កងទ័ពប៉ាគីស្ថានទំលាក់គ្រាប់បែកលើវិហារតាលីបង់ សម្លាប់មនុស្ស១៨នាក់
នៅប៉ាគីស្ថាន ថ្ងៃអាទិត្យនេះ កងទ័ពប៉ាគីស្ថានបានបើកយុទ្ធនាការទំលាក់គ្រាប់បែក លើវិហារក្រុមឧទ្ទាមតាលីបង់ជាច្រើន នៅភាគពាយព្យប្រទេស ជាប់ព្រំប្រទល់ជាមួយអាហ្វហ្កានីស្ថាន។ យោងតាមកងទ័ព ពួកឧទ្ទាមតាលីបង់១៨នាក់ បានស្លាប់ក្នុងការទំលាក់គ្រាប់បែកនេះ។ ហេតុការណ៍នេះ បានធ្វើអោយកិច្ចចរចាស្វែងរងសន្តិភាពរវាងរដ្ឋាភិបាលប៉ាគីស្ថាននិងក្រុមតាលីបង់នៅប៉ាគីស្ថាន ត្រូវព្យួរចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ការទំលាក់គ្រាប់បែកកំទេចវិហារក្រុមឧទ្ទាមតាលីបង់ នៅភាគពាយព្យប៉ាគីស្ថាន ថ្ងៃអាទិត្យនេះ ជាប្រតិបត្តិការលើកទី៣ហើយ របស់កងទ័ពប៉ាគីស្ថាន គិតចាប់ពីពេលក្រុមតាលីបង់បានសម្លាប់ទាហានប៉ាគីស្ថាន ២៣នាក់ កាលពីសប្តាហ៍ថ្មីៗកន្លងទៅនេះ។ យន្តហោះកងទ័ព បានទំលាក់គ្រាប់បែក នៅជ្រលងភ្នំទីរ៉ា Tyrah កំទេចរោងចក្រផលិតគ្រាប់បែកដៃច្នៃមួយកន្លែង និងគ្រឿងផ្ទុះមួយចំនួនធំ របស់ពួកតាលីបង់។
ប្រតិបត្តិការយោធាប៉ាគីស្ថាន បានសម្លាប់ពួកតាលីបង់ជាច្រើននាក់ ធ្វើអោយកិច្ចចរចាស្វែងរកសន្តិភាពរវាងរដ្ឋាភិបាលប៉ាគីស្ថាន និងក្រុមតាលីបង់នៅប៉ាគីស្ថាន ត្រូវព្យួរចោល។ កិច្ចចរចានេះ មានទិសដៅបិទបញ្ចប់ការបះបោរនៅប៉ាគីស្ថាន ដែលកើតមានជិត៧ឆ្នាំមកនេះ។ ដោយឡែក នៅភាគពាយព្យ ថ្ងៃអាទិត្យនេះដែរ ប៉ូលិសបានប្រាប់ថា មានការផ្ទុះគ្រាប់បែកច្នៃមួយ នៅក្រុងកូហាត ក្បែរជម្រកក្រុមតាលីបង់ សម្លាប់មនុស្សយ៉ាងហោច១០នាក់ ក្នុងនោះមានស្ត្រី២នាក់ និងកុមារម្នាក់។
ក្នុងការស្វែងរកសន្តិភាពជាមួយរដ្ឋាភិបាលប៉ាគីស្ថាន ក្រុមតាលីបង់បានដាក់លក្ខខណ្ឌអោយរដ្ឋាភិបាលដោះលែងអ្នកទោសតាលីបង់ ដកកងទ័ពចេញពីតំបន់កុលសម្ព័ន្ធដែលជាជម្រករបស់ក្រុមតាលីបង់ និងក្រុមអាល់កៃដា ក្នុងភាគខាងជើងប្រទេស និងដាក់ចេញច្បាប់អ៊ីស្លាមស្ហារីយ៉ា នៅប៉ាគីស្ថានផងដែរ។ ប៉ុន្តែ លក្ខខណ្ឌជាច្រើនក្នុងចំណោមក្ខខណ្ឌទាំងអស់នេះ ត្រូវបានរដ្ឋាភិបាលក្រុងអ៊ីស្លាម៉ាបាត និងកងទ័ពបដិសេធមិនទទួលយក។
កងទ័ពប៉ាគីស្ថាន បានទំលាក់គ្រាប់បែកលើវិហារក្រុមតាលីបង់ នៅព្រឹកថ្ងៃអាទិត្យនេះ ចំពេលជាមួយគ្នានឹងការដែលក្រុមតាលីបង់ នៅអាហ្វហ្កានីស្ថានបានវាយលុកទីតាំងកងទ័ពអាហ្វហ្កានីស្ថាន មួយកន្លែង សម្លាប់ទាហានអាហ្វហ្កានីស្ថាន២០នាក់។ ប្រធានាធិបតីអាហ្វហ្កានីស្ថាន បានបរិហារប៉ាគីស្ថានភ្លាមៗថា មិនអើពើនឹងធ្វើការកំចាត់ជម្រកក្រុមភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ