ម៉ូស្គូអំពាវនាវសម្ព័ន្ធប្រឆាំងក្រុមភេរវនិយមជីហាត ឲ្យសហការជាមួយក្រុងដាម៉ាស
ម៉ូស្គូបានអំពាវនាវ សម្ព័ន្ធអន្តរជាតិ ដែលដឹកនាំដោយសហរដ្ឋអាមេរិក ឲ្យ សហការ ជាមួយរដ្ឋាភិបាលស៊ីរីទៅ ទើបសម្របសម្រួលកម្លាំងគ្នា បានគ្រាន់បើជាង សម្រាប់ វាយប្រហារ ទៅលើ ក្រុមភេរវនិយមជីហាត នៃអង្គការរដ្ឋអ៊ីស្លាម។ ការអំពាវនាវនេះ ត្រូវបានធ្វើឡើង នារសៀលថ្ងៃ១១កញ្ញាម្សិលមិញ ដោយលោករដ្ឋមន្ត្រីការបរទេសរុស្ស៊ី ក្នុងសន្និសីទកាសែត នៅឯក្រសួងការបរទេសរុស្ស៊ី ដោយរួមជាមួយ សមភាគីម៉ុងហ្គោលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ថ្លែងក្នុងសន្និសីទកាសែតនោះ លោកប្រមុខការទូតរុស្ស៊ី ស៊ែរហ្គៃ ឡាវ៉្រូវ លើកឡើង ជាអាទ៍ថា ទោះយឺតពេលក្តី ក៏នៅមិនទាន់ហួសពេលទេ ម៉្លោះហើយបានជាយើង សូមអំពារនាវ ម្តងទៀតទៅកាន់បណ្តាប្រទេសក្នុងសម្ព័ន្ធនោះ ឲ្យសហការជាមួយរដ្ឋាភិបាលស៊ីរី និង ជាមួយ កងទ័ពស៊ីរីទៅ ដ្បិតទ័ពជើងគោកស៊ីរី ល្បីដោយប្រសិទ្ធិភាពនិងភាពខ្លាំងពូកែរបស់ខ្លួន ខាង ច្បាំង ទល់នឹង អង្គការភេរវនិយមនៃអង្គការរដ្ឋអ៊ីស្លាម។ លោកឡាវ៉្រូវ សង្កត់ធ្ងន់ថា បំណងរបស់រុស្ស៊ី គឺចង់ឲ្យ ការប្រយុទ្ធទល់នឹង អង្គការរដ្ឋអ៊ីស្លាម មានទម្រង់ ការងារជាក្រុមប្រព្រឹត្តទៅ សមស្របនឹងបទដ្ឋាននៃច្បាប់អន្តរជាតិ។
ដោយធ្វើសេចក្តីថ្លែងការណ៍នេះ លោករដ្ឋមន្ត្រីការបរទេសរុស្ស៊ី ក៏ អំពាវនាវ ក្រុងវ៉ាស៊ីនតោន ឲ្យស្តារឡើងវិញទៅ ខ្សែរយៈគមនាគមន៍ ជាមួយក្រុងម៉ូស្គូ។ តាមដែលគាត់លំអិត ការនេះ សំខាន់ណាស់ ដើម្បីបញ្ជៀស កុំឲ្យកើតឡើងជា ឧប្បត្តិហេតុអចេតនា។ អ្នកការទូតកំពូលនេះរបស់រុស្ស៊ី បានអះអាងជាថ្មីថា ប្រទេសរុស្ស៊ីនឹងបន្តផ្តល់បរិក្ខារណា ដែលត្រូវការជាចាំបាច់ សម្រាប់រដ្ឋាភិបាលស៊ីរី ការពារខ្លួន ទល់ នឹង ការគំរាមភេរវនិយម។
ថ្ងៃព្រហស្បតិ៍ ទី១០កញ្ញា លោកឡាវ៉្រូវបានបដិសេធច្រានចោល ការចោទប្រកាន់ពីខាងស.រ.អា. ដែលថារុស្ស៊ី បង្កើនវត្តមានយោធាស្អីណានៅស៊ីរី និង ពេលថ្មីៗថែមទាំងបានពង្រាយ សម្ភារៈ យោធានិងពួកទាហាន នៅជិតក្រុង Lattaquié ដែលជា ដែនអំណាចរបស់លោកប្រធានាធិបតី បាស្ហារ អាល អាសាដទៅផង។ ប៉ុន្តែ លោកប្រមុខការទូតរុស្ស៊ីនោះ បានសារភាពទទួលស្គាល់ជាលើកទី១ថា យន្តហោះរុស្ស៊ី ដែលហោះទៅស៊ីរីបានដឹកទៅ មិនគ្រាន់តែជំនួយមនុស្សធម៌ប៉ុណ្ណោះទេ តែក៏ទាំងបរិក្ខារយោធា ស្របនឹង កិច្ចសន្យាដែលមានចុះ ជាមួយក្រុងដាម៉ាស។
ស.រ.អា. បារម្ភខ្លាចក្រែង យន្តហោះទាំងនោះដើរតួជាស្ពាន ដឹកសម្ភារៈនិងទ័ពរុស្ស៊ីទៅបង្កើត ជាមូលដ្ឋានកងអាកាសឈានមុខនៅស៊ីរី សម្រាប់គាំទ្រ របបគ្រប់គ្រងក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ