ទស្សនកិច្ចដ៏កម្ររបស់ស្តេចហ្សកដានីនៅដែនដីប៉ាឡេស្ទីន
ព្រះចៅ អាដាឡា Abdallah II ស្តេចហ្សកដានី បានអញ្ជើញទៅដល់តំបន់ស៊ីហ្សកដានី ហើយនៅថ្ងៃចន្ទនេះ ដើម្បីបំពេញទស្សនកិច្ចនិងជួបពិភាក្សាជាមួយប្រធានអាជ្ញាធរដែនដីប៉ាឡេស្ទីន លោក មះម៉ូដ អាបាស Mahmoud Abbas។ ជាដំណើរទស្សនកិច្ចដ៏កម្រ ដែលប្រព្រឹត្តទៅតែប៉ុន្មានថ្ងៃក្រោយហេតុការណ៍ហិង្សានៅក្រុងហ្ស៊េរុយសាឡិម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ប្រមុខដឹកនាំទាំងពីរធ្លាប់ជួបពិភាក្សាគ្នាជាញឹកញយណាស់ នៅក្រុងអាម៉ង់ ប្រទេសហ្សកដានី ឬក្រុងផ្សេងទៀតនៅក្នុងតំបន់ ប៉ុន្តែព្រះចៅ អាប់ដាឡា មិនដែលយាងទៅក្រុងរ៉ាម៉ាឡា ក្រុងរដ្ឋបាលរបស់អាជ្ញាធរប៉ាឡេស្ទីនទេ តាំងពីខែធ្នូ ឆ្នាំ២០១២មក។
ដំណើរទស្សនកិច្ចរបស់ព្រះអាដាឡា ថ្ងៃនេះ អាចសម្រេចទៅបានដោយមានកិច្ចសហប្រតិបត្តិការជាមួយអ៊ីស្រាអែល ដែលចាំយាមនៅតាមគ្រប់ច្រកចេញចូលទៅកាន់តំបន់ស៊ីហ្សកដានី និងតាមបណ្តោយព្រំដែន ខណ្ឌចែកប៉ាឡេស្ទីន-ហ្សកដានី ប្រវែង ១៥០គីឡូម៉ែត្រផង ព្រមទាំងការត្រួតពិនិត្យសន្តិសុខផ្លូវអាកាសផង។ ឧទ្ធម្ភាគចក្រព្រះចៅអាដាឡា បានចុះចតក្នុងទីធ្លា វិមានរដ្ឋ នៃក្រុងរ៉ាម៉ាឡា តែម្តង។
ឥស្សរជនទាំងពីរត្រូវពិភាក្សាគ្នាក្នុងក្របខណ្ឌនៃការពិគ្រោះយោបល់គ្នាតាមទម្លាប់ ស្តីអំពីស្ថានភាពទូទៅនៅក្នុងតំបន់ ពិសេសអំពីស្ថានភាពនៅក្រុងហ្ស៊េរុយសាឡិម និងអំពីកិច្ចខិតខំប្រឹងប្រែងដោះស្រាយវិបត្តនោះ។ ជោគវាសនានៃកិច្ចចរចាសន្តិភាពអ៊ីស្រាអែល ប៉ាឡេស្ទីន ដែលគាំងស្តូកស្តឹងតាំងជាងបីឆ្នាំមក ក៏ទំនងជានឹងត្រូវបានលើកមកជជែកគ្នាក្នុងជំនួបនេះដែរ ប៉ុន្តែអ្នកទទួលខុសត្រូវប៉ាឡេស្ទីនបដិសេធមិនផ្តល់ព័ត៌មានលម្អិតទេ។
ទស្សនកិច្ចរបស់ព្រះចៅ អាដាឡា នេះប្រព្រឹត្តទៅតែពីរសប្តាហ៍ ក្រោយហេតុការណ៍ហិង្សា នៅក្រុងហ្ស៊េរុយសាឡិម និងតំបន់អាណានិគមកិច្ច ប្រឆាំងនឹងការដាក់ទ្វារចាប់ជាតិផ្ទុះ និងម៉ាស៊ីនថតចាប់អាវុធ នៅច្រកទ្វារចូលទៅកាន់ទីលានសក្តិសិទ្ធិ សម្រេចដោយអាជ្ញាធរអ៊ីស្រាអែល។
ហ្សកដានី គាំទ្រប៉ាឡេស្ទីន និងជាប្រទេសដែលដើរតួនាទីមិនអាចខ្វះបានក្នុងជម្លោះអ៊ីស្រាអែល-ប៉ាឡេស្ទីន។ ជាមួយអេហ្ស៊ីប ហ្ស័កដានីជាប្រទេសអារ៉ាបតែមួយគត់ដែលមានសន្តិភាពជាមួយអ៊ីស្រាអែល។ ហ្សកដានីក៏ជាឆ្មាំគ្រប់គ្រងរដ្ឋបាលក្រុងហ្ស៊េរុយសាឡិម ដែលជាទីលានសក្តិសិទ្ធិរបស់អ៊ីស្លាមផង និងរបស់ជនជាតិជ្វីហ្វផង តាំងពីឆ្នាំ១៩២០មក ព្រមទាំងតំណាងដៃគូសន្ទនាគួរឱ្យទុកចិត្តរបស់អាមេរិកទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ