កងទ័ពអ៊ីរ៉ាក់ប្រកាសថាបានវាយប្រហារទៅក្បួនរថយន្តមេដឹកនាំជីហាតនៃអង្គការរដ្ឋអ៊ីស្លាម
យន្តហោះចម្បាំងរបស់កងទ័ពអ៊ីរ៉ាក់ បានវាយប្រហារទៅលើក្បួនរថយន្ត ដែលមានដឹកអាប៊ូ បាក់ អាល់ បាក់ដាឌី មេដឹកនាំក្រុមជីហាត នៃអង្គការរដ្ឋអ៊ីស្លាម ដែលកំពុងកាន់កាប់ទឹកដីមួយភាគធំ ពីស៊ីរី ទៅអ៊ីរ៉ាក់។ គឺអង្គភាពព័ត៌មាន សង្រ្គាមរបស់ក្រសួងការពារជាតិ និងក្រសួងមហាផ្ទៃអ៊ីរ៉ាក់ ដែលបានបញ្ចេញព័ត៌មាននេះ កាលពីថ្ងៃអាទិត្យម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កងទ័ពអ៊ីរ៉ាក់បានប្រកាស កាលពីថ្ងៃអាទិត្យ ថា ខ្លួនបានធ្វើប្រតិបត្តិការដ៏វីរភាពមួយ ដោយបានវាយប្រហារទៅលើក្បួនរថយន្ត ដែលមានដឹកមេដឹកនាំ ក្រុមជីហាតនៃអង្គការរដ្ឋអ៊ីស្លាមអាប៊ូ បាក់ អាល់ បាក់ដាឌី។ តាមសេចក្តី ប្រកាសព័ត៌មានរបស់ក្រសួងការពារជាតិអ៊ីរ៉ាក់ យន្តហោះចម្បាំងរបស់កងទ័ពអ៊ីរ៉ាក់បាញ់ សំដៅក្បួនរថយន្ត របស់មេដឹកនាំក្រុមជីហាតនៃអង្គការរដ្ឋអ៊ីស្លាម ដែល កំពុងតម្រង់ សំដៅទៅចូលរួមប្រជុំជាមួយមេដឹកនាំយោធារបស់ក្រុមអង្គការរដ្ឋអ៊ីស្លាម នៅតំបន់ការ៉ាប្លា ដែលស្ថិតនៅប្រមាណ ៥គីឡូម៉ែត្រ ពីព្រំដែនស៊ីរី។ អ្នកនាំពាក្យរបស់ក្រសួងមហាផ្ទៃអ៊ីរ៉ាក់បានបញ្ជាក់ថា ប្រតិបត្តិការទ័ពជើងអាកាសអ៊ីរ៉ាក់ វាយប្រហារទៅលើក្បួនរថយន្តមេដឹកនាំក្រុមជីហាត ធ្វើឡើង កាលពីថ្ងៃសៅរ៍។
សេចក្តីប្រកាសព័ត៌មានរបស់អង្គភាពព័ត៌មានសង្រ្គាម នៃក្រសួងការពារជាតិ អ៊ីរ៉ាក់ មិនបានបញ្ជាក់ថា តើមេដឹកនាំ បាក់ដាឌី ស្លាប់ ឬរស់នោះទេ។ គេគ្រាន់តែនិយាយថា អាល់ បាក់ដាឌី ត្រូវបានដឹកក្នុងរថយន្តមួយ នៅក្រោយ ការវាយប្រហាររបស់ទ័ពអាកាសអ៊ីរ៉ាក់។
នៅប៉ុន្មានឆ្នាំចុងក្រោយនេះ អាប៊ូ បាក់ អាល់ បាក់ដាឌី ដែលបានផ្តាច់ខ្លួនចេញពីក្រុមអាល់កៃដា អ៊ីរ៉ាក់ នៅឆ្នាំ២០១២ បានឆ្លៀតយកសង្រ្គាមស៊ីវិលនៅស៊ីរី ដើម្បី បង្កើនឥទ្ធិពល និងអំណាចកាន់តែខ្លាំង គឺខ្លាំងជាងអូសាម៉ា បិនឡាដិន មេបណ្តាញអាល់កៃដានៅអាហ្វហ្កានីស្ថានទៅទៀត។ អាប៊ូ បាក់ អាល់ បាក់ដាឌី ដែលដឹកនាំក្រុមជីហាត នៃអង្គការរដ្ឋអ៊ីស្លាម រាប់ម៉ឺននាក់ ធ្វើសង្រ្គាមនៅស៊ីរី និងនៅអ៊ីរ៉ាក់ បានស្វ័យប្រកាសជាមេដឹកនាំកាលីហ្វារ កាលពីខែមិថុនា ឆ្នាំ ២០១៤កន្លងទៅ។
អាល់ បាក់ដាឌី ដែលអាមេរិកផ្តល់តម្លៃក្បាល ១០លានដុល្លារ ធ្លាប់ត្រូវបានគេប្រកាសស្លាប់ជាច្រើនដងមកហើយ។ កាលពីខែមេសាកន្លងទៅ កងទ័ពអ៊ីរ៉ាក់ដដែល ធ្លាប់អះអាង មេដឹកនាំក្រុមជីហាតនៃអង្គការរដ្ឋអ៊ីស្លាម បានស្លាប់ ឬរបួស នៅក្នុងការវាយប្រហាររបស់យន្តហោះចម្បាំងអ៊ីរ៉ាក់។ ប៉ុន្តែ មួយខែក្រោយមក សំឡេង របស់អាប៊ូ បាក់ អាល់ បាក់ដាឌីត្រូវបានក្រុមជីហាត បញ្ចេញផ្សព្វផ្សាយ ដើម្បីបំបាត់ចោលទៅវិញពាក្យចចាមអារ៉ាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ