អ៊ីស្រាអែល៖ភេរវកម្មនៅតេឡាវីបានសម្លាប់មនុស្ស ៤នាក់ និងរបួស ៥នាក់
នៅយប់ថ្ងៃពុធ ទី៨ មិថុនាវេលាម៉ោង ៩ និង ៣០នាទី មានយុវជនជនជាតិប៉ាឡេស្ទីនចំនួនពីរនាក់បានបាញ់រះទៅលើមនុស្សដែលកំពុងអង្គុយស្រស់ស្រូបអាហារ និងភេសជ្ជៈនៅសំយ៉ាបហាងកាហ្វេមួយក្នុងទីក្រុងតេឡាវី ប្រទេសអ៊ីស្រាអែល។ ឧប្បត្តិហេតុនោះបានបណ្តាលឲ្យមានមនុស្សស្លាប់ ៤នាក់ និងរបួស ៥នាក់ផ្សេងទៀត។ ភ្លាមៗ កម្លាំងប៉ូលិសអ៊ីស្រាអែលបានទៅដល់កន្លែងកើតហេតុ និងស្ទាក់ចាប់បានជនដៃដល់ប៉ាឡេស្ទីនទាំងពីរនាក់។ វិធានការបន្ទាន់ថ្ងៃនេះ អ៊ីស្រាអែលបានផ្អាកការផ្តល់លិខិតអនុញ្ញាតដល់ប្រជាជនប៉ាឡេស្ទីនក្នុងរយៈពេលពិធីតមអាហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
វិធានការជាបន្ទាន់របស់រដ្ឋាភិបាលអ៊ីស្រាអែលថ្ងៃនេះបានធ្វើឲ្យប៉ះពាល់ដល់ប្រជាជនប៉ាឡេស្ទីនចំនួន ៨៣ ០០០នាក់ ពិសេសអ្នករស់នៅក្នុងតំបន់ស៊ីហ្សកដានីដែលចង់ធ្វើដំណើរទៅកាន់ទីក្រុងហ្សេរ៉ុយសាឡិមខាងកើតក្នុងរយៈពេលពិធីតមអាហាររបស់អ្នកកាន់សាសនាអ៊ីស្លាម និងអ្នកដែលចង់ធ្វើដំណើរចូលទឹកដីអ៊ីស្រាអែលដើម្បីទៅលេង និងសួរសុខទុក្ខក្រុមគ្រួសារ។ ទន្ទឹមគ្នានេះ អ៊ីស្រាអែលក៏បានសម្រេចចិត្តផ្អាប់ទុកមួយរយៈនូវរាល់ពាក្យសុំរបស់ប្រជាជនប៉ាឡេស្ទីនរស់ក្នុងតំបន់ហ្គាហ្សាដែលចង់ធ្វើដំណើរទៅកាន់ទីក្រុងហ្សេរ៉ុយសាឡិមខាងកើតក្នុងរយៈពេលពិធីតមអាហារ។
សូមជម្រាបជូនថា តំបន់ហ្គាហ្សាជាដែនដីរបស់ប៉ាឡេស្ទីន តែកំពុងស្ថិតក្រោមការបិទខ្ទប់របស់ទាហានអ៊ីសា្រអែល ហើយការចេញ ចូលតំបន់នោះត្រូវតែសុំការអនុញ្ញាតពីអ៊ីស្រាអែលជាមុនសិន។ តាមទំនៀមទម្លាប់ប្រពៃណី ប្រជាជនប៉ាឡេស្ទីននៅតំបន់ហ្កាហ្សាតែងតែបានដាក់ពាក្យសុំពីអ៊ីសា្រអែលដើម្បីធ្វើដំណើរទៅចូលរួមសូត្រធម៌ បន់ស្រន់នៅទីក្រុងហ្សេរ៉ុយសាឡិមខាងកើតក្នុងរយៈពេលពិធីតមអាហារ។
វិធានការចាស់ដៃភ្លាមៗរបស់អ៊ីស្រាអែលពេលនេះបានធ្វើឡើង បន្ទាប់ពីមានយុវជនប៉ាឡេស្ទីនប្រដាប់អាវុធចំនួនពីរនាក់បានបើកការបាញ់រះលើហ្វូងមនុស្សដែលកំពុងអង្គុយស្រស់ស្រូបអាហារនៅសំយ៉ាបភោជនីយដ្ឋានមួយក្នុងទីក្រុងតេឡាវី។ ឧប្បត្តិហេតុនោះបានបណ្តាលឲ្យមានមនុស្សស្លាប់ ៤នាក់ និងរបួស ៥នាក់ផ្សេងទៀត ហើយជនដៃដល់ប៉ាឡេស្ទីនទាំងពីរនាក់ក៏ត្រូវបានចាប់ខ្លួន។ ជារឿយៗ តែងតែមានព្រឹត្តិការណ៍វាយប្រហារក្នុងទឹកដីអ៊ីស្រាអែលពីសំណាក់ប៉ាឡេស្ទីន តែការវាយប្រហារលើកនេះជាលើកទី១ គិតតាំងខែតុលាការកន្លងទៅដែលបណ្តាលឲ្យស្លាប់ប្រជាជនអ៊ីស្រាអែលច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ