ប្រធានាធិបតីតួកគីបំពេញទស្សនកិច្ចនៅអ៊ីរ៉ង់ ដើម្បីបន្ថយភាពតានតឹង និងពង្រឹងការផ្តោះប្តូរពាណិជ្ជកម្ម
លោក Recep Tayyip Erdogan ប្រធានាធិបតីតួកគី បានអញ្ជើញទៅដល់ក្រុង តេហេរ៉ង់ និងទទួលស្វាគមន៍ដោយសមភាគីអ៊ីរ៉ង់ លោក ហាសាន់ រ៉ូហានី សម្រាប់ទស្សនកិច្ចផ្លូវការរយៈពេលមួយថ្ងៃ។ ជាដំណើរទស្សនកិច្ច ដែលទទួលបានការចាប់អារម្មណ៍ខ្លាំង ដ្បិតប្រទេសជិតខាងគ្នាទាំងពីរនេះ ទើបតែរិះគន់គ្នាទៅវិញទៅមកអំពីនយោបាយ ក្នុងតំបន់។ ក្រៅអំពីបញ្ហានយោបាយ កិច្ចព្រមព្រៀងពាណិជ្ជកម្មជាច្រើនទំនងជាប្រធានបទសំខាន់មួយដែរនាឱកាសនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
លោកប្រធានាធិបតីតួកគី បានរិះគន់ខ្លាំងណាស់អ៊ីរ៉ង់ដែលគាំទ្រពួកឧទ្ទាមហ៊ូទី នៅយេម៉ែន និងបានបរិហារអ៊ីរ៉ង់ថាមានមហិច្ឆតាត្រួតត្រាតំបន់។ នេះជាអ្វីដែលលោក បានប្រកាសកាលពីខែមីនា ដោយថែមទាំងទាមទារឱ្យតេហេរ៉ង់ ដកទ័ពចេញពីប្រទេសយេម៉ែន ស៊ីរី និងអ៊ីរ៉ាក់ទៀត។ រដ្ឋមន្ត្រីក្រសួងការបរទេសអ៊ីរ៉ង់ បានឆ្លើយបកយ៉ាងសោះកក្រោះមកវិញ ដោយចោទប្រកាន់តួកគីថាបានចិញ្ចឹមចិត្តឱ្យមានអស្ថិរភាពនៅតំបន់ដើមបូព៌ា។
អ៊ីរ៉ង់ទទួលស្គាល់ថាបានផ្តល់ប្រឹក្សាដល់យោធាស៊ីរី និងអ៊ីរ៉ាក់ ប៉ុន្តែបដិសេធអំពីវត្តមានយោធានៅយេម៉ែន។ ផ្ទុយទៅវិញ តេហេរ៉ង់ ចោទតួកគីថាបានជួយពួកឧទ្ទាមនៅស៊ីរី និងសម្រួលឱ្យមានពួកជីហាតនៃអង្គការរដ្ឋអ៊ីស្លាម និងពួកភេរវនិយមរណសិរ្សអាល់ណូស្រា ស្និទ្ធនឹងអាល់កៃដា។ អ៊ីរ៉ង់ថែមទាំងបានថ្កោលទោសតួកគីដែលបានចូលរួមក្នុងប្រតិបត្តិការផ្លូវអាកាសដឹកនាំដោយអារ៉ាប៊ីសាអ៊ូឌីត នៅយេម៉ែន … សូមបញ្ជាក់ថាប្រទេសជិតខាងគ្នាទាំងពីរនេះ បានស្គាល់ភាពតានតឹងនឹងគ្នាខ្លាំងណាស់ ក្នុងវិបត្តិយេម៉ែន។ សូម្បីតែប៉ាគីស្ថាន ក៏កំពុងតាមដានដំណើរទស្សនកិច្ចរបស់ប្រធានាធិបតីតួកគីនៅអ៊ីរ៉ង់នេះខ្លាំងណាស់ដែរ មុននឹងសម្រេចចិត្តបញ្ជូនឬមិនបញ្ជូនទ័ព ទៅចូលរួមជាមួយកងកម្លាំងសម្ព័ន្ធមិត្ត
ប៉ុន្តែនៅទីបំផុត នៅថ្ងៃនេះ ប្រធានាធិបតីតួកគីបានទៅបំពេញទស្សនកិច្ចនៅអ៊ីរ៉ង់ ! ជំនួបមួយទល់មួយ បានផ្តល់ជាការព្រមព្រៀង តួកគី-អ៊ីរ៉ង់ ក្នុងការបញ្ឈប់សង្គ្រាមនៅយេម៉ែន និងជំរុញឱ្យមានដំណោះស្រាយនយោបាយ តាមរយៈសេចក្តីថ្លែងការណ៍រួម។
ការខ្វែងគំនិតនយោបាយមានច្រើនមែន ប៉ុន្តែអ៊ីរ៉ង់និងតួកគី ចង់ពង្រឹងទំនាក់ទំនងពាណិជ្ជកម្ម និងសេដ្ឋកិច្ច នឹងគ្នា បើទោះបីជាសម្រាប់តួកគីចាញ់ប្រៀបអ៊ីរ៉ង់បន្តិចក្តី (អ៊ីរ៉ង់នាំចេញ១០ពាន់លាន តែនាំចូលត្រឹម៤ពាន់លានដុល្លារប៉ុណ្ណោះពីតួកគី)។ កម្មវត្ថុ គឺបង្កើនការផ្តោះប្តូរឱ្យបានទ្វេដង ដល់៣០ពាន់លានអឺរ៉ូនៅឆ្នាំ២០១៥នេះ។ អ៊ីរ៉ង់ ចង់បង្កើនការលក់ឧស្ម័ន និងនាំចេញកាត់ ទៅឱ្យតួកគី និងតាមតួកគីសំដៅអឺរ៉ុប នៅពេលណាទណ្ឌកម្មអន្តរជាតិត្រូវលើកចេញពីអ៊ីរ៉ង់នៅចុងខែមិថុនា ក្រោយការប្រសូតជាស្ថាពរកិច្ចព្រមព្រៀងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ