ហ្វីលីពីនចាប់ផ្តើមពង្រាយទ័ពទៅកាន់សមុទ្រចិនខាងត្បូង
រដ្ឋាភិបាលហ្វីលីពីនបានប្រកាសឲ្យដឹង កាលពីថ្ងៃព្រហស្បតិ៍ម្សិលមិញថា ហ្វីលីពីនបានចាប់ផ្តើមពង្រាយទ័ពទៅកាន់កោះ នៅក្នុងតំបន់សមុទ្រចិនខាងត្បូង។ កោះដែលស្ថិតក្រោមការកាន់កាប់របស់ហ្វីលីពីន តែកំពុងជាប់ជម្លោះជាមួយនឹងចិន។ ការពង្រាយទ័ពនេះ គឺជាការអនុវត្តទៅតាមអ្វី ដែលលោកប្រធានាធិបតីឌុយទែរតេបានប្រកាស កាលពីខែមេសាកន្លងទៅ ប៉ុន្តែ វាអាចនឹងធ្វើឲ្យចិនផ្ទុះកំហឹង។
ចុះផ្សាយនៅថ្ងៃ៖
យោងតាមការឲ្យដឹងរបស់មន្រ្តីរដ្ឋាភិបាលហ្វីលីពីន ទាហាន ព្រមទាំងគ្រឿងបរិក្ខាមួយផ្នែកដំបូង ត្រូវបានបញ្ជូនទៅដល់កោះនៅសមុទ្រចិនខាងត្បូង តាំងពីសប្តាហ៍មុន ហើយហ្វីលីពីនគ្រោងនឹងបញ្ជូនទៅបន្ថែមជាបន្តបន្ទាប់ទៀត នៅក្នុងពេលឆាប់ៗខាងមុខ។ កងទ័ពមួយក្រុមដំបូងនេះ នឹងចាប់ផ្តើមការងារសាងសង់ កែលម្អ និងពង្រីកហេដ្ឋារចនាសម្ព័ន្ធសំខាន់ៗមួយចំនួន នៅលើកោះ ក្នុងនោះ រួមមានដូចជា ការពង្រីកផ្លូវចុះយន្តហោះ ការសាងសង់កំពង់ផែ ពង្រីកបន្ទាយទ័ព ជាដើម នៅក្នុងគម្រោងគិតជាទឹកប្រាក់ ចំនួន ៣២លានដុល្លារអាមេរិក។
គួរបញ្ជាក់ថា កោះដែលហ្វីលីពីនបញ្ជូនកងទ័ពឲ្យទៅធ្វើការសាងសង់ និងពង្រីកហេដ្ឋារចនាសម្ព័ន្ធនេះ ស្ថិតនៅក្នុងតំបន់ប្រជុំកោះស្ព្រែតលី។ ជាកោះដែលបច្ចុប្បន្ននេះស្ថិតក្រោមការកាន់កាប់ជាក់ស្តែងរបស់ហ្វីលីពីន ក៏ប៉ុន្តែ ត្រូវទាមទារដោយចិន។
គេនៅចាំបានថា កាលពីខែមេសាកន្លងទៅនេះ លោកប្រធានាធិបតីហ្វីលីពីនឌុយទែរតេបានប្រកាសថា លោកបានចេញបញ្ជាឲ្យកងទ័ពហ្វីលីពីនចូលកាន់កាប់គ្រប់កោះទាំងអស់ ដែលហ្វីលីពីនកំណត់ថា ស្ថិតក្នុងដែនអធិបតេយ្យរបស់ខ្លួន នៅក្នុងសមុទ្រចិនខាងត្បូង។ ក៏ប៉ុន្តែ ក្រោយពីទទួលរងនូវការតវ៉ាពីចិន លោកឌុយទែរតេក៏បានកែសម្តីមកវិញ ដោយបានបញ្ជាក់ថា លោកនឹងបញ្ជូនទ័ពឲ្យចូលទៅកាន់កាប់កោះណា ដែលហ្វីលីពីនកាន់កាប់រួចទៅហើយ ដោយមិនចូលកាន់កាប់កោះថ្មីទៀតនោះទេ។
ក៏ប៉ុន្តែ បើទោះបីជាត្រឹមបញ្ជូនទាហានឲ្យទៅកាន់កោះដែលហ្វីលីពីនកាន់កាប់រួចហើយក៏ដោយ ក៏ចិនមិនសុខចិត្តនោះដែរ។ ជាក់ស្តែង កាលពីខែមុននេះ ចិនបានធ្វើការតវ៉ាប្រឆាំងយ៉ាងខ្លាំង នៅពេលដែលរដ្ឋមន្រ្តីការពារជាតិហ្វីលីពីនធ្វើដំណើរទៅបំពេញទស្សនកិច្ចលើកោះ ដែលស្ថិតក្រោមការកាន់កាប់របស់ហ្វីលីពីន នៅសមុទ្រចិនខាងត្បូង។ សម្រាប់ចិន កោះដែលហ្វីលីពីនកាន់កាប់នេះ ក៏ដូចជាកោះជាច្រើនផ្សេងទៀត នៅក្នុងតំបន់សមុទ្រចិនខាងត្បូងទាំងមូល គឺសុទ្ធតែស្ថិតក្នុងដែនអធិបតេយ្យរបស់ចិនទាំងអស់។
ការណ៍ដែលហ្វីលីពីនបញ្ជូនកងទ័ព ព្រមទាំងគ្រឿងបរិក្ខា ឲ្យចូលទៅបោះទីតាំង ព្រមទាំងពង្រីកហេដ្ឋារចនាសម្ព័ន្ធលើកោះក្នុងសមុទ្រចិនខាងត្បូងនៅពេលនេះ ក៏ទំនងជានឹងមិនអាចគេចផុតពីក្រសែភ្នែកខឹងសម្បាររបស់ចិននោះដែរ ហើយលោកឌុយទែរតេអាចនឹងត្រូវប្រឈមមុខជាមួយចិន ជុំវិញរឿងនេះ នៅពេលដែលលោកធ្វើដំណើរទៅកាន់ក្រុងប៉េកាំង ដើម្បីចូលរួមក្នុងជំនួបកំពូលស្តីពី “ផ្លូវមួយ ខ្សែក្រវ៉ាត់មួយ” នៅចុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ