ដំណើរទស្សនកិច្ចរបស់លោកពូទីនទៅកាន់ប្រទេសស៊ែរប៊ី
ស្របនឹងកម្មវិធីផ្លូវការ លោកប្រមុខរដ្ឋរុស្ស៊ីត្រូវចូលរួមក្នុងពិធីដ៏ឧឡារឹក រំលឹក ខួប៧០ឆ្នាំ នៃការរំដោះទឹកដីស៊ែរប៊ី ចេញផុតពីក្រញ៉ាំកាន់កាប់នៃកងទ័ពអាល្លឺម៉ង់។ ក្នុងបរិបទទស្សនកិច្ច លោកពូទីនត្រូវជជែកជាមួយថ្នាក់ដឹកនាំស៊ែរប៊ីអំពីគម្រោងរួមមួយចំនួន បែបយ៉ាង វិស័យថាមពល និងផ្លូវអយស្ម័យយាន។ ទស្សនកិច្ចនេះ មានន័យជានិមិត្តរូប ដើម្បី ពង្រឹងឥទ្ធិពលនិងវត្តមានរុស្ស៊ី នៅត្រង់បេះដូងទ្វីបអឺរ៉ុប គឺស៊ែរប៊ី បេក្ខជនសម្រាប់ចូលជាសមាជិកសហភាពអឺរ៉ុប និងដែលខំព្យាយាមមិនឲ្យថ្នាក់ថ្នាំងដល់ រុស្ស៊ីជាមហាសម្ព័ន្ធមិត្តខ្លួន។
ចុះផ្សាយនៅថ្ងៃ៖
ស្តាប់ - ០២:២៩
ប្រជាជនស៊ែរប៊ី ស្ថិតនៅក្នុងអម្បូរស្លាវដូចរុស្ស៊ី ដ្បិត ស៊ែរប៊ី ជាទឹកដីគោលនៃអតីតយូហ្គោស្លាវី គឺប្រទេសដែលមានន័យថា ទឹកដីស្លាវនៅភាគខាងត្បូងទ្វីបអឺរ៉ុប។ ទោះបី យូហ្គោស្លាវី បែកខ្ញែក ទៅជា ៦សាធារណរដ្ឋឯករាជ្យក្តី ក៏រដ្ឋធានី ប៊ែលក្រាដ បន្តស្ថិតនៅជារដ្ឋធានី ស៊ែរប៊ីដដែល។
មិនមែនចែដន្យទេ មួយថ្ងៃមុនដល់ទស្សនកិច្ចរបស់លោកពូទីន លោកនាយករដ្ឋមន្ត្រីស៊ែរប៊ី អាឡេកសង់ វូឈិច ក្នុង សម្ភាសន៍ មកទីភ្នាក់ងារព័ត៌មានផ្លូវការរុស្ស៊ី Itar-Tass បានថ្លែងថា ស៊ែរប៊ីនិងរុស្ស៊ី មានការងារច្រើនដែលត្រូវបំពញរួមគ្នាទៅអនាគត និងថា ស៊ែរប៊ីជា រដ្ឋឯករាជ្យ មានសេរីភាព ដែលបានជ្រើសយកទៅហើយ មាគ៌ាអឺរ៉ុបរបស់ខ្លួន ប៉ុន្តែគ្មាននរណាអាចបញ្ជា ស៊ែរប៊ី ឲ្យភ្ជាប់ខ្លួនទៅនឹងទណ្ឌកម្ម ប្រឆាំងនឹងរុស្ស៊ីឡើយ ពីព្រោះស៊ែរប៊ី គ្មានចេតនាបំផ្លាញ សោះឡើយ ទំនាក់ទំនងខ្លួនជាមួយរុស្ស៊ី។
សម្រាប់ម៉ូស្គូ សំខានណាស់ដែល ការបង្ខិតខ្លួនរបស់ស៊ែរប៊ី ទៅជិតនឹងសហភាពអឺរ៉ុប មិននាំឲ្យខូចដល់ភាពជាដៃគូរបស់ខ្លួនជាមួយក្រុងប៊ែលក្រាដ និងខូចដល់ប្រយោជន៍រុស្ស៊ីឡើយ។
រីឯការងាររួមនោះ គឺ ការសង់កាត់លើដែនដីស៊ែរប៊ី នូវកំណាត់មួយនៃខ្សែបំពង់បង្ហូរឧស្ម័នរុស្ស៊ី ឈ្មោះ South Stream សម្រាប់ជំនួសខ្សែបំពង់បែបនេះ កាត់តាមដែនដីអ៊ុយក្រែន ដែលក្លាយជា ប្រទេសជាប់ក្នុងទំនាស់ជាមួយរុស្ស៊ីទៅហើយ។ ប៉ុន្តែ ខ្សែបំពង់នេះក្នុងតម្លៃ ១៦.០០០ លានអឺរ៉ូ ដែលត្រូវលូនកាត់ តាមដែនដីអឺរ៉ុបខាងត្បូងមួយចំនួនសិន ទម្រាំវាអាចបន្តសង់ឡើង នៅស៊ែរបី ឥឡូវ ធ្លាក់ក្នុងបញ្ហា ដោយប៊ុលហ្ការី ជាទីដែលក្រោយពីបក្សស្តាំឡើងកាន់អំណាច គឺផ្អាកសិន ការសាងសង់ កំណាត់ខ្សែបំពង់នេះនៅលើដែនដីខ្លួន។
ទោះយ៉ាងណាក្តី ជាការដឹងគុណក្រុងប៊ែលក្រាដ ម៉ូស្គូបានផ្តល់ឥណទាន ៨០០លានដុល្លារ ឲ្យស៊ែរប៊ី ប្រើប្រាស់សម្រាប់សង់ផ្លូវអយស្ម័យយានថ្មី និង កែឲ្យទំនើបបណ្តាញផ្លូវដែកសព្វថ្ងៃ។ មិនតែប៉ុណ្ណោះ ម៉ូស្គូ ក៏បានផ្តល់ប្រាក់កម្ចី៥០០លានដុល្លារ ទុកសម្រាប់ស៊ែរប៊ីជំនះលើ ឧនភាព ធ្ងន់ធ្ងរនៃថវិកាជាតិ ។
សម្រាប់លោកប្រធានាធិបតីរុស្ស៊ីពូទីន ដោយចូលរួមក្នុងពិធីរំលឹក ខួប៧០ឆ្នាំ នៃការរំដោះ ទឹកដីស៊ែរប៊ី ចេញផុតពីការកាន់កាប់នៃកងទ័ពអាល្លឺម៉ង់ គាត់មុខជាឆ្លៀតឱកាស ថ្លែងសារ ទៅកាន់ពួកអ្នកដឹកនាំបស្ចិមលោក ដែលមានវត្តមានដែរក្នុងពិធីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ