អេហ្ស៊ីបបដិសេធមិននិយាយអំពីសម្មតិកម្មធ្លាក់យន្តហោះរុស្ស៊ីនៅស៊ីណៃជាភេរវកម្ម
ទោះបីជាការវិភាគប្រអប់ខ្មៅ ផ្តល់សម្មតិកម្មខ្ពស់ថាឧប្បត្តិហេតុធ្លាក់យន្តហោះរុស្ស៊ី កាលពីថ្ងៃទី ៣១តុលា មានទម្រង់ជាភេវកម្មបំផ្ទុះគ្រាប់បែកយ៉ាងណាក៏ដោយ ក៏ភាគីអេហ្ស៊ីប តាមរយៈសន្និសីទកាសែតរបស់រដ្ឋមន្ត្រីក្រសួងមហាផ្ទៃ នារសៀលថ្ងៃសៅរ៍នេះ នៅតែច្រានចោលសម្មតិកម្មនេះ ដោយពន្យល់ថា ក្នុងដំណាក់កាលនេះ គេពុំទាន់អាចចេញសេចក្តីសន្និដ្ឋានអ្វីទាំងអស់។ ចំណែក ប្រធានក្រុមអ្នកអង្កេត បានអះអាងថាត្រូវធ្វើការវិភាគលើសំឡេងដ៏ចម្លែកមួយថតជាប់ពេលបាត់ដានយន្តហោះ។
ចុះផ្សាយនៅថ្ងៃ៖ កែប្រែថ្ងៃទី៖
អេហ្ស៊ីប នៅតែក្រាញមិនព្រមទទួលស្គាល់សេចក្តីសន្និដ្ឋានបានមកពីការវិភាគប្រអប់ខ្មៅទេ។ នៅក្នុងសន្និសីទកាសែតនារសៀលថ្ងៃសៅរ៍ទី ៧វិច្ឆិកា លោករដ្ឋមន្ត្រីក្រសួងការបរទេសអេហ្ស៊ីបបានអះអាងថា ការអង្កេតកំពុងបន្តធ្វើ ហើយដរាបណាពុំបានចប់សព្វគ្រប់ របាយការណ៍ពុំទាន់ពេញលេញ គេមិនអាចផ្តល់អាទិភាពទៅលើការសន្និដ្ឋានណាមួយបានទេ។
តាំងពីថ្ងៃសុក្រមក ប្រភពសិទ្ធនឹងអ្នកអង្កេតបានបង្ហើបឱ្យដឹងថា លទ្ធផលនៃការវិភាគប្រអប់ខ្មៅទាំងពីរ បូកនឹងព័ត៌មានប្រមូលបាននៅកន្លែងធ្លាក់ អាចនាំឱ្យគិតខ្លាំងអំពីទង្វើភេរវកម្មបំផ្ទុះគ្រាប់បែក។ សំឡេងនៅក្នុងប្រអប់ខ្មៅ បានបង្ហាញអំពីភាពរលូនធម្មតា នៅក្នុងបន្ទប់អ្នកបើកបរ តែដល់នាទីទី ២៤ ស្រាប់តែប្រអប់ខ្មៅឈប់ដើរភ្លាមភ្លែត។ ការគាំងភ្លិប បូកនឹងរូបថតបំណែកយន្តហោះ បែកធ្លាយពីក្នុងទៅក្រៅបែបនេះ អាចបញ្ជាក់ថាមានការផ្ទុះសារធាតុគីមី មិនមែនផ្ទុះដោយអគ្គិភ័យ ឬខុសប្រព័ន្ធបច្ចេកទេសទេ។
អង់គ្លេស បន្ទាប់មកប្រធានាធិបតីអាមេរិក បារ៉ាក់អូបាម៉ា និងរុស្ស៊ី សុទ្ធតែបានទទួលស្គាល់ដោយចំហថា ឧប្បត្តិហេតុធ្លាក់យន្តហោះនេះ បណ្តាលមកពីការបំផ្ទុះគ្រាប់បែក និងបានផ្តើមជម្លៀសប្រជាពលរដ្ឋជាទេសចរចេញពីក្រុងឆាំអែលឆេក តាមជើងហោះហើរពិសេស ព្រមទាំងប្រកាសផ្អាកការហោះហើរមកពីនិងសំដៅទៅអេហ្ស៊ីបឬទៅស៊ីណៃសម្រាប់អង់គ្លេស។ នៅល្ងាចថ្ងៃសៅរ៍នេះ រុស្ស៊ី បានបញ្ជូនយន្តហោះទទេចំនួន ៤៤គ្រឿង ទៅអេហ្ស៊ីប ទំនងដើម្បីដឹកទេសចររុស្ស៊ី ជាង៨ម៉ឺននាក់ត្រលប់មកស្រុកវិញ។
ឧប្បត្តិហេតុធ្លាក់យន្តហោះនេះ មិនត្រឹមតែផ្តាច់ជីវិតមនុស្សអស់២២៤នាក់ទេ តែក៏អាចជាការបាត់បង់ដ៏ធំសម្រាប់អេហ្ស៊ីប ដែលស្ថិតក្នុងអស្ថិរភាពតាំងពីរបបម៉ូបារ៉ាក់ដួលរលំទៅ និងដែលរស់រំពឹងខ្លាំងលើវិស័យទេសចរណ៍។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ