លីទុយអានី៖ រុស្ស៊ីព្យាយាមលួចស្តាប់ការសន្ទនារបស់ប្រធានាធិបតីលីទុយអានី
អយ្យការលីទុយអានីបានប្រកាសនៅថ្ងៃសុក្រ១កក្កដានេះ ពីការប៉ុនប៉ងរបស់ចារកិច្ចរុស្ស៊ីម្នាក់ ដើម្បីអាចលួចស្តាប់ការសន្ទនារបស់ប្រធានាធិបតីលីទុយអានី។ ការប្រកាសចោទប្រកាន់ទៅលើរុស្ស៊ីនេះ ធ្វើឡើងចំពេលអង្គការអូតង់ត្រូវរៀបចំកិច្ចប្រជុំនៅក្រុងវ៉ាសូវី ជាង១សប្តាហ៍ទៀត ដើម្បីអនុម័តវិធានការពង្រឹងកងទ័ព នៅអឺរ៉ុបខាងកើត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
យោងតាមអយ្យការលីទុយអានី ដើម្បីអាចស្តាប់ការសន្ទនារបស់ប្រធានាធិបតីលីទុយអានី បុរសចារកិច្ចរុស្ស៊ីបានព្យាយាមជ្រើសរើសបុគ្គលិកច្រើននាក់ ជាមន្ត្រីទទួលខុសត្រូវផ្នែកសន្តិសុខរបស់លីទុយអានី។ ចារកិច្ចរុស្ស៊ីចង់ដាក់ឧបករណ៍ស្តាប់សំលេងពិសេស នៅក្នុងផ្ទះ និងនៅតាមកន្លែងធ្វើការច្រើនកន្លែង របស់ប្រធានាធិបតីលីទុយអានី គឺលោកស្រី ដាលីយ៉ា គ្រីបូស្កែតតេ Dalia Grybauskaité។
បុរសចារកិច្ចរុស្ស៊ី ត្រូវបានឃុំខ្លួនតាំងពីខែមេសា ឆ្នាំ២០១៥។ គាត់ជាប់ពិរុទ្ធពីបទធ្វើចារកិច្ច បន្លំឯកសារ និងចូលក្នុងទឹកដីលីទុយអានីដោយខុសច្បាប់។ គួរបញ្ជាក់ថា លីទុយអានីជាសមាជិកសហភាពអឺរ៉ុប ហើយក៏ជាសមាជិកអង្គការអូតង់ដែរ។
ការប្រកាសរបស់អាជ្ញាធរលីទុយអានីស្តីពីការប៉ុនប៉ងចារកិច្ចរបស់ក្រុងម៉ូស្គូ ចំពេលដែលរុស្ស៊ីនិងសហភាពអឺរ៉ុបកំពុងតានតឹងនឹងគ្នា។ ហើយក៏ជាការសំដែងការគាំទ្រដល់អង្គការអូតង់ ប្រឈមនឹងរុស្ស៊ីដែរ។
លោកពូទីនទើបនឹងចោទអង្គការអូតង់កាលពីថ្ងៃព្រហស្បតិ៍ថា អូតង់ចង់រុញអោយរុស្ស៊ីចូលរួមប្រកួតប្រជែងគ្រឿងសព្វាវុធ និងចង់ផ្តាច់តុល្យភាពយោធាដែលចូលជាធរមាននៅអឹរ៉ុប ក្រោយការដួលរលំសហភាពសូវៀត។
ដោយឡែក លីទុយអានីក៏ធ្លាប់ធ្វើចារកិច្ចលើរុស្ស៊ីដូចគ្នា។ ជាក់ស្តែង កាលពីដើមឆ្នាំ២០១៦នេះ រុស្ស៊ីបានដាក់ទោស ពលរដ្ឋលីទុយអានី២រូបជាប់ចោទពីបទចារកិច្ច អោយជាប់គុកជាង១០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ