ស៊ីរី៖កិច្ចព្រមព្រៀងឈប់បាញ់កំពុងស្ថិតក្នុងភាពជាប់គាំង
នៅក្នុងប្រទេសស៊ីរី កិច្ចព្រមព្រៀងឈប់បាញ់ដែលបានចូលជាធរមានតាំងពីថ្ងៃចន្ទ ទី១២ កញ្ញាបានផុតកំណត់នៅរំលងអធ្រាត្រថ្ងៃអាទិត្យ ទី១៨ កញ្ញា។ នៅថ្ងៃចន្ទ ទី១៩ កញ្ញានេះ កិច្ចព្រមព្រៀងឈប់បាញ់កំពុងបន្តស្ថិតក្នុងភាពស្រពិចស្រពិល ព្រោះភាគីអាមេរិក និងរុស្ស៊ីដែលជាតួអង្គនៃកិច្ចព្រមព្រៀងនៅមិនទាន់បានប្រកាសឲ្យដឹងថា តើត្រូវពន្យាពេល ឬមិនពន្យាពេលបន្ថែមឬអត់ទេ។ ទន្ទឹមគ្នានេះ អាមេរិក និងរុស្ស៊ីក៏កំពុងចោទគ្នាទៅវិញ ទៅមកពីការរំលោភបំពានលើកិច្ចព្រមព្រៀង។
ចុះផ្សាយនៅថ្ងៃ៖ កែប្រែថ្ងៃទី៖
ការដំឡើងសរសៃ ក ដាក់គ្នារវាងអាមេរិក និងរុស្ស៊ីបានកើតមានឡើង បន្ទាប់ពីក្រុម អ្នកសង្កេរការណ៍សិទ្ធិមនុស្សនៅស៊ីរីបានប្រកាសឲ្យដឹងថា កម្លាំងសម្ព័ន្ធមិត្តអន្តរជាតិដឹកនាំដោយអាមេរិកបានទម្លាក់គ្រាប់បែកលើកម្លាំងទ័ពរដ្ឋាភិបាលស៊ីរី និងទៅលើស្រុកមួយចំនួនក្នុងទីក្រុងអាឡិបដែលសរុបទៅមានមនុស្សស្លាប់យ៉ាងតិច ៩០នាក់។ ឧប្បត្តិវហេតុទាំងអស់នេះបានកើតមានឡើងនៅថ្ងៃសៅរ៍ និងថ្ងៃអាទិត្យ ទី១៨ កញ្ញា ពោលចំពេលដែលកិច្ចព្រមព្រៀងឈប់បាញ់កំពុងនៅជាធរមាន។ កម្លាំងសម្ព័ន្ធមិត្តមិនបានបដិសេធចំពោះព័ត៌មាននេះទេ តែបានសារភាពថា ខ្លួនស្មានតែទីតាំងវាយប្រហារនោះជាទីតាំងរបស់អង្គការរដ្ឋអ៊ីស្លាម។
យ៉ាងណាក៏ដោយ ប្រទេសរុស្ស៊ីបានទាមទារឲ្យបើកការស៊ើបអង្កេតជាបន្ទាន់មួយដើម្បីស្វែងរកការពិត។ ដោយមិនទម្លាក់កំហុសត្រង់ៗដាក់អាមេរិក ក្រសួងការបរទេសរុស្ស៊ីបានថ្លែងនៅថ្ងៃអាទិត្យ ទី១៨ កញ្ញាថា បើអាមេរិកមិនបានបញ្ជាឲ្យក្រុមពីឡុតទៅទម្លាក់គ្រាប់បែកលើកម្លាំងរដ្ឋាភិបាលស៊ីរី និងលើទីក្រុងអាឡិបទេ នោះមានន័យថា ក្រុមពីឡុតខ្លួនឯងជាឧក្រិដ្ឋជនដែលបានចេញមុខគាំទ្រពួកជីហាតអង្គការរដ្ឋអ៊ីស្លាម។ នៅខាងរដ្ឋាភិបាលស៊ីរីវិញ ទីប្រឹក្សារបស់លោកប្រធានាធិបតីស៊ីរីអាសាដបានចាត់ទុកទង្វើវាយប្រហាររបស់កម្លាំងសម្ព័ន្ធមិត្តថាមិនមែនជាការភាន់ច្រឡំទេ តែជាទង្វើរៀបចំទុកមុន។
នៅពេលនេះ កិច្ចព្រមព្រៀងដែលបានចូលជាធរមានតាំងពីថ្ងៃទី១២ កញ្ញាកំពុងជាប់គាំងដោយនៅមិនទាន់មានការប្រកាសពីការពន្យាពេលបន្ថែមឬអត់ទេ។ ទន្ទឹមគ្នានេះ អាមេរិក និងរុស្ស៊ីដែលជាតួអង្គនៃកិច្ចព្រមព្រៀងបែរជាកំពុងដំឡើងសម្លេងដាក់គ្នាដោយធ្វើការចោទគ្នាទៅវិញ ទៅមកពីបទរំលោភបំពានលើកិច្ចព្រមព្រៀងនោះ។ សូមរម្លឹកជូនថា កិច្ចព្រមព្រៀងឈប់បាញ់នៅស៊ីរីជាកិច្ចព្រមព្រៀងអនុម័តដោយទីក្រុងវ៉ាស៊ីនតោន និងមូស្គូ។ កម្មវត្ថុ គឺសម្រួលឲ្យមានកិច្ចសហប្រតិបត្តិការយោធារវាងអាមេរិក និងរុស្ស៊ីនៅក្នុងយុទ្ធនាការប្រឆាំងអង្គការរដ្ឋអ៊ីស្លាមក្នុងទឹកដីស៊ីរី។ ទន្ទឹមគ្នានេះ កិច្ចព្រមព្រៀងឈប់បាញ់ក៏ជួយសម្រួលឲ្យមានការដឹកជំនួយមនុស្សធម៌ទៅឲ្យពលរដ្ឋស៊ីរីដែលកំពុងជាប់កុននៅក្នុងទីក្រុងអាឡិបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ