ក្រុមកម្លាំងគួដ និងក្រុមឧទ្ទាមស៊ីរី រួមកម្លាំងគ្នា វាយសង្រ្គុបក្រុមជីហាដ
ក្រុមឧទ្ទាមប្រជាធិបតេយ្យស៊ីរី និងក្រុមតស៊ូជនជាតិគួដ ដែលបានធ្វើការប្រយុទ្ធ ដាច់ដោយឡែកពីគ្នា ជាមួយនឹងក្រុមជីហាដអង្គការរដ្ឋអ៊ីស្លាម ពេលនេះ បានសម្រេចរួបរួម សហការគ្នា ដោយបានធ្វើការវាយសង្រ្គុប លើមូលដ្ឋានក្រុមជីហាដអង្គការរដ្ឋអ៊ីស្លាម នៅខេត្តហាសាកេ ភាគឦសានស៊ីរី។ ការបើកការវាយប្រហារនេះ បានធ្វើឡើងមួយថ្ងៃ បន្ទាប់ពីសហរដ្ឋអាមេរិក បានប្រកាសប្តូរយុទ្ធសាស្ត្រ បញ្ជូនកងកុម៉្មង់ដូពិសេស ៥០នាក់ ទៅជួយក្រុមឧទ្ទាមស៊ីរី ដើម្បីយកឈ្នះ ក្រុមជីហាដអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
តាមការឲ្យដឹងពីលោក Rami Abdel Rahmane អ្នកឃ្លាំមើល កិច្ចការសិទ្ធិមនុស្សនៅស៊ីរី កាលពីយប់ថ្ងៃសុក្រ ឈានចូលថ្ងៃសៅរ៍ មានការវាយប្រយុទ្ធដ៏ក្តៅគគុក រវាងក្រុមកម្លាំងចម្រុះ ដែលមានក្រុមគួដ និងក្រុមចលនាតស៊ូ ស៊ីរី ដែលតទល់ជាមួយនឹង ក្រុមជីហាដអង្គការរដ្ឋអ៊ីស្លាម នៅតំបន់ អាល់ ហុល ក្នុងខេត្ត ហាសាកេ ភាគឦសានស៊ីរី។
ជាការពិតណាស់ ក្រុមតស៊ូគួដ និងក្រុមឧទ្ទាមស៊ីរី បានធ្វើការប្រយុទ្ធ ដាច់ដោយឡែកពីគ្នា តែពួកគេមានសត្រូវរួមតែមួយ គឺក្រុមជីហាដអង្គការរដ្ឋអ៊ីស្លាម។ ឥឡូវ ក្រុមកម្លាំងចម្រុះមួយត្រូវបានបង្កើតឡើង ជាផ្លូវការ រវាងក្រុមគួដ ក្រុមឧទ្ទាមតស៊ូប្រជាធិបតេយ្យស៊ីរី ហើយនឹងមានការចូលរួមរបស់ ក្រុមអ្នកតស៊ូស៊ីរី កាន់សាសនាគ្រឹស្តផងដែរ។ គោលដៅរបស់កម្លាំងតស៊ូចម្រុះនេះ គឺវាយសម្រុកខិតទៅខាងត្បូង ដើម្បីវាយបំបែកមូលដ្ឋានធំរបស់ក្រុមជីហាដអង្គការរដ្ឋអ៊ីស្លាម ដែលស្ថិតនៅទីក្រុង រ៉ាខា ចំងាយប្រមាណជាជាង១០០គីឡូម៉ែត្រ តែប៉ុណ្ណោះ។
ការប្រកាសបើកប្រតិបត្តិការ វាយប្រហារនេះ ធ្វើឡើងជួនពេលដែលសហរដ្ឋអាមេរិក ទើបសម្រេចបញ្ជូនកងកម្លាំងពិសេស មានគ្នា៥០នាក់ ដើម្បីមកសម្របសម្រួលប្រតិបត្តិការ និងជួយផ្តល់ប្រឹក្សាយោធា ដល់ក្រុមកម្លាំងតស៊ូស៊ីរី ដើម្បីយកឈ្នះក្រុមជីហាដអង្គការរដ្ឋអ៊ីស្លាម។ ទោះបីជាខាងក្រសួងការពារជាតិអាមេរិក ក៏ដូចជាសេតវិមាន មិនបានបញ្ចេញព័ត៌មានលំអិត ស្តីពីបេសកកម្មនៃកងកម្លាំងពិសេសទាំង៥០នាក់នេះ ប៉ុន្តែបើតាមការស្មាន កម្លាំងពិសេសនេះ ប្រហែលជានឹងទៅជួយក្រុមកម្លាំងចម្រុះ រវាងក្រុមអ្នកតស៊ូគួដ និងក្រុមឧទ្ទាមតស៊ូស៊ីរី នេះឯង។
អ្នកនាំពាក្យ របស់កងកម្លាំងតស៊ូស៊ីរី បានអះអាងផងដែរថា ថាក្នុងពេលប្រតិបត្តិការនៅយប់ថ្ងៃសុក្រ ក្រុមកម្លាំងតស៊ូចម្រុះ បានទទួលជំនួយ ពីលើអាកាស របស់ក្រុមសម្ពន័្ធមិត្ត ដែលដឹកនាំដោយកងទ័ពអាកាសអាមេរិក។ យន្តហោះអាមេរិក បានហោះទំលាក់គ្រាប់ បើកផ្លូវ ដើម្បីអនុញ្ញាតឲ្យពួកគេរុលទៅមុខ។
ដោយឡែកនៅសមរភូមិការទូតឯនោះ ប្រទេសមហាអំណាច និងប្រទេសពាក់ព័ន្ធទាំងអស់ កំពុងព្យាយាម ចរចាគ្នា ដើម្បីស្វែងរកដំណោះស្រាយនយោបាយ និងស្រោចស្រង់ប្រទេសស៊ីរី។ ចំណុចស្នូលនៃបញ្ហា គឺតួនាទី និងអនាគត របស់ប្រធានាធិបតីផ្តាច់ការស៊ីរីបច្ចុប្បន្ន គឺលោក បាស្ឆា អាល់អាសាដ។ ការចរចា បានផ្អាក និងលើកទៅពិភាក្សាគ្នា បន្តទៀត នៅក្នុងពីរសប្តាហ៍ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ