ព្យុះសង្ឃរាMatthew ចេញពីហៃទី បន្តដំណើរតាមឆ្នេរភាគខាងកើតអាមេរិក
ព្យុះសង្ឃរា Matthew បានចេញពីហៃទីហើយ ហើយថ្ងៃសៅរ៍នេះ បានបន្ថយល្បឿន និងបន្តដំណើរតាមឆ្នេរភាគខាងកើតអាមេរិក បង្កជាទឹកជំនន់នៅច្រើនកន្លែង ហើយអាចធ្វើអោយមានមនុស្សស្លាប់ច្រើននាក់។ ព្យុះ Matthew បានសម្លាប់មនុស្សយ៉ាងហោច៤០០នាក់ នៅហៃទី ធ្វើអោយហៃទីប្រឈមគ្រោះមនុស្សធម៌។
ចុះផ្សាយនៅថ្ងៃ៖ កែប្រែថ្ងៃទី៖
ម៉ោង១រសៀលនៅកម្ពុជា ថ្ងៃសៅរ៍នេះ ព្យុះសង្ឃរាម៉ាតជូ មានវត្តមាននៅក្បែរឆ្នេររដ្ឋ ការ៉ូលីនខាងត្បូង និងហ្ស៊កហ្ស៊ី សហរដ្ឋអាមេរិក។ យោងតាមផ្នែកឧតុនិយម ព្យុះម៉ាតជូដែលបោកបក់ក្នុងល្បឿនអតិបរមាកម្រិត៥ បានបន្ថយល្បឿនមកនៅកម្រិត២ អាចបោកបក់១៦៥គីឡូម៉ែត្រក្នុងមួយម៉ោង។
អាជ្ញាធររដ្ឋការ៉ូលីនខាងត្បូងបានជម្លៀសប្រជាជនរាប់ពាន់នាក់ ទៅរកកន្លែងមានសុវត្ថិភាព។ រដ្ឋផ្លរីតក៏បានជម្លៀសមនុស្សរាប់សែននាក់ដែរ។ ពេលមកដល់រដ្ឋផ្លរីត ព្យុះសង្ឃរាបានសម្លាប់មនុស្សយ៉ាងហោច៥នាក់ ក្នុងនោះមានស្ត្រី២នាក់ស្លាប់ដោយសារដើមឈើបាក់សង្កត់លើពួកគាត់។ ឆ្នេរភាគឦសានរដ្ឋផ្លរីត ហ្ស៊កហ្ស៊ី ការ៉ូលីនខាងជើង និងខាងត្បូង អាចប្រឈមនឹងគ្រោះទឹកជំនន់ធ្ងន់ធ្ងរ។
តាំងពីថ្ងៃ២៩កញ្ញាមក ព្យុះសង្ឃរាម៉ាតជូ បានឆ្លងកាត់តំបន់ការ៉ាអ៊ីប ភាគខាងត្បូងនិងខាងជើង ដោយបានវាយប្រហារកូឡុំប៊ី ចាម៉ៃអ៊ីក សាធារណរដ្ឋដូមីនីក គុយបា និងបាហាម៉ាស។ មានមនុស្សស្លាប់យ៉ាងហោច៤នាក់ នៅសាធារណរដ្ឋដូមីនិក។ ប៉ុន្តែ គឺនៅហៃទី ទើបព្យុះម៉ាតជូ ក្នុងល្បឿន២៣៣គីឡូម៉ែត្រក្នុងមួយម៉ោង បានបង្កការខូចខាតធ្ងន់ធ្ងរ ដល់ផ្ទះសម្បែង និងផលដំណាំ ពិសេសព្យុះសង្ឃរាបានសម្លាប់ប្រជាជនរាប់រយនាក់។
ព្យុះម៉ាតជូចេញផុតពីហៃទីហើយ តែអាជ្ញាធរកំពុងបារម្ភខ្លាចជំងឺអាសន្នរោគរាតត្បាត ក្នុងប្រទេស។ ជំងឺអាសន្នរោគបានវាយប្រហារហៃទី កាលពីឆ្នាំ២០១០ ក្រោយពេលមានគ្រោះរញ្ជួយដី។ បារាំង និងអាមេរិកបានបញ្ជូនមនុស្ស និងសម្ភារៈផ្សេងៗ ទៅជួយហៃទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ