ម៉ូស្គូច្រានចោល កាចោទប្រកាន់របស់យេម៉ែនដែលថា រុស្ស៊ី លួចផ្តល់អាវុធទៅពួកឧទ្ទាមហ៊ូទី
ក្រសួងការបរទេសរុស្ស៊ី ចាត់ទុកការចោទប្រកាន់នេះ ពីខាងរដ្ឋមន្ត្រីការបរទេស យេម៉ែន ដែលថា រុស្ស៊ី តាមរយៈយន្តហោះខ្លួន ហោះទៅជន្លៀសពលរដ្ឋរុស្ស៊ី និងពលរដ្ឋ នៃអតីត សាធារណរដ្ឋសូវៀតឯទៀត ចេញពីយេម៉ែន ដែលកំពុងឆាបឆេះ ដោយភ្លើងសង្គ្រាម គឺឆ្លៀតដឹក ទៅជាមួយទាំងអាវុធ សម្រាប់ផ្តល់ឲ្យពួកឧទ្ទាមហ៊ូទី ថាជា សម្តីផ្តេសផ្តាស ចេញមកពីគំនិត រវើរវាយ មានលក្ខណៈបង្កហេតុ។
ចុះផ្សាយនៅថ្ងៃ៖
ស្តាប់ - ០២:០៧
អ្នកនាំពាក្យផ្លូវការនៃក្រសួងការបរទេសរុស្ស៊ី លោក Alexandre Loukashevich ថ្លែងថា “ម៉ូស្គូ មិនបណ្តោយឲ្យមានការជ្រៀតជ្រែកអ្វីណាពីខាងខ្លួន ទៅក្នុងជម្លោះក្នុងប្រទេសយេម៉ែន ឡើយ។ ចំណែកពួកអ្នកតំណាងរបស់អាជ្ញាធរប្រទេសនេះ គប្បីជាប់ដៃ រវល់ទៅ នឹងការជួយ សម្រាលទុក្ខវេទនា របស់បណ្តាជនស៊ីវិល មិនមែនរវល់នឹងការបំផុសមកជាគំនិតរវើរវាយឡើយ។
គឺយ៉ាងនេះ ដែលអ្នកការទូតរុស្ស៊ី ធ្វើអត្ថាធិប្បាយទៅលើ ដំណឹងផ្សព្វផ្សាយ ដោយមធ្យោបាយ ឃោសនាមហាជននានា ស្តីអំពីសេចក្តីថ្លែងការណ៍របស់ លោក រដ្ឋមន្ត្រីការបរទេស យេម៉ែន Riyad Yassin ដែលចោទរុស្ស៊ី ថា បានដឹកអាវុធទៅផ្គត់ផ្គង់ដល់ពួកឧទ្ទាមហ៊ូទី តាមយន្តហោះ ដែលហោះទៅជន្លៀស ពលរដ្ឋ រុស្ស៊ី ចេញពីយេម៉ែន”។
អ្នកការទូតរុស្ស៊ីសង្កត់ធ្ងន់ថា បើប្រមុខការទូតយេម៉ែន ថ្លែងយ៉ាងនេះមែន គឺមានន័យថា ជាសម្តី ផ្តេសផ្តាស មិនទំនងសោះឡើយ មិនស្គាល់នាទីទទួលខុសត្រូវ មានលក្ខណៈបង្កហេតុ ដែល មិនសមនឹងលើកយកមក ធ្វើអត្ថាធិប្បាយឡើយ។
លោក Loukashevich គូសបញ្ជាក់ថា រុស្ស៊ី ក្នុងស្ថានភាពមិនងាយស្រួលឡើយ ខំត្រួសត្រាយផ្លូវ ទៅជន្លៀសមិនគ្រាន់តែពលរដ្ឋខ្លួនប៉ុណ្ណោះទេ តែក៏ទាំងពលរដ្ឋនៃប្រទេសខ្លះ ដែលឥឡូវស្ថិត នៅក្នុង សម្ព័ន្ធប្រឆាំងពួកហ៊ូទី ទៅផង។
អ្នកការទូតរុស្ស៊ីទូន្មានរដ្ឋមន្ត្រីការបរទេសយេម៉ែន ដែលកំពុងលាក់ខ្លួនសម្ងំ នៅបរទេស “កុំខំជាប់ ដៃ រវល់អីនឹងការបំផុសមកជាគំនិតរវើរវាយ ដ៏គ្រោះថ្នាក់ តែគួរយកចិត្តទុកដាក់លើ ទុក្ខ វេទនាអ្នកស្រុកយេម៉ែន ដែលធ្លាក់ខ្លួនស្លាប់ ក្នុងជម្លោះនៅទីនោះ អស់រាប់រយនាក់ទៅហើយ។
រុស្ស៊ីសូមបញ្ជាក់ជាថ្មីពីភាពចាំបាច់ ត្រូវសមិទ្ធិឲ្យចេញជាផ្លែផ្កាទៅ នូវ គំនិតផ្តួចផ្តើមរបស់ខ្លួន ដែលកំពុងទទួលការពិភាក្សាក្នុង ក្រុមប្រឹក្សាសន្តិសុខអ.ស.ប. ឲ្យមាន ការដកឃ្លា ឈប់បាញ់ ក្នុងប្រទេសយេម៉ែន ដើម្បីដឹកជំនួយមនុស្សធម៌ទៅជួយប្រទេសនោះ។
គួរនិយាយថា នាប៉ុន្មានថ្ងៃចុងក្រោយ យន្តហោះស៊ីវិលរុស្ស៊ី បានជន្លៀសចេញពីប្រទេស យេម៉ែន ដែលកំពុងឆាបឆេះដោយភ្លើងសង្គ្រាម គឺ ពលរដ្ឋខ្លួន និង ពលរដ្ឋអតីតសាធារណរដ្ឋ សូវៀត ឯទៀត សរុបទៅ ជិត៧០០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ