អ៊ីស្រាអែលបើកឲ្យប្រជាជនប៉ាឡេស្ទីន ចូលទៅទីទួលវិហារអ៊ីស្លាមបូរាណ ដើម្បីបន្ថយភាពតានតឹង
ទីបំផុត បន្ទាប់ពីមានអន្តរាគមន៍ ពីសហគមន៍អន្តរជាតិ ដែលសំណូមពរ ឲ្យមានការយល់យោគគ្នា ដើម្បីបន្ធូរបន្ថយភាពតានតឹង រវាងអ៊ីស្រាអ៊ែល និង ប៉ាឡេស្ទីន នៅថ្ងៃសុក្រទី ២៣ តុលាម្សិលមិញ អាជ្ញាធរ អ៊ីស្រាអែល បានសម្រេច បើកច្រកចេញចូល ឲ្យប្រជាជនប៉ាឡេស្ទីន អាចចូលទៅកាន់ទីលានវិហារអ៊ីស្លាមបូរាណ ដែលជាទីសក្ការៈបូជាធំបំផុត របស់ប្រជាជនអ៊ីស្លាម។ នេះជាកាយវិការ ដែលត្រូវបានគេមើលឃើញថា ដើម្បីបន្ធូរបន្ថយ សកម្មភាពហឹង្សា របស់យុវជនប៉ាឡេស្ទីន ដែលក្តៅក្រហាយ ដោយសារតែការជិះជាន់ ហាមឃាត់ពីសំណាក់ អាជ្ញាធរអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:១២
ថ្ងៃសុក្រ ទី ២៣ តុលា ប្រជាជនប៉ាឡេស្ទីនទាំងចាស់ទាំងក្មេង អ្នករស់នៅតំបន់ហ្សេរូសាឡឹមខាងកើត បានបញ្ជៀតគ្នា ណែនណាន់តាន់តាប់ ដើម្បីឡើងទៅកាន់វិហារអ៊ីស្លាមបូរាណ ដែលជាទីសក្ការៈបូជារបស់ពួកគេ។ អស់រយៈពេល ២សប្តាហ៍មកហើយ ដែលអាជ្ញាធរអ៊ីស្រាអែល បានបិទច្រកចេញចូលនេះ មិនឲ្យប្រជាជនប៉ាឡេស្ទីនអាយុក្រោម៥០ឆ្នាំ ឡើងទៅទេ ដើម្បីចៀសវាងកុំឲ្យមានអំពើភេរវកម្ម។
ទើបតែនៅថ្ងៃនេះ អ៊ីស្រាអែល បានបើកផ្លូវ លែងធ្វើការត្រួតពិនិត្យតឹងរឹង ហើយអនុញ្ញាត ឲ្យប្រជាជនប៉ាឡេស្ទីនគ្រប់វ័យចូលទៅ ទីលានវិហារអ៊ីស្លាមបូរាណ។ តាមការផ្តល់ដំណឹង នេះគឺជាការស្នើរសុំ ពីលោករដ្ឋមន្ត្រីការបរទេសសហរដ្ឋអាមេរិក ចន ឃែរី ដែលយល់ថា ការបិទទីលានវិហារ អ៊ីស្លាមបូរាណ វាមិនបានផ្តល់ផលប្រយោជន៍អ្វីទេ ផ្ទុយទៅវិញ គឺវារឹតតែបញ្ឆេះកំហឹង យុវជនប៉ាឡេស្ទីន ឲ្យធ្វើអំពើហិង្សាកាន់តែខ្លាំង។
ជាការពិតណាស់ រដ្ឋាភិបាល លោកនេតាន់យ៉ាហ៊ូ បានរងការរិះគន់ជាខ្លាំង ក្នុងរយៈពេល ពីរសប្តាហ៍កន្លងមកនេះ។ រដ្ឋាភិបាលអ៊ីស្រាអែល ត្រូវបានសហគមន៍អន្តរជាតិ ស្តីបន្ទោសថា បានប្រើកម្លាំង ជ្រុលហួសហេតុ ក្នុងការបិទខ្ទប់អំពើហិង្សាផុសផុល របស់យុវជនប៉ាឡេស្ទីន ដែលការនេះ វាបានបង្ករការលំបាក ដល់ប្រជាជនប៉ាឡេស្ទីនទូទៅ ហើយព្រមទាំងដុតកំហឹងរបស់ពួកគេ ឲ្យរឹតតែក្តៅងំខ្លាំងឡើង ថែមទៀត។
សូមបញ្ជាក់ថា កន្លងមក ទីលានវិហារអ៊ីស្លាមបូរាណនេះ តែងតែជាចំណុចក្តៅ ដែលជះចេញជាអំពើហឹង្សារវាង អ៊ីស្រាអែល និងប៉ាឡេស្ទីន ព្រោះវាជាទីសក្ការៈបូជារបស់ប្រជាជនអ៊ីស្លាម ហើយ ទីនោះក៏ជាអតីតវិហារបូរាណ ជាទីសក្ការៈរបស់ប្រជាជនកាន់សាសនាជ្វីហ្វផងដែរ។ ដើម្បីបញ្ជៀសបញ្ហា ការគ្រប់គ្រងចាត់ចែងទីលានវិហារអ៊ីស្លាមបូរាណនេះ ត្រូវបានប្រគល់ទៅឲ្យមូលនិធិមួយ របស់ប្រទេសហ្សកដានី ក៏ប៉ុន្តែអ៊ីស្រាអែល ជាអ្នកត្រួតពិនិត្យការចេញចូល ទៅមក។
កន្លងមក ប៉ាឡេស្ទីន បានចោទប្រកាន់អ៊ីស្រាអែល ថាធ្វើតាមតែចិត្តខ្លួន ពេលចង់បើកឲ្យចូលក៏បើក ចង់បិទក៏បិទ។ ទោះបីជាយ៉ាងណាក៏ដោយ កាយវិការអ៊ីស្រាអែលនាពេលនេះ វាក៏ជាកាយវិការល្អមួយដែរ ក្នុងការបន្ធូរបន្ថយស្ថានការណ៍ នៃអំពើហិង្សា ដែលបានរីករាលដាល ពាសពេញតំបន់ហ្សេរូសាឡឹម និងតំបន់ស៊ីសហ្សកដានី។ ប៉ុន្តែនេះមិនមានន័យថា ជម្លោះអ៊ីស្រាអែល-ប៉ាឡេស្ទីន និងត្រូវបិទបញ្ចប់នោះទេ។ ដរាបណា អ៊ីស្រាអែល នៅតែបន្តទន្ទ្រានយកដីប៉ាឡេស្ទីន ក្នុងតំបន់ស៊ីសហ្សកដានី ហើយបំបិទសិទ្ធិសេរីភាពដើរហើរ របស់ប្រជាជនប៉ាឡេស្ទីន អំពើហិង្សាបះបោរថ្មីទៀត នឹងអាចកើតមានឡើង គ្រប់ពេលទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ