មេក្រុមជីហាតរដ្ឋអ៊ីស្លាមអំពាវនាវអោយសកម្មជនជីហាតប្រឹងរក្សាទីក្រុងមូស៊ូល មិនអោយរបូត
មេអង្គការជីហាតរដ្ឋអ៊ីស្លាម អាប៊ូ បាកា អាល់ បាក់ដាតឌី បានអំពាវនាវអោយទាហានជីហាតប្រឹងរក្សាក្រុងមូស៊ូល កុំអោយរបូតទៅក្នុងដៃកងទ័ពអ៊ីរ៉ាក់។ សម្លេងរបស់អាល់ បាក់ដាតឌី ត្រូវបានចុះផ្សាយដោយ សារព័ត៌មាន អាល់ ហ្វៀរកាន់ Al-Furqan ជាសារព័ត៌មានមានទំនាក់ទំនងជាមួយក្រុមជិហាតរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០១:៤០
“រក្សាទីតាំងដោយកិត្តិយស គឺងាយស្រួលជាងព្រមចុះចាញ់ដោយភាពអាម៉ាស គឺងាយជាងក្នុងកម្រិតដល់ទៅ១០០០ដងទៅទៀត” នេះជាសារសម្លេងរបស់មេក្រុមជីហាតរដ្ឋអ៊ីស្លាម អាប៊ូ បាកា អាល់ បាក់ដាតឌី ជាសារសម្លេងអំពាវនាវអោយសកម្មជនជីហាតមិនចុះចាញ់ការប្រយុទ្ធ និងត្រូវប្រឹងរក្សាក្រុងមូស៊ូល កុំអោយធ្លាក់ក្នុងដៃទាហានអ៊ីរ៉ាក់។
គឺនៅក្រុងមូស៊ូលនេះហើយ ដែលមេក្រុមជីហាតរដ្ឋអ៊ីស្លាម អាល់ បាក់ដាតឌី បានប្រកាសបង្កើតដែនដីក្រុមជីហាតរដ្ឋអ៊ីស្លាមឡើង កាលពីខែមិថុនា ឆ្នាំ២០១៤ ជាដែនដីដែលក្រុមជីហាតវាយបាននៅស៊ីរី និងអ៊ីរ៉ាក់។ សកម្មជនក្រុមរដ្ឋអ៊ីស្លាមដែលកំពុងនៅមូស៊ូល សព្វថ្ងៃ មានចំនួនប្រហែល៣០០០ទៅ៥០០០នាក់។
ក្នុងសារអំពាវនាវនេះ អាប៊ូ បាកា អាល់បាក់ដាតឌី ក៏បានចោទអ្នកនយោបាយអ៊ីរ៉ាក់ថានិកាយស៊ុននីត ថាជាជនក្បត់ផងដែរ។ ដោយឡែក មេក្រុមជីហាតរដ្ឋអ៊ីស្លាម បានជំរុញអោយកូនទាហានជីហាតអោយវាយប្រហារអារ៉ាប៊ីសាអូឌីត និងតួកគី។ ទាហានតួកគីកំពុងបោះទីតាំងនៅមូលដ្ឋានមួយកន្លែងក្បែរក្រុងមូស៊ូល។
ក្រោមជំនួយពីកងទ័ពសម្ព័ន្ធមិត្ត កងទ័ពអ៊ីរ៉ាក់ពេលនេះ កំពុងស្ថិតនៅតំបន់ភាគខាងកើតជុំវិញក្រុងមូស៊ូល។ តាំងពីកងទ័ពអ៊ីរ៉ាក់ប្រកាសបើកប្រតិបត្តិការវាយក្រុងមូស៊ូល ថ្ងៃ១៧តុលាមក ប្រជាជន២ម៉ឺននាក់ បាននាំគ្នាភៀសខ្លួន។
អង្គការសហប្រជាជាតិកំពុងបារម្ភពីសន្តិសុខជនស៊ីវិល ២ម៉ឺន៥ពាន់នាក់ នៅក្រុងហាម៉ាម អាល់ អាលីល ភាគខាងត្បូងក្រុងមូស៊ូល។ កាលពីថ្ងៃអង្គារ អង្គការសហប្រជាជាតិប្រាប់ថា ក្រុមភេរវជនបានព្យាយាមដឹកជនស៊ីវិលទាំងនេះ តាមកាំម្ញ៉ុង និងរថយន្តជាច្រើនគ្រឿង ឆ្ពោះទៅជីតទីក្រុង។ អង្គការសហប្រជាជាតិបារម្ភថា ក្រុមភេរវជនរដ្ឋអ៊ីស្លាម អាចនឹងប្រើប្រជាជនទាំងនេះ ធ្វើជាខែលការពារ ក្នុងការប្រយុទ្ធជាមួយកងទ័ពអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ