លោកនាយករដ្ឋមន្ត្រី ហ៊ុន សែន ជំរុញអាស៊ាននិងសហភាពអឺរ៉ុបឲ្យពន្លឿនកិច្ចព្រមព្រៀងពាណិជ្ជកម្មសេរី
លោកនាយករដ្ឋមន្ត្រី ហ៊ុន សែន ជំរុញអាស៊ាននិងសហភាពអឺរ៉ុបអោយពន្លឿនកិច្ចព្រមព្រៀងពាណិជ្ជកម្មសេរី។ សហភាពអឺរ៉ុបគឺជាដៃគូពាណិជ្ជកម្មទី២របស់អាស៊ានរីឯអាស៊ានវិញគឺជាដៃគូពាណិជ្ជកម្មទី៥របស់សហភាពអឺរ៉ុប។ តំបន់អាស៊ានមានចំនួនប្រជាជនជិត៦០០លាននាក់រីឯសហភាពអឺរ៉ុបមានចំនួនប្រជាជន៥០០លាននាក់។ ប្រសិនបើគេនិយាយពីដៃគូពាណិជ្ជកម្មសំខាន់ៗរបស់អាស៊ានវិញ គឺមានប្រទេសចិន សហភាពអឺរ៉ុប ប្រទេសជប៉ុននិងសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
អ្នកជំនួញនិងអ្នកនយោបាយជាច្រើនរយនាក់ពីតំបន់អាស៊ាននិងតំបន់អឺរ៉ូបានចូលរួមកិច្ចប្រជុំកំពូលពាណិជ្ជកម្មអាស៊ាន-អឺរ៉ុបនៅថ្ងៃអាទិត្យនេះនៅទីក្រុងភ្នំពេញ។
លោក ហ៊ុន សែន នាយករដ្ឋមន្រ្តីនៃប្រទេសកម្ពុជា លោក ស៊ូរិន ពិតស៊ូវណ្ណ អគ្គលេខាធិការអាស៊ាន លោក ការ៉ែល ដឺ ហ្គុច តំណាងសហភាពអឺរ៉ុបសម្រាប់ពាណិជ្ជកម្មនិងលោក ចម ប្រសិទ្ធិ រដ្ឋមន្រ្តីក្រសួងពាណិជ្ជកម្មខ្មែរមានវត្តមាននៅក្នុងកិច្ចប្រជុំកំពូលដ៏មានសារៈសំខាន់នេះ។ ថ្លែងទៅកាន់ឥស្សរជនចូលរួមពីតំបន់អាស៊ាននិងពីតំបន់អឺរ៉ូកាលពីព្រឹកមិញ លោក នាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលកម្ពុជានិងជាប្រធានអាស៊ានបានជំរុញអោយអាស៊ាននិងសហភាពអឺរ៉ុបពន្លឿនការរៀបចំក្របខ័ណ្ឌច្បាប់និងយន្តការស្ថាប័ននានាអោយបានសមស្របសម្រាប់ការអនុវត្តន៍កិច្ចព្រមព្រៀងពាណិជ្ជកម្មសេរីរវាងអាស៊ាននិងអឺរ៉ុប។
តំបន់អាស៊ាននិងអឺរ៉ុបក្នុងរយៈពេលចុងក្រោយនេះបានរឹតចំណងកាន់តែខ្លាំងឡើងក្នុងវិស័យពាណិជ្ជកម្ម។ សហភាពអឺរ៉ុបគឺជាដៃគូពាណិជ្ជកម្មទី២របស់អាស៊ានរីឯអាស៊ានវិញគឺជាដៃគូ
ពាណិជ្ជកម្មទី៥របស់សហភាពអឺរ៉ុប។ សហភាពអឺរ៉ុបគឺជាប្រភពនៃការវិនិយោគផ្ទាល់ដ៏ធំរបស់តំបន់អាស៊ាន។ កាលពីឆ្នាំ២០១០កន្លងមក ការផ្លាស់ប្តូរពាណិជ្ជកម្មរវាងតំបន់ទាំងពីរមានតម្លៃជាង២០០ពាន់លានដុល្លារអាមេរិក។
សហភាពអឺរ៉ុបមានសមាជិកចំនួន២៧ប្រទេសរីឯអាស៊ានមានសមាជិកតែ១០ប្រទេសប៉ុណ្ណោះ។ ប៉ុន្តែតំបន់អាស៊ានមានចំនួនប្រជាជនជិត៦០០លាននាក់រីឯសហភាពអឺរ៉ុបមានចំនួនប្រជាជន៥០០លាននាក់។ ប្រសិនបើគេនិយាយពីដៃគូពាណិជ្ជកម្មសំខាន់ៗរបស់អាស៊ានវិញ គឺមានប្រទេសចិន សហភាពអឺរ៉ុប ប្រទេសជប៉ុននិងសហរដ្ឋអាមេរិក។ លោក ស្តេហ្វានណូ ប៉ូលី តំណាងក្រុមប្រឹក្សាពាណិជ្ជកម្មអាស៊ាន-អឺរ៉ុប បាននិយាយថា ក្រុមហ៊ុនទាំងឡាយណាដែលកំពុងមានវត្តមាននៅក្នុងតំបន់អាស៊ាននឹងអាចទាញបានផលប្រយោជន៍យ៉ាងច្រើនពីសមាហរ័ណកម្មតំបន់អាស៊ានទៅកាន់ពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ