សម្ព័ន្ធអារ៉ាប់បើកជំនួបកំពូលនៅអេហ្ស៊ីប ចំពេលដែលអារ៉ាប៊ីសាអូឌីតវាយប្រហារពួកហ៊ូទី្សនៅយេម៉ែន
សម្ព័ន្ធអារ៉ាប់បានផ្តើមបើកជំនួបកំពូលរយៈពេល ២ថ្ងៃនៅក្នុងទីក្រុងស្ហារម៉ែល ឆែក (CHARM EL-CHEIKH) ប្រទេសអេសហ្ស៊ីបដោយចាប់ផ្តើមនៅថ្ងៃសៅរ៍ ទី២៨ មីនានេះ។ ជំនួបកំពូលរបស់សម្ព័ន្ធអារ៉ាប់ពេលនេះបានរៀបចំធ្វើឡើង ចំពេលដែលកម្លំាងសម្ព័ន្ធមិត្តអារ៉ាប់ដឹកនំាដោយប្រទេសអារ៉ាប៊ីសាអូឌីតកំពុងវាយប្រហារតាមផ្លូវអាកាសលើពួកឧទ្ទាមហ៊ូទី្សនិកាយឈីអ៊ីតនៅក្នុងប្រទេសយេម៉ែន។ មានប្រធានបទជាច្រើនដែលជំនួបកំពូលត្រូវលើកយកទៅជជែក ពិសេសគម្រោងបង្កើតកម្លំាងពហុជាតិអារ៉ាប់មួយនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គេនៅមិនទាន់ដឹងថា តើកម្លំាងពុហជាតិអារ៉ាប់នឹងអាចបង្កើតបាន ឬអត់ និងថា បើបង្កើតបាន តើវានឹងមានរចនាសម្ព័ន្ធយ៉ាងណានោះទេ។ អ្វីដែលគេដឹង ការបង្កើតឲ្យមានកម្លំាងពហុជាតិអារ៉ាប់មួយនៅក្នុងតំបន់ គឺជាសំណើទាមទារយ៉ាងទទូចរបស់លោកប្រធានាធិបតីអេហ្ស៊ីបអាប់ដែល ហ្វាតា អាល់ស៊ីស៊ីតំាងពីប៉ុន្មានសប្តាហ៍កន្លងមក។ បើយោងតាមសំណើរបស់អេហ្ស៊ីប កម្លំាងពហុជាតិអារ៉ាប់នឹងត្រូវចូលរួមដោយប្រទេសសមាជិកសម្ព័ន្ធអារ៉ាប់ទំាងអស់ និងមានតួនាទីចេញធ្វើអន្តរាគមន៍យោធារហ័សដើម្បីប្រឈមទប់រាល់ការគំរាមកំហែងលើបណ្តាប្រទេសអារ៉ាប់ក្នុងតំបន់។
អ្វីដែលលោកប្រមុខរដ្ឋអេហ្ស៊ីបបារម្ភខ្លំាង គឺការគំរាមកំហែងពីចលនាភេរវនិយម ពិសេសពីអង្គការរដ្ឋអ៊ីស្លាមនៅក្នុងប្រទេសស៊ីរី ឬអ៊ីរ៉ាក់ និងដែលពួកជ្រុលនិយមនេះបាន និងកំពុងបន្តឆ្លងវាតទីចូលក្នុងប្រទេសលីប៊ី និងតំបន់ស៊ីណៃក្នុងប្រទេសអេហ្ស៊ីប។ ទន្ទឹមនឹងការប្រឈមទប់នឹងពួកជ្រុលនិយមនិកាយស៊ុយនីត កម្មវត្ថុចម្បងនៃការបង្កើតកម្លំាងពហុជាតិអារ៉ាប់ក៏ជាវិធានការបង្ការទប់នឹងការពង្រីកឥទ្ធិពលរបស់អ៊ីរ៉ង់និកាយឈីអ៊ីតនៅក្នុងតំបន់ដែរ។ គួរជម្រាបជូនថា អេហ្ស៊ីបជាប្រទេសអារ៉ាប់មួយក្នុងតំបន់ដែលកងទ័ពមានបំពាក់អាវុធទំនើបៗ និងមានចំនួនទ័ពច្រើនជាងគេ។
ក្រៅពីជជែកជុំវិញគម្រោងបង្កើតកម្លំាងពហុជាតិអារ៉ាប់ ជំនួបកំពូលរបស់សម្ព័ន្ធអារ៉ាប់ក៏ផ្តោតលើសំណុំរឿងសំខាន់មួយចំនួនទៀត ដូចជាជម្លោះរវាងប៉ាឡេស្ទីន និងអ៊ីស្រាអែល ព្រមទំាងកំណើនឥទ្ធិពលរបស់អង្គការរដ្ឋអ៊ីស្លាម។ ជាការកត់សម្គាល់ ជំនួបកំពូលរបស់សម្ព័ន្ធអារ៉ាប់ពេលនេះបានធ្វើឡើង ចំពេលដែលប្រទេសអារ៉ាប៊ីសាអូឌីតកំពុងដឹកនំាកម្លំាងសម្ព័ន្ធអារ៉ាប់វាយប្រហារតាមផ្លូវអាកាសលើពួកឧទ្ទាមហ៊ូទី្សនិកាយឈីអ៊ីតក្នុងប្រទេសយេម៉ែន។ កម្លំាងសម្ព័ន្ធអារ៉ាប់ដែលចូលរួមដោយ៥ប្រទេសក្នុងតំបន់ឈូងសមុទ្រពែរ្ស បូកនឹងប្រទេសអេហ្ស៊ីប។ អេហ្ស៊ីបដែលបានប្រកាសឲ្យដឹងថា បានត្រៀមខ្លួនរួចជាស្រេចដើម្បីបញ្ជូនទ័ពថ្មើរជើងទៅយេម៉ែន បើចំាបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ