ទីក្រុងបាងកកនឹងសងជម្ងឺចិត្តជូនអ្នករងគ្រោះដោយអំពើហិង្សានៅប្រទេសថៃប៉ែកខាងត្បូង
ប្រទេសថៃបានយល់ព្រមនៅថ្ងៃអង្គារទី២៤មេសាឆ្នាំ២០១២សងជម្ងឺចិត្តប្រមាណ៥០លានអឺរ៉ូជូនអ្នករងគ្រោះដោយការវាយប្រហារគ្នានៅប៉ែកខាងត្បូងនៃប្រទេសថៃដែលបានបណ្តាលឲ្យមានមនុស្សស្លាប់និងរបួសរាប់ពាន់នាក់នារយៈពេល៨ឆ្នាំចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
គ្រួសារនីមួយៗនៃជនរងគ្រោះស្លាប់ដោយការវាយប្រយុទ្ធគ្នានៅក្នុងអធិករណ៍នៅប៉ែកខាងត្បូងនៃប្រទេសថៃនឹងទទួលបានប្រាក់ជម្ងឺចិត្តប្រមាណ៥០០ ០០០បាទស្មើនឹង១២ ២០០អឺរ៉ូ ឬ១លាន៥សែនបាទបើប្រសិនជាមានការទទួលខុសត្រូវដោយរដ្ឋាភិបាលថៃ។ នេះជាការថ្លែងពន្យល់ដោយលោករដ្ឋមន្ត្រីក្រសួងយុត្តិធម៌ថៃ។
“យើងសង្ឃឹមថា ទាំងនេះនឹងជួយផ្តល់សន្តិភាពជូនប៉ែកខាងត្បូងនៃប្រទេសថៃ” នេះជាការបញ្ជាក់បន្ថែមដោយលោករដ្ឋមន្ត្រីក្រសួងយុត្តិធម៌ថៃ។
គួរកត់សម្គាល់ថា បរិមាណនៃជម្ងឺចិត្តទាំងនេះមានចំនួនតិចជាង៧លាន៥សែនបាទឬ១៨៣ ០០០អឺរ៉ូដែលរដ្ឋាភិបាលថៃធ្លាប់បានសន្យាផ្តល់ជូនគ្រួសារនីមួយៗនៃជនរងគ្រោះស្លាប់ដោយទង្វើហិង្សានយោបាយដែលបានកើតមាននៅទីក្រុងបាងកកចាប់តាំងពីឆ្នាំ២០០៥។
នៅប៉ែកខាងត្បូងនៃប្រទេសថៃ គ្រួសារនៃជនរងគ្រោះស្លាប់ជាង៥ពាន់នាក់ដែលក្នុងនោះមានអ្នករាជការប្រមាណ១ ០០០នាក់ ហើយនិងអ្នករបួសប្រមាណ៦ ០០០នាក់អាចនឹងធ្វើការទាមទារជម្ងឺចិត្ត។
សូមបញ្ជាក់ថា ការងើបបះបោរប្រឆាំងទាមទារផ្តាច់ខ្លួនចេញពីការគ្រប់គ្រងរបស់ទីក្រុងបាងកកបានបណ្តាលឲ្យមានមនុស្សស្លាប់ជាង៥ ០០០នាក់ចាប់តាំងពីខែមករាឆ្នាំ២០០៤មក នៅប៉ែកខាងត្បូងនៃប្រទេសថៃដែលជាតំបន់ធ្លាប់បានឋិតនៅក្នុងដែនដីរបស់ប្រទេសម៉ាឡេស៊ីរហូតដល់ដើមសតវត្សរ៍ទី២០។
អធិករណ៍រវាងក្រុមអ្នកបះបោរប្រឆាំងទល់នឹងទីក្រុងបាងកកគឺជាអធិករណ៍នយោបាយ ប៉ុន្តែបានប្រែក្លាយទៅជាមានលក្ខណៈសាសនា នៅក្នុងរង្វង់ប្រជាជនភាគច្រើនដែលមានដើមកំណើតម៉ាឡេស៊ី ហើយដែលជាអ្នកកាន់សាសនាអ៊ីស្លាម ដែលខុសផ្ទុយពីប្រជាជនថៃភាគច្រើនដែលជាអ្នកកាន់ព្រះពុទ្ធសាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ