅប្រទេសស្វីស… ដែនដីកោះដែលមានឆ្នេរសក្បុស ជាកន្លែងដ៏ប្រសើរបំផុតសម្រាប់សម្រេចបំណងនយោបាយ ឬ ក្តីស្រមៃគ្រប់ប្រភេទ » នេះគឺជាអ្វីដែលមានសង្ខេបពន្យល់ ក្នុងវិបសៃត៍វីដេអូហ្គេម។
ផលិតដោយជនជាតិប៊ុលហ្ការី Tropico 5 មិនអាចដាក់លក់នៅលើទីផ្សារប្រទេសថៃបានឡើយ ! ក្រសួងវប្បធម៌ថៃទើបបានផ្ញើលិខិតហាមប្រាមទៅកាន់ក្រុមហ៊ុនចែកចាយល្បែងវីដេអូហ្គេម New Era Interactive Media ដែលបានសម្តែងការ ការខកចិត្តយ៉ាងខ្លាំងចំពោះសេចក្តីសម្រេចចិត្តរបស់រដ្ឋាភិបាល។ បើអ្នកទទួលខុសត្រូវផ្នែកទីផ្សារ អ្នកលេងអាចដើរតួនាទីជាប្រមុខដឹកនាំប្រទេស និងអាចជ្រើសរើសប្រព័ន្ធដឹកនាំរដ្ឋស្រេចនឹងចិត្ត ប៉ុន្តែលោកស្រី នងលក្ខ សាហាវត្ថាណាពុង មិនបានបញ្ជាក់អំពី វគ្គដែលរបបសឹកបន្ទោសឡើយ។
តាំងពីមានរដ្ឋប្រហារថ្ងៃទី ២២ឧសភាមក របបសឹកថៃ បានព្យួរចោលលទ្ធិប្រជាធិបតេយ្យ ដោយច្រានចោលការបោះឆ្នោតមុនដំណាច់ឆ្នាំ២០១៥ និងកំរិតសេរីភាពបុគ្គលយ៉ាងតឹងតែងបំផុត ហាមឃាត់បាតុកម្ម និងត្រួតពិនិត្យខ្លឹមសារប្រព័ន្ធឃោសនាព័ត៌មាន។ របបដឹកនាំថៃបច្ចុប្បន្នយកលេសឡើងកាន់អំណាចដោយកម្លាំងបាយ ថាដើម្បីបិទបញ្ចប់ចលនាបាតុកម្មមរណៈ៧ខែនៅក្រុងបាងកក ប្រឆាំងនឹងរដ្ឋាភិបាលលោកស្រីយីងឡាក់។ តែអ្នកខ្លះទៀត បានចោទពួកយោធា ថាបាន យកចំណេញពីចលនាបាតុកម្ម សម្រាប់បោសសម្អាតឥទ្ធិពលរបស់ត្រកូលថាក់ស៊ីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ